1Sabata hombaŋ tarame Sondao hae fufurecte Maria Madala haeonec â Maria âgone jahe ʒâŋeruŋ honenicte rapic.
2Rahapire homeŋ sâko ɋeŋfâfâc jaha bame Wofuŋte aŋelo moczi sambâŋkonec waharâ qânâ tuŋkeme rârieme fainao ŋewec.
3Hawari‐ticne bâbâric hawari â ŋaqi‐ticne qaŋqaŋ kisieckekicne.
4Eme soŋaŋ jaŋe honerâ maŋjeŋic bâzickeme hâhâmocne ejareme forambiŋ.
5Eme ŋokac rafisipire aŋelozi ʒiŋuc jasawec: “Ŋohe mi hâwic‐ŋofaoc, no manakopac, ŋohe Jesu maripoŋko qakicne e honenicte warekopirec.
6Erâ e ʒira aricne, e qanaŋ ŋazawec iŋuc erâ faharejec. Ŋohe ware fofotacne ʒi honenic.
7Erâ biac rarâ motecfâcne ʒiŋuc jazanic: ‘Jesu e hâmockonec faharejec, erâ Galilaia mâreŋko rahuc bânie‐ŋareocmu, ŋoŋe ira honeniŋmu.’ Dâŋ ine hâcne ŋasakopac.”
8Eme jahe biac jaha ʒâŋeruŋ râpeckerâ hâhâwic â ʒeri sâko mâmâc manahuc motecfâcne biŋedâŋ jazanicte gagasac jaha rapic.
9Rahapire mi Jesuzi bâfuac‐jofazejec i! Bâfuac‐jofarâ jasawec, “Ʒeri enic.” Iŋuc mume jahe maŋfuŋnao fodaperâ kikenao ropic.
Mataio 28
Mataio 28:1-9