1 ቴሴሎንቃ 5

1

2

3

4

5

¹ሺን ኑናዳን ፆሳ ካሊያዋንቶ፥ ሃ ዬዋቱ ኣዉዴ ሃናኔንቶ፥ ዎዲያኔ ኣጌና ሂንቴንቶ ፃፋናው ኮሼና።

²ኣዪሲ ጎፔ፥ ጎዳ ጋላሳይ ካዪሱ ቃማ ዪያዋዳን ያናዋ ሂንቴንቱ ሎይꬂ ኤሪታ።

³ኣሳይ፥ «ኡባባይ ሳራ፤ ኣያይካ ሃኔና» ጊሺን፥ ማጫ ኣሳ ዬሉ ኦይቂያዋዳን፥ ባሻይ ኡንቱንቱ ቆፔናን ኡንቱንቱ ቦላ ያና። ኡንቱንቱ ሙሌካ ኬሲ ኣኪኪኖ።

⁴ሺን ኑናዳን ፆሳ ካሊያዋንቶ፥ ሄ ጋላሳይ ሂንቴንቶ ካዪሱ ዪያዋዳን ያናው ሂንቴንቱ ꬉማኒ ዴዒኪታ።

⁵ሂንቴ ኡባይ ፖዑዋ ኣሳኔ ጋላሳ ኣሳ፤ ኑኒ ቃማ ኣሳ ዎይ ꬉማ ኣሳ ጊዶኮ።

⁶ሄዋ ዲራው፥ ኑኒ ሃራቱ ጌሚዒሺያዋዳን ጌሚዒሻናው ቤሴና። ኑኒ ቤጎታናዉኔ ዎጋን ዴዓናው ቤሴ።

⁷ኣዪሲ ጎፔ፥ ጌሚዒሺያዋንቱ ቃማ ጌሚዒሺኖ፤ ማꬆቲያዋንቱካ ቃማ ማꬆቲኖ።

⁸ሺን ኑኒ ጋላሳ ኣሳ ጊዲያዋንቱ ዎጋን ዴዓናው ቤሴ። ኑኒ ኣማኑዋኔ ሲቁዋ ቲራን ዎꬂያ ኦላ ሚሻዳን ኦይቂዴ፥ ኑኒ ሂዶታን ናጊያ ኣቶቴꬃ፥ ቢራታ ቆቢያዳን፥ ሁጲያን ዎꬃናው ቤሴ።

⁹ኣዪሲ ጎፔ፥ ፆሳይ ኑና ኑ ጎዳ ዬሱሲ ኪሪስቶሳ ባጋና ኣቶቴꬃ ዴማናው ዶሬዳዋፔ ኣቲን፥ ኣ ሃንቁዋ ኣካናው ዶሪቤና።

¹⁰ኑኒ ፓፃ ጊዲና ዎይ ሃዪቄዳዋንታ ጊዲና፥ ኪሪስቶሳና ኢቲፔ ዴዓና ማላ፥ ኪሪስቶሲ ኑ ዲራው ሃዪቄዳ።

¹¹ሄዋ ዲራው፥ ሂንቴንቱ ቃሲ ሃዒ ኦꬂያዋዳን፥ ሃራቱዋ ሜንꬄꬂቴኔ ኢቱ ኢቱዋ ዲቺቴ።

¹²ኑናዳን ፆሳ ካሊያዋንቶ፥ ሂንቴንቱ ጊዶን ኦꬂያዋንታ፥ ሂንቴና ኣማኑዋ ኦጊያን ካሌꬂያዋንታኔ ዞሪያዋንታ፥ ሂንቴንቱ ቦንቻና ማላ፥ ሂንቴና ዎሴቶ።

¹³ኡንቱንቱ ኦꬂያ ኦሱዋ ዲራው፥ ኡንቱንታ ሎይꬂ ቦንቺቴኔ ሲቂቴ። ኢቱ ኢቱዋና ሳሮቴꬃን ዴዒቴ።

¹⁴ኑናዳን ፆሳ ካሊያዋንቶ፥ ኑኒ ሂንቴና ዞሬቶ፤ ማራይ ባዪና ዴዑዋ ዴዒያዋንታ ሴሪቴ። ያዪያዋንታ ሜንꬄꬂቴ። ዎልቂ ባይናዋንታ ማዲቴ። ኣሳ ኡባ ዳንዳዪቴ።

¹⁵ኦኒኔ ኢታ ዲራው ኢታ ዛሬና ማላ ናጌቲቴ፤ ሺን ኡባ ዎዴ፥ ኢቱ ኢቶኔ ቃሲ ኣሳ ኡባው ሎዖባ ኦꬃናው ሚኒቴ።

¹⁶ኡባ ዎዴ ናሼቲቴ።

¹⁷ኡባ ዎዴ ቃንፄናን ፆሳ ዎሲቴ።

¹⁸ኡባባኒ ጋላቲቴ። ኣዪሲ ጎፔ፥ ኪሪስቶሳ ዬሱሳ ባጋና ፆሳይ ሂንቴፔ ኮዪያዌ ሄዋ።

¹⁹ጌሻ ኣያና ታማ ቶዪሶፒቴ።

²⁰ቲምቢቲያ ቃላ ካꬎፒቴ።

²¹ኡባባካ ፓጪቴ። ሎዖባ ኦይቂቴ።

²²ኢታ ኦሱዋ ኡባፔ ሃኪቴ።

²³ሳሮቴꬃ ፆሳይ ባሬ ሁጴው ሂንቴና ኡባባኒ ፖሎ ጌሾ፤ ቃሲ ኑ ጎዳይ ዬሱሲ ኪሪስቶሲ ዪያ ዎዴ፥ ፆሳይ ሂንቴንቱ ኣያና፥ ሼምፑዋኔ ኣሳቴꬃ ኢቲፔ ቦሬቴናዋኔ ፖሎ ኡዲዴ ናጎ።

²⁴ሂንቴና ፄሲያዌ ኣማኔቴዳዋ፤ ቃሲ ሄዋ ኢ ፖላና።

²⁵ኑናዳን ፆሳ ካሊያዋንቶ፥ ኑሲ ፆሳ ዎሲቴ።

²⁶ኢሻቱዋ ኡባ ጌሻ ዬሩዋ ዬሪዴ ሳሮቲቴ።

²⁷ሂንቴ ሃ ዳቢዳቢያ ጌሻ ኢሻቱዋ ኡባው ናባባናዳን፥ ጎዳ ሱንꬃን ሂንቴና ዎሳይ።

²⁸ኑ ጎዳ ዬሱሲ ኪሪስቶሳ ኣꬎ ኬካቴꬃይ ሂንቴናና ኢቲፔ ጊዶ።