Sie Thessalonica 5

1

2

3

4

5

¹Mwet lulalfongi wiasr, nga tia enenu in sim nu suwos ke pacl ku len ma inge ac sikyak uh.

²Tuh kowos sifacna arulana etu lah Len lun Leum ac tuku oana sie mwet pisrapasr ke fong.

³Ke pacl se mwet uh ac fahk, “Ma nukewa misla ac wona,” na in pacl sacna mwe keok lulap ac fah sonolos! Ac sikyak ke pacl na sa, oana mwaiok lun sie mutan su akola in isus, ac mwet uh tia ku in kaingkunla.

⁴A kowos, mwet saok wiasr, kowos tia muta in lohsr; ke ma inge kowos ac fah tia lut ke Len lun Leum ac tuku oana sie mwet pisrapasr.

⁵Kowos nukewa mwet lun kalem, su ma lun len. Kut tia ma lun fong ku lohsr.

⁶Ke ma inge, lela kut in tia motul oana mwet ngia, a kut in ngetnget ac ngusrik na.

⁷Mwet uh motul ke fong, ac elos oayapa sruhi ke fong.

⁸A kut ma lun len, ouinge kut in arulana ngusrik. Kut enenu in nokomang lulalfongi ac lungse in mwe loango iniwasr, ac finsrak lasr nu ke molela in loango sifasr.

⁹Tuh God El tia sulekutla in keokkin kasrkusrak lal, a in eis molela ke Jesus Christ,

¹⁰su misa kacsr tuh kut in ku in tukeni moul yorol, kut finne misa ku moul ke el ac tuku.

¹¹Ke ma inge kowos in akkeye sie sin sie ac kasru sie sin sie, oana ke kowos oru inge.

¹²Mwet lulalfongi wiasr, kut kwafe suwos tuh kowos in akfulatyalos su orekma inmasrlowos, tuh elos inge pa kol kowos ac luti kowos ke moul in lulalfongi.

¹³Kowos in arulana akfulatyalos ac lungse elos ke sripen orekma lalos. Kowos in moul in misla yurin sie sin sie.

¹⁴Mwet lulalfongi wiasr, kut kwafe suwos tuh kowos in kaelos su alsrangesr, ac akpulaikyalos su sangeng, kasrelos su munas, ac mongfisrasr nu sin mwet nukewa.

¹⁵Liyaung tuh in wangin mwet folokin ma koluk ke ma koluk, a in pacl nukewa kowos in oru wo nu sin sie sin sie, ac oayapa nu sin mwet nukewa.

¹⁶Kowos in engan pacl nukewa,

¹⁷pre pacl nukewa,

¹⁸ac sang kulo in ma nukewa. Pa inge ma God El lungse kowos in oru ke moul in asruoki lowos in Christ Jesus.

¹⁹Nik kowos kutongya Ngun Mutal;

²⁰nikmet pilesru kas lun mwet su luti ke Inen God.

²¹Kowos in arulana tuni ac srike ma nukewa; sruokya ma wo,

²²ac fahsr liki kutena ma koluk.

²³God, su ase misla nu sesr, Elan akmutalye kowos in ma nukewa, ac karinganang moul lowos — ngunuwos ac monuwos — tuh in wangin mwatuwos ke sikme lun Leum lasr Jesus Christ.

²⁴El su pangon kowos El ac fah oru ma inge, mweyen El oaru.

²⁵Mwet wiasr in lulalfongi, kowos in pre pac kacsr.

²⁶Paing pac mwet lulalfongi nukewa ke lungse pwaye.

²⁷Nga arulana kwafe suwos ke Inen Leum, kowos in riti leta se inge nu sin mwet lulalfongi nukewa.

²⁸Lungkulang lun Leum lasr Jesus Christ in wi kowos.