1Herode ŋicwofuŋ juhame Jesu e Betelehem haeo Judaia mâreŋko fuawec. Eme dameŋ ira ʒoaŋ wewefuopec mâreŋ mockonec mamana ŋicbomboŋ Jerusalem haeo fisirâ mu wioc ehuc mumbiŋ,
2“Judaŋic ŋoŋere ŋicwofuŋ geune fuawec e hae wena jukac? Nâŋe ocna mâreŋ‐nâŋecko bâpiŋ‐ticne honerâ dapecnehuc taha bacnenaŋte wareŋgopeneŋ.”
3Iŋuc mupie ŋicwofuŋ Herode â Jerusalem hae rune jaŋe mâmâc manarâ fâfârembiŋ.
4Eme Herodezi taha bapa micne â miti qaqazu hetumaŋ‐joparâ, Kristo e hae wena fuaocte mukicne muhuc esâic‐jopame
5kecʒiŋuc âzâcnembiŋ: “Betelehem haeo Judaia mâreŋko. Irec hâcne porofete moczi kecʒiŋuc qâreŋkewec:
6Betelehem hae Judaia mâreŋko, go Judaiare hae qizec wawahane mâcne. Gorao hâcne micne sâko moc fuarâ Israe ŋicfâc‐nane gume jowac ejarezokac.”
7Dâŋ i mupie manarâ Herodezi mamana ŋicbomboŋ soŋsoŋko hefârec‐joparâ bâpiŋ fuawec irec dameŋte aimuŋ jaha wio‐jareme âzâcnepie
8manarâ Betelehem haeo raniŋte sorec‐jopahuc muwec, “Ŋoŋe ra ʒoɋac erâ mu basac eku motec bâfuarâ ware nazapie no iŋuc jaha rarâ dapecnehuc taha bacnezepac.”
9Ŋicwofuŋzi iŋuc jazame rambiŋ. Ehame ocna mâreŋ‐jeŋicko bâpiŋ honembiŋ izi bânie‐jarehuc raku motec fowec fic irec faicnao sanaŋkerâ ŋewec.
10Eme jaŋe bâpiŋ honerâ mu ʒeri mâretec embiŋ.
11Erâ ficko ferâ motec â neŋgoc‐ticne Maria honec‐jofarâ dieŋzi hecnehuc taha bacnembiŋ, ehuc mafa katapa‐jeŋickonec gol â wiac âsu biaŋ furi sâko rorâ râcnembiŋ.
12Eme Wofuŋzi guŋko qatara‐jareme jaŋe Heroderao mi risiehuc hata mocko raku mâreŋ‐jeŋicko fisimbiŋ.
13Jaŋe risierâ rahapie Wofuŋte aŋelo moczi Josefe guŋko fuacnerâ ʒiŋuc âzâcnewec: “Go fahare neŋgoc motec rocjofatec Aigita mâreŋko wiserâ ra nore dâŋte woŋec junʒepieŋ. Manakic, Herode e motec basaku bâfuarâ qaocte mukac.”
14Mume Josefezi faharerâ neŋgoc motec rocjofame ŋafeoa Aigita mâreŋko wiserâ rambiŋ.
15Eme ira juhapie Herode hâmowec. Wiac iŋuc fuame porofete moczi Wofuŋte micte dâŋ kecʒiŋuc muwec i sanaŋkewec: “Ŋokâ‐nane Aigita mâreŋko juha wiracnepe risiewec.”
16Mamana ŋicbomboŋ jaŋe Herode eatuckerâ rapie fuŋne manarâ aaric sâqocne manawec. Ehuc momori sorec‐jopame jaŋe ra Betelehem hae sâko â rârec rârec hae piic piic irec motec jara‐jeŋic jajahec me juwicnao jaŋe jopa‐fârembiŋ. I mamana ŋicbomboŋ jaŋere mickonec ʒâfo manawec irec sâcko ewec.
17Eme dameŋ ira porofete Jeremia dâŋ kecʒiŋuc muwec i sanaŋkewec:
18“Rama haeo ojowa fuakac, ki uu â mu mamakuc sâko. Rahezi ɋiefâcne jaŋere kiome bâmiriŋkeniŋte eipieŋgopieŋ. Wiac omae‐fârembiŋ hâcne.”
19Herode e hâmome Wofuŋte aŋelo moczi Josefe Aigita mâreŋko mi guŋ qâhâŋ ecnehuc ʒiŋuc âzâcnezejec i:
20“Go ʒawierâ neŋgoc motec rocjofatec Israe mâreŋko risieniŋ. Motec qâhâmozo mumbiŋ jaŋe hâmombiŋ.”
21Eme Josefezi neŋgoc motec rocjofame Israe mâreŋko risiembiŋ.
22Risierâ Josefezi dâŋ kecʒiŋuc manawec: Akelao e mamac‐ticne Herode ere tuc qarâ Judaia mâreŋte ŋicwofuŋ ewec jukac. Dâŋ iŋuc manarâ ira ra juocte hâwickewec. Erâ guŋko dâŋ manarâ Galilaia mâreŋko rawec.
23Erâ hae moc ʒâŋene Nazarete ira ra juwec. Eme porofete jaŋere dâŋ kecʒiŋuc fokac i fideteŋ ewec: “Ʒâŋe‐ticne Nazarete ŋic muniŋmu.”
