Mataio 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Ŋic gaŋne gaŋne fua wefukupie Jesu Kristo e Abraham â Dawidi jahere ɋâric fuawec.

²Abrahamte bifuŋko Isaka fuawec. Isakare bifuŋko Jakobo fuawec. Jakobore bifuŋko Juda â hahac ɋafâcne fuambiŋ.

³Judare bifuŋko Perese â Sera fuapic, jahe Tamazi rocjofawec. Peresere bifuŋko Hezoroŋ fuawec. Hezoroŋte bifuŋko Ram fuawec.

⁴Ramte bifuŋko Aminada fuawec. Aminadare bifuŋko Nasoŋ fuawec. Nasoŋte bifuŋko Salamoŋ fuawec.

⁵Salamoŋte bifuŋko Boasi fuawec, e Rahabazi rowec. Boasire bifuŋko Obede fuawec, e Rutizi rowec. Obedere bifuŋko Isai fuawec.

⁶Isaire bifuŋko ŋicwofuŋ Dawidi fuawec. Ŋicwofuŋ Dawidire bifuŋko Salomo fuawec, e Uriare ŋonâŋzi rowec.

⁷Salomore bifuŋko Rehoboam fuawec. Rehoboamte bifuŋko Abia fuawec. Abiare bifuŋko Asa fuawec.

⁸Asare bifuŋko Josafata fuawec. Josafatare bifuŋko Joram fuawec. Joramte bifuŋko Usia fuawec.

⁹Usiare bifuŋko Jotam fuawec. Jotamte bifuŋko Ahaʒi fuawec. Ahaʒire bifuŋko Hisikia fuawec.

¹⁰Hisikiare bifuŋko Manase fuawec. Manasere bifuŋko Amoŋ fuawec. Amoŋte bifuŋko Josia fuawec.

¹¹Josiare bifuŋko Jekonia â hahac ɋafâcne fuambiŋ, ine Judaŋic Babe mâreŋko bacjopa rakicne dameŋ ira fuambiŋ.

¹²Eme irec fainao Jekoniare bifuŋko Sealitie fuawec. Sealitiere bifuŋko Serubabe fuawec.

¹³Serubabere bifuŋko Abiudu fuawec. Abiudure bifuŋko Eliakim fuawec. Eliakimte bifuŋko Aso fuawec.

¹⁴Asore bifuŋko Zadoko fuawec. Zadokore bifuŋko Akim fuawec. Akimte bifuŋko Eliudu fuawec.

¹⁵Eliudure bifuŋko Eleaʒa fuawec. Eleaʒare bifuŋko Mataŋ fuawec. Mataŋte bifuŋko Jakobo fuawec.

¹⁶Jakobore bifuŋko Josefe fuawec, e Mariare ŋowe ewec. Â Mariazi ine Jesu rowec, ere ʒâŋe Kristo mukicne.

¹⁷Fufua ine kecʒiŋuc fua warembiŋ: Abrahamtaonec fua fua wefukupie Dawidi fuawec i gaŋjeŋic 14. Â Dawidiraonec fua fua warekupie Judaŋic Babe mâreŋko bacjopa rakicne ine gaŋjeŋic 14 jaha. Â dameŋ irecnec fua fua warekupie Kristo fuawec iŋuc jaha gaŋjeŋic 14 ekac.

¹⁸Jesu Kristo fuawec irec fuŋne kecʒiŋuc fokac: Neŋgoc‐ticne Maria e Josefe biŋe qacnepie rârâwiŋ juhapire Tiri Mârozi mâsi bame Maria e motec kiweckewec.

¹⁹Iŋuc ecneme biŋe‐ticne Josefe e mitihec juwecte maŋnezi kecʒiŋuc muwec: No dâŋticne hofao râepe mimi fainao fezacte kamierâ behezepac.

²⁰Iŋuc eocte manasuhuc juhame Wofuŋte aŋelo moczi guŋko fuacnerâ kecʒiŋuc âzâcnewec: “Josefe, go Dawidire ɋâriczi Maria ŋonâŋge rocmurâ manabâc mi ezemec, motec kiweckekac i Tiri Mâroraonec.

²¹Motec roocmu ere ʒâŋe Jesu muzemec, eki hâcne gurufâc‐ticne sâqocnere niŋgiŋkonec batarac‐jopaocmu.”

²²Wiac sasawa fuawec i porofete moczi Wofuŋte micte dâŋ kecʒiŋuc muwec i fârinehec eocte fuawec:

²³“Manaŋgopieŋ, naru ʒeŋoŋ moczi motec kiweckerâ roocmu, ere ʒaŋe Imanue muniŋmu.” (Nâŋâcne dâŋko: Anutuzi nâŋâcnehec jukac.)

²⁴Eme Josefe e guŋkonec ɋârerâ Wofuŋte aŋelozi dâŋ âzâcnewec i reŋkehuc Maria âgo ecnerâ ficticnao jowa fewec.

²⁵Â ŋowe ŋonâŋzi juju ine mi juhapire motec fuawec. Fuame Josefezi ʒâŋene Jesu muwec.