1Jesu e dâŋ fuŋne fuŋne i mutararâ Galilaia mâreŋ beherâ Judaia mâreŋ qaŋeŋnao Jordaŋ ocniŋucnao rawec.
2Rahame ŋic guru sâko jâmbâŋ jaŋe bâjâpembiŋ. Eme mâreŋ ira juhuc huchec jaŋe ɋiɋicne bacjopawec.
3Ehame farisaio jaŋe esâickeniŋte fisirâ ʒiŋuc muhuc wiocnembiŋ: “Moc e ŋonâŋ‐ticne wiac irec me irec beheme sâckeocmu?”
4Mupie jazawec, “Ŋoŋe mitidâŋ kecʒiŋuc fokac i mi woseeŋgopieŋ me? Bâbâfua e mârâc jaha ŋic bâfuac‐jopaocte ŋic â ŋokac sâckoa bâfuac‐jofawec.
5Bâfuac‐jofarâ muwec, ‘Irec hâcne ŋic moczi neŋgoc mamac jahec‐ticne behec‐jofarâ ŋonâŋ‐ticnerao qohotame jahe maŋ sahac mocjaha erâ junicmu.’
6Eme jahe jajahec mi ehuc, mocjaha erâ junicmu. Anutuzi bâturec‐jofawecte ŋiczi mi bârâwiŋ‐jofazo.”
7Iŋuc jazame jaŋe mumbiŋ, “Hâc, eme Mose e ŋokac moc behezo murâ pasi râcnehuc sorezo, iŋuc wemocte muwec?”
8Mupie Jesuzi jazawec, “Mose e mâc maŋsanaŋ‐ŋeŋicte bebehec eniŋte mana urue‐ŋarewec. Fufuŋkenao ine hata iŋuc mi fowec.
9Irec noni ŋazape mananiŋ: Moc e ŋonâŋ‐ticne beherâ moc roocmu e ʒuʒuhuc‐jekic bâtâcnehuc kiŋsâko hureocmu. Mâc ŋonâŋzi qanaŋ boe sau bâfuawecko ʒuhuc bâtâcte kiŋ i ŋowere mi eocmu.”
10Iŋuc mume motec jaŋe âzâcnerâ mumbiŋ, “Ŋowe ŋonâŋ jahere fuŋne iŋuc fokacko ine ŋonâŋ tâmiric mâc mecne juzo.”
11Mupie Jesuzi jazawec, “Dâŋ ʒi sasawazi mâcne, irec tâpiri jarekicne jaŋe sawa ro maŋ eniŋmu.
12Ŋic gâcne jaŋe neŋgoc bumaŋkonec ŋonâŋ tâmiric juniŋte aputac fuaeŋgopieŋ, gâcne jaŋe ŋiczi aputac bacjopakicne, gâcnezi ine sambâŋte miti hatare erâ aputac hawari jueŋgopieŋ. Moc e irec tâpiri focnekaczi dâŋ ʒi ro maŋ ezejec.”
13Eme ŋic ŋokac jaŋe ɋiefâc‐jeŋic Jesurao bacjopa rarâ meticne qizec‐jeŋicko râerâ numuocte âzâcnembiŋ. Eme motecfâcne jaŋe hâhâwic hejarepie
14Jesuzi muwec, “Ŋoŋe behehapie ɋie jaŋe norao wareniŋ, aka mi hejareniŋ. Iŋucne jaŋe hâcne sambâŋte uucmaŋ biŋe qajarekicne.”
15Iŋuc murâ meticne qizec‐jeŋicko râewec. Erâ mâreŋ i beherâ mocko rawec.
16Eme ŋicmotec moczi Jesurao fisirâ indiŋkerâ muwec, “Qaqazu, no mo gie biaŋne mo barâ juju sanaŋte biŋe epemu?”
17Mume ʒiŋuc âzâcnewec: “Wiac biaŋnere wemocte wio‐narekomec? Biaŋne rune mocjaha jukac. Eme go juju sanaŋte biŋe ezo murâ sâcmutâc dâŋ reŋkezemec.”
18Eme eki, “Sâcmutâc dâŋ wenimoi” muhuc wiocneme Jesuzi muwec, “Go ʒika mi qazemec, ŋowe ŋonâŋ ŋohe bebehec mi ezepirec, go fiuc mi rozemec, go micko âkec mi ezemec,
19go neŋgoc mamac jahecge sâsec‐jofazemec, erâ go gahacnere egareekac sâc ijaha âgogere egarezejec.”
20Mume ŋic e ʒiŋuc âzâcnewec: “I reŋke warehuc jupo, irec moc weniŋuc ezepac?”
21Iŋuc mume Jesuzi âzâcnewec, “Go bahac fâsâc ezo murâ ra moneŋ mafa wiacge ŋic hapetac qikiŋne‐jarezemec, eme sambâŋko boreŋ ʒeŋaŋ fua‐gareocmu. Erâ ware bâjâpecnuzemec.”
22Ŋic e dâŋ i manarâ bune sâqoreme rawec, moneŋ mafa ɋâfoŋne focnewec irec.
23Rame Jesuzi motecfâcne ʒiŋuc jazawec: “No jâmbomac ŋazape, moneŋ mafa sâkoheczi sambâŋte uucmaŋko raʒiniŋte ququŋkenehec eekac.
24No irecteaŋ mocwâc ŋazape: Kamelezi buŋic hawecnao rarazi i wiac afecne, â moneŋ mafa sâkoheczi sambâŋte uucmaŋko raraʒi i wiac ŋemâcne.”
25Motec jaŋe dâŋ i manarâ bipic‐jeŋic tarame mumbiŋ, “Hâc, eme mozi sambâŋko feocmu?”
26Mupie Jesuzi honec‐jopahuc muwec, “I ŋiczi eene mi fokac, erâ sifu Anutuzi wiac i me i hatane bâfuaocte mi quŋkeocmu.”
27Iŋuc muhuc jazame Petorozi micnao rorâ muwec, “Manakic, nâŋe wiac‐nâŋec sasawa râpecke‐fârerâ go bâjâpecgumbeneŋ, eme juku irec okacne wemo fua‐nâreocmu?”
28Iŋuc wiome Jesuzi ʒiŋuc jazawec: “No jâmbomac ŋazape: Juku wiac sasawa ɋârerâ fua biaŋ ee dameŋko Ŋic Fâri Wâtuŋnezi eri ŋeŋe‐ticnao ŋehame no bâjâpecnumbiŋ ŋoŋe iŋuc jaha ŋicwofuŋ ŋeŋe 12 ira ŋerahuc Israe ŋicguru 12 jaŋere dâŋ mutaranʒoŋgopieŋ.
29Erâ moc e nore erâ hahac ɋa, seŋ baŋec, neŋgoc mamac, naru motec, hae jufu beheocmu, e okacne wiac qame hukicne jâmbâŋ raʒime raʒi rorâ fainao juju sanaŋ rauckeocmu.
30Micne jaŋeraonec bocjahazi ʒâhec eniŋmu, â ʒâhec jaŋeraonec bocjahazi micne eniŋmu.
