1Ʒoaŋ ira motec jaŋe Jesurao rarâ ʒiŋuc muhuc wiocnembiŋ: “Sambâŋte uucmaŋko mozi micne sâko erâ jukac?”
2Iŋuc mupie Jesuzi motec piticne moc ecneme wareme ŋondeŋ‐jeŋicko râewec,
3ehuc muwec, “No jâmbomac ŋazape: Ŋoŋe maŋŋeŋic bawaharâ naru motec jaŋere sâcko mi juniŋmu, ine sambâŋte uucmaŋko mi raʒi‐jâmbâŋkeniŋmu.
4Moc e motec kecʒiŋucne erâ rumehuc gâcne jaŋere wahakicne juocmu, e ine sambâŋte uucmaŋko micne barâ juocmu.
5Eme ŋic moc e nore erâ motec kecʒiŋucne moc mamac rau ecneocmu e no mamac rau enareocmu.
6“Moc e biŋefâc‐nane piicne jaŋeraonec mocjaha mac sâqoreocte suru jâiŋ ecneocmu, e buse sâko upenao qonaŋkerâ hâwec ʒâkâŋko sârockepie hume muzac, izi wiac aafecne fuacnekac ezac.
7Oi, sâqocnere suru jâiŋ bâbâfua, i wiac hâhâwicne jâmbâŋ. Sâqocnere suru jâiŋ fufua i fuaocmu, wemocko mâc foocmu. Â ŋic moc sâqocnere suru jâiŋ bâfuaocmu, e ine wemo ecnezo? Oi, e wiac hâhâwicne jâmbâŋ ecnezo.
8Irec megezi me kikegezi sâqocne hotâckezo eme hetâcne behec ezemec. Juju sanaŋko fisicmurâ sifu puriŋ erâ juzemec. Me kikehec sahac furu juku ʒocsanaŋko huzicte iŋuc hâcne ezemec.
9Me ʒâŋegezi sâqocne hotâckezo eme riporâ behezemec. Juju sanaŋko fisicmurâ sifu ʒâŋe hâhâpo juzemec. Ʒâŋe furu juku ʒocsanaŋko huzicte iŋuc hâcne ezemec.
10“Ŋoŋe aimuŋ ehuc piticnefâc‐nane jaŋere manapie wawahane mi ezejec. No irec ŋazape mananiŋ: Aŋelofâc‐jeŋic sambâŋko juŋgopieŋ jaŋe sambâŋ Mamac‐nanere ʒâŋe maio fuahuc jueŋgopieŋ.
11Ŋic Fâri Wâtuŋnezi qac qâsoric ekicne basac‐jopaku bâfuac‐jopazore wahawec.
12Me ŋoŋe weniŋuc muŋgopieŋ? Ŋic moc lamafâc‐ticne 100 jaŋeraonec mocjahazi qâsorieme beheocmu? Me 99 jaŋe râec‐joparâ kâteo rarâ qâsoriekicne basaocmu?
13No jâmbomac ŋazape, e basa‐jâmbâŋkeocmu. Basaku bâfuarâ 99 jaŋere mâcne, sifuckekicne ere bubiaŋ manaocmu.
14Eme piticnefâc‐nane jaŋeraonec iŋuc jaha moczi moc mi sipirickeocte sambâŋ Mamac‐ŋeŋiczi muekac.
15“Âgoge moczi gorao bahac bâfuame go ra bucko mu tutuc ecnezemec. Eme e dâŋge mana urueme manatec tarame mocwâc âgo egareocmu.
16Â dâŋge qikiŋneme ŋic mocjaha me jajahec rocjofatec jahe fuŋne‐ticne mâmâc manahuc mu bâtiŋ ecnenʒepieŋ.
17Eme dâŋwirec‐ŋeŋic qikiŋneme kikefuŋte meo râenʒepieŋ. Kikefuŋte dâŋ iŋuc jaha qikiŋneme manacnetec ŋic qâpuc â takesi roro jaŋere sâc ezejec.
