1Jesu e ʒoaŋ gie bapa 6 juraku Petoro, Jakobo â ɋaticne Johane rocjopame tiki tuhuo fembiŋ.
2Eme ira mai‐jeŋicko domahuc hawarine fuŋmoc ewec. Ehuc ʒâŋe maine ʒoaŋ tatamac iŋucne tamaewec â ŋaqi‐ticne sawa tatamac iŋucne erâ findowawec.
3Ehame Mose â Elia ijaha mai fuarâ ehec dâŋ muc manac embiŋ.
4Iŋuc ehapie Petorozi Jesu ʒiŋuc âzâcnewec: “Wofuŋ, sowine ʒira juŋgopeneŋ, irec manatec boze jahec â moc bape, gore moc, Mosere moc â Eliare moc.”
5Iŋuc muha muhame izia karorac oŋararacne moczi waharâ sâoc‐jopawec. Eme karorac maŋkonec dâŋ moc kecʒiŋuc wahawec: “Keci joroc Ŋokâ‐nane, no e hone ʒiziweekopac. Ŋoŋe dâŋticne mananʒepieŋ.”
6Motec jaŋe dâŋ i manarâ ʒâŋe mai‐jeŋic mâreŋko hetutuckerâ ɋarac ɋarac qahuc fombiŋ.
7Iŋuc ehapie Jesuzi maŋfuŋ‐jeŋicko rarâ bâuc‐jopahuc muwec, “Ŋoŋe faharerâ hâhâwic tâmiric juniŋ.”
8Eme jaŋe ʒâŋe‐jeŋic fitâcnerâ Jesu sawa honembiŋ.
9Eme tikionec wahahuctecne Jesuzi ʒiŋuc jazawec: “Wiac ʒâŋe furu honembieŋ irec dâŋ biŋe ŋic mi jajaza juhapie Ŋic Fâri Wâtuŋne e hâmockonec ɋârerâ faharezejec.”
10Iŋuc jazame motecfâcne jaŋe wiocnerâ mumbiŋ, “Eli qanaŋ fisiocmu, miti qaqazu jaŋe wemocte dâŋ iŋuc mueŋgopieŋ?”
11Wiocnepie jazawec, “Elia e fisirâ wiac bâtâcne bâtimuŋ efâreocte mukicne i jâmbomac.
12Erâ ŋazape mananiŋ: Elia e biac fisirâ jume mi ʒâŋitahuc wiac kosa ecnembiŋ. Eme Ŋic Fâri Wâtuŋne e wâc iŋuc jaha qa imac ecneniŋmu.”
13Iŋuc mume jaŋe ʒiŋuc manambiŋ: I Johane Miti Opâ fufuŋke ere mukac.
14Eme tikionec wahaku ŋic jaŋerao fisipie ŋic moczi warerâ Jesure maŋfuŋko fodaperâ muwec,
15“Wofuŋ, go ŋokâ‐nanere buge sâqoreoc. E hâmo ɋârec hati ehuc ʒocko â opâo huekac.
16Eme motecfâcge jaŋerao bawarepe bâpiaŋkeniŋte eipiembieŋ.”
17Mume Jesuzi kecʒiŋuc muwec: “O mamanasiŋ tâmiric â gegec dodocne ŋoŋe, no ŋoŋehec hati jurâ ju ehuc âsi qataŋ eŋarepemu me?” Iŋuc murâ muwec, “Motec bareniŋ.”
18Eme jaŋe iŋuc epie Jesuzi demoŋ dâŋ mucneme motec beherâ wiseme izia biaŋkewec.
19Eme motecfâcne jaŋe bucko wiocnerâ mumbiŋ, “Nâŋe wemocte demoŋ jâpenaŋte eipiembeneŋ?”
20Mupie jazawec, “Mamanasiŋ gogoroŋ‐ŋeŋicte. No jâmbomac ŋazape, mamanasiŋ fârine piicne mac, ʒocʒu hândâŋ iŋucne, foŋarehame tiki kecʒi ‘Ŋerârierâ kecocna rac’ âzâcnepie ŋerârieocmu. Ŋoŋe wiac mocte moc mi eipieniŋmu.
21Demoŋ iŋucne jaŋe ine wiac moczi mâcne, mâc nunumuzi â sowa jujuzi jâpec‐jopazo.”
22Eme juku motecfâcne jaŋe Galilaia mâreŋko erao heâckepie Jesuzi ʒiŋuc jazawec: “Jupene mi ʒoraha Ŋic Fâri Wâtuŋne e ŋic jaŋere meo feme
23qâhâmopie ʒoaŋ gie bapa jahec â moc eha fahareocmu.” Iŋuc mume motec jaŋe manarâ bujeŋic hâhâtâwewec.
24Eme Kafanaum haeo risiehapie taha ufuŋte takesi 10 toea rohuc jumbiŋ ŋic i jaŋe Petoro wiocne mumbiŋ, “Qaqazu‐ŋeŋiczi taha ufuŋte takesi 10 toea râeekac me?”
25Eme Petorozi muwec, “Ea, râeekac.” Iŋuc murâ Jesure ficko ferâ dâŋ mi âzâcnehame e jahac indiŋkerâ muwec, “Simoŋ go weniŋuc mukomec? Mâreŋ ŋicwofuŋ jaŋe weni jaŋeraonec takesi roeŋgopieŋ, wiacfâc‐jeŋic jaŋeraonec me omane jaŋeraonec?”
26Eme, “Omane jaŋeraonec,” iŋuc mume Jesuzi âzâcnewec, “Sâcne mukic, eme irec hâcne naru motec jaŋe mâc juniŋmu.
27Eme jaŋe nâŋâcnere manapie sâqorezacte riqicko rarâ hawic behetec hume qowi moc bâbâni kiocmu e fâretec wefume micne bâindaŋnerâ 20 toea bâfuacmu i rorâ nâhâcne biŋe qarâ jarezemec.”
