Matiu 28:1-9

¹Navong Sabat evus, out mulan en Sande, Meri ten out Makdela ka Meri tateisav luva keke luvasao en valengeihat tatetahinien onen Iesu.

²Hatte tas, alu mulu keih veni angelo tai onen Ahi Asuv mita netan ran out nesa. Kei rei lat ahat koa mul koe voiteh eva, ka rondan eni.

³Aven angelo enek vihil suval ahil vil, ka eisin omon muoh vis muoh.

⁴Navong meatin tavaeen keil alesi, ametau houlu ka ale maleilei. Keil umotmot ka e von, asakras avoumon etai tounah.

⁵Ka angelo selus min luahin enek vit, “!Milnametautei! Nakilea milmul millekat Iesu koa amuti kati en aiveave.

⁶Kei rorotei mun ekok. Anatin, kei moul eris ran matien suval koa kei viteni. Milhemai ekok ka milheles out koa aling teiai onen mul ien.

⁷Ekek, milhekalah milheha ka milhehiteni min onen keil milhehit, ‘Iesu moul eris ran matien ka helamu en kami heha en out Kaleli. Ekonek kami mihelesi.’ Koanik vi selusien koa Ahi sila inau mahiteni min kamil.”

⁸Sakini keilu lumea ran valengeihat ka lukalah lumuloh luva keke luvahithiteni min meatin keil onen Iesu. Lumetau ka annivul kat keilu, ka mukos, luvilelau en sien.

⁹Navong lumul veah luva, hatte tas, Iesu visu min keilu ka vit, “!More! Tomat onen Ahi heto ven kamil.” Navong lulesi, lumai veni, ka lumot luvuli kat alen keilu ka luvouhou mini.