1Nagra anazama efore'ma hania zamofonkea, e'i knarero, e'ina zupa fore hugahie hu'na nenafugta kreoramigahue.
2Na'ankure tamagratmi antahi'naze, Ramo'ma esianknamo'a, kumazafa vahe kenage eankna huno egahie.
3Vahe'mo'za hu'za knare huta mani'none nehu'za, tarimpa fru huta maniso'e hune hu'za hanaza knafi! Ame huno zmazeri haviza hu'zamo'a zamagritera, anemo'za mofavre antenaku'ma nehazageno zamata negriankna zmata negrina, zamagra ana knazampintira mani onkanegahaze.
4Hianagi tamagra nenafugate, hanimpina omninazankino, ana knamo'a kumazafa vahe'mo'za hanimpi azanknara hanigeta antri osugahaze.
5Na'ankure tamagra maka'motma tavite vahe maninetma, msare vahe mni'naze. Tagra kenage vahera omanita, hanimpi vahera omani'none.
6E'ina hu'negu atrenketa mago'amo'za nemasazaza huta omaseta, tavumo'a hari nehina, ama' antahintahi e'nerita kva huta manigahune.
7Na'ankure zmavuma masaza vahe'mo'za kenegeke nemasageno, aka tima nenaza vahe'mo'za, kenegeke aka tina nene'za neginenaze.
8Hianagi tagra masare vahe mni'nonanki, atrenketa ama' tagutagesa nentahita, tamentintima huzane, vahe'ma avesinte avu'avazana tamimizare hanko reheriaza nehuta, Jisasi'ma taguvazino tavresiazanku nentahita amuhama nehunazana, fetori anteaza huta antegahune.
9Na'ankure Anumzamo'a rimpahe'zama'a erigahaze huno huorantene. Hianagi Ranti Jisasi Kraisimpinti tahokeno taguvazizana erisunegu huhamprirante'ne.
10Jisasi'a tagriku huno fri'neankita, fri'nazo tasimu erita mani'nono, tagra Agrane magopi manisunku huno fri'ne.
11E'ina hu'negu mago magomotma, ozeri hanaveti azeri hanaveti nehutma, menima nehazaza hutma mago magomofona zmazeri hanavetita maniho.
12Hianagi nenfugata, tusi maraguzatiza Ramofonte manisaza'zamofo nanekema rempima hunerami'za mono kva vahetamimofona, kegva huzmanteho huta neramasamune.
13Hagi erizama e'neriza zanku zmesizmanteta, zamagrira zamagi erisaga nehuta, magoke magokemotma tamarimpa frune maniho.
14Nerafugate, tagra tamazeri otike hanunketma erizama e'ori zmesrama nehaza vahera zmazeri fatgo nehutma, koroma nehaza vahera zmazeri hankavenetitma, hanavema oti'nesaza vahera zmazeri hanavetiho. Ana nehutma maka vahe enena fru hutma maniho.
15Mago'mo'e huno havizama huntesimofona, nona'a havizana huonteno. Hianagi maka kna knare avu'avaza ohunte ahunte nehutma, maka vahetera anahukna tamavutmava huzmanteho.
16Makazupa muse hiho.
17Nunamuna otretma makakna huvava hiho.
18Hakare'zampina Anumzamofona susu hunteho, na'ankure Jisasi Krasimpima e'inahu tamavutamavama huzankura Anumzamofona avenesie.
19Tamagra Ruotge Avamumofo teve ahesu hu avu'avazana osiho.
20Kasnampa kemofona antahi amnezanknara osiho.
21Hianagi rezaganetma makazana ke so'e nehutma, knarema hunesiazana azeri akona hiho.
22Ana nehutma, maka havi avu'ava zampintira maniganeta maniho.
23Hagi rimpa fru Anumzamo'a, Agra maka sese huramanteno tamazeri ruotage nehuno, avamutamine, tamagu tamene, tamavufanena kegva huramantena, Ranti Jisasi Kraisi'ma esianknarera kema hurantezana omanetfa hugahie.
24Anumzamo'ma tamagima hunemo'a, fatgo huno ke'are amage antegahiankino, Agra anahukna huno eriknare huramantegahie.
25Nenafugate tagrikura nunamuna huranteho.
26Maka tafu'hemotma mono tamavutamava hutma tamafukre tamafakre hiho.
27Nagra hanave ke tamasamuanki, ama avona hamprinke'za, maka tafuhe'za antahiho.
28Hagi Rantimofo Jisas Kraisi asunku'zamo'a tamagrane mesie.
