1 Tesalonaika 5

1

2

3

4

5

¹Kasa tasimami, lopu kilu pude kubere atu ni gami koa gamu sari na totoso na rane, pu kote ta evaṉa saripu gua arini.

²Ura ele gilana valeania mia mo gamu, sapu kaqu mae va hodaka guana tie hikohiko pana boṉi sa rane tanisa Baṉara.

³Sipu korapa zama guahe sari na tie, “Bule learane sa popoa, mada koa valeana,” gua. Pa totoso tugo asa si kote raza va hodaki na tinahuara si arini. Kote kamo guana tinasigiti koasa barikaleqe molumoluna, meke lopu kaqu boka govete nia rina tie si asa.

⁴Ba gamu kasa na tasimami, si lopu koa pa hinuporo, ke lopu kote kamo va hodahodaka koa gamu sa rane sana, guana tie hikohiko.

⁵Gamu doduru si tanisa kalalasa, meke tanisa rane. Lopu tanisa boṉi, babe na hinuporo si gita.

⁶Gua asa, ke mada lopu koa kekeṉoṉo gua rina tie pu puta, ba mada kopu na koa gilae.

⁷Ura saripu edi puta si hoke puta pana boṉi, meke saripu napo va viviri, si hoke naponapo pana boṉi.

⁸Ba gita sapu tanisa rane, si mada koa gilae. Mada koa va nabu pa rinaṉeraṉe na tataru kekeṉoṉo gua na tie varipera pu va sagea sa poko raqaraqa. Mada koa va nabu pa rinaṉeraṉe sapu kaqu vagia gita sa tinaharupu, kekeṉoṉo gua sa tie sapu va hakea sa toropae varipera.

⁹Ura lopu vizata gita Tamasa si gita, pude ta raza nia gita sa Nana tinaṉaziri, ba pude vagia tu gita sa tinaharupu pa korapa Zisu Karisito sa nada Baṉara.

¹⁰Ele mate paeni gita Sa, ke be mate babe toa si gita, ba kaqu toa turaṉia gita si Asa.

¹¹Ke mi variva ṉiṉirai na varivari tokae telemia, gua puta tugo sapu korapa tavetia gamu kamahire.

¹²Kasa tasimami, tepa gamu gami si pude mi pamaṉa ni si arini pu tavetavete pa vari korapa mia, sari na mia koimata pu va tumatumaeni gamu sa tinoa koe Karisito.

¹³Mi va lavati na tataru ni sari na koimata sina koa gua koasa dia tinavete koa gamu. Mi koa vari bulei pa vari korapa mia.

¹⁴Tepa gamu gami si gamu doduru tasimami, pude mi va balaui si arini pu koa hoboro pude di tavetavete. Mi va ṉiṉirai saripu koa mala, mi toka ni saripu malohoro, mi tataru va ṉoṉo ni sari doduru tie.

¹⁵Mi kopu sisigiti nia pude loke tie si hobe nia kinaleana sa kinaleana, ba mi podekia doduru totoso pude mi koa vari tokae pa varikorapa mia, meke koari doduru tie.

¹⁶Mi koa qetu doduru totoso.

¹⁷Mi lopu makudo varavara.

¹⁸Koari doduru tiṉitoṉa leadi na kaleadi pu ta evaṉa, si mi zama leana ni koe Tamasa. Ura asa tugo sa hiniva te Tamasa koa gamu pa mia tinoa keke koe Zisu Karisito.

¹⁹Mi lopu kilua sa hiniva tanisa Maqomaqo Hope pa bulomia, gua sapu siliria goi si keke nika.

²⁰Mi lopu kilui sari na kinorokorotae.

²¹Mi viliti sari doduru inavoso, mamu tuqe va nabui saripu leadi.

²²Mi taliri va seu koari doduru kinaleadi.

²³Mani va madi sa Tamasa tana binule sari doduru mia tinoa: sa maqomaqo mia, sa bulomia, meke sari tini mia, pude loke tinazutu mia pana pule mae sa nada Baṉara Zisu Karisito.

²⁴Asa sapu tioko gamu si kote evaṉi saripu gua sara, sina Asa mo si ta ronuena.

²⁵Kasa tasimami, mi varavara tokani gami.

²⁶Mi vari hapahapai na vari qetuqetui, pana vari tutuvi si gamu na tamatasi koe Karisito.

²⁷Tozini gamu rau pa korapa ṉiniraṉira tanisa Baṉara, pude mamu tiroa sa leta hie, koari doduru tamatasi koe Karisito.

²⁸Mani koa koa gamu sa tataru lopu ta ṉana kamona tanisa nada Baṉara Zisu Karisito.