18No jâmbomac ŋazape: Ŋoŋe mâreŋko niniŋgiŋ gie bapie sambâŋko wâc fârio qaocmu, â mâreŋko gogoroŋ gie bapie sambâŋko wâc fârio qaocmu.
19Erâ moc ʒuhuckerâ mupe mananiŋ: Ŋoŋeraonec jajaheczi wiac mocte maŋjekic bâturepire mocjaha eme numupire sambâŋ Mamac‐nanezi mana‐jacteocmu.
20Ŋic jajahec me jahec â moc nore erâ tumaŋnepie no ŋondeŋ‐jeŋicko jupemu.”
21Jesuzi dâŋ iŋuc mume Petorizo indiŋkerâ muwec, “Wofuŋ, âgo‐nane moczi sâqocne enareme kiŋticne arecne wezimuc behecnezepac? Arecne 7 behecnepe sâckeocmu me?”
22Wiocneme Jesuzi muwec, “7 mâcne, 70 guru 7 behecne rahuc juzo.
23Irec sambâŋte miti hata ine ŋicwofuŋ moczi wiac ewec ira sâc hehuc mupe mananiŋ: Ŋicwofuŋ moczi kiŋaŋ ŋicfâc‐ticne tofa‐ticne bazucneniŋte hefârec‐jopawec.
24Eme moc jowa warembiŋ erao tofa‐ticne fowec ine 20 tauseŋ kina.
25E tofa sâko i bazucneocte moneŋ basame ŋicwofuŋ e ŋic e jahacne â ŋokac motecfâcne â hae qowi â mafa wiac‐ticne ŋic jaŋe furine ropie e jahacne eocte muwec.
26Iŋuc mume kiŋaŋŋic e ŋicwofuŋte maŋfuŋko fodaperâ kecʒiŋuc muhuc wâsickewec: ‘Ŋicwofuŋ‐nane go akicnutec no uneŋko moneŋ furu jaha bazu‐garepemu.’
27Mu wâsic ecneme ŋicwofuŋ e bune sâqoreme akickerâ tofa sâko behecnewec.
28Iŋuc ecneme fickonec waha rarâ kiŋaŋŋic âgo‐ticne moc bâfuawec, erao tofa‐ticne 10 kina fowec. E hâcne bâfuarâ qa tuŋtuŋ ecnehuc muwec, ‘Tofa‐nane ʒiŋuczia bazu‐narec.’
29Eme âgo‐ticne maŋfuŋnao fodaperâ ʒiŋuc muhuc wâsickewec: ‘Go akicnutec no uneŋko tofa bazu‐garepemu.’
30Wâsickeme dâŋticne mi mamana ra mume âgo‐ticne ʒiŋuc muhuc kâpâcwâru ficko râembiŋ: ‘Tofa bazucne‐fârerâ wahacmu.’
31Eme âgofâc‐ticne jaŋe i hone manac erâ bujeŋic wefume ra ŋicwofuŋ dâŋ binaŋ ecne‐fârembiŋ.
32Eme eki manarâ kiŋaŋŋic e mocwâc hefârerâ ʒiŋuc âzâcnewec: ‘Ŋic râŋgeŋ qaŋqaŋne go, wâsicnutec gore bunane sâqoreme tofa sâko‐nane qikiŋne‐garepac.
33Eme no akicgupac iŋuc jaha go âgogere buge sâqoreme akickenʒaŋ me.’
34Iŋuc murâ kimbeŋ sokawec qarâ momori jaŋerao râerâ muwec, ‘Ŋoŋe wiac qacne gâpâcne ecne fehuc juhapie tofa sâko‐nane bazu‐nare‐fâreme behenʒepieŋ.’
35Ŋoŋe buafec jaha kiŋ bebehec mi epie sambâŋ Mamac‐nanezi wiac ŋemâcne jaha eŋareocmu.”
