1Eme Mârozi Jesu mâreŋ tuhuo jowa rawec, Sataŋzi esâickezejec muhuc.
2Eme Jesu e ira ŋafe ʒoaŋ 40 nânâ sowa juku nânâre hâmowec.
3Ehame Eesâic Runezi erao fuarâ âzâcne muwec, “Go Anuture Ŋokâ jukomecko mutec qânâ ʒizi poroŋ eoc me.”
4Mume Jesuzi âzâcnewec, “Dâŋqâreŋ kecʒiŋuc fokac: ‘Ŋiczi nânâre sawa mi juhâmoocmu, Anuture mickonec dâŋ wahaekac sâc manahuc juhâmoocmu’.”
5Mume Sataŋzi Jesu miti hae qizecko jowa rarâ taha ufuŋte bupu faio râewec.
6Erâ ʒiŋuc âzâcnewec: “Go Anuture Ŋokâ jukomecko ʒirec tara huc, ehuc dâŋqâreŋ moc ʒiŋuc fokac i manasuc: ‘E aŋelofâc‐ticne jaŋere meo râecguocmu’, â moc ʒiŋuc: ‘Jaŋe meo bahucgupie qânâzi kikege mi heocmu’.”
7Mume Jesuzi kecʒiŋuc muwec: “Erâ dâŋqâreŋ moc ʒiŋuc fokac: Wofuŋ Anutu penaroŋ ecnehuc mi esâickezo.”
8Mume Sataŋzi tiki ʒoricne ʒora mocko jowa ferâ domahuc mâreŋ sâc ŋic gurune gurune â aŋac fuŋne fuŋne sâko jâutuwec.
9Ehuc ʒiŋuc âzâcnewec: “Dieŋzi herâ numu‐naretec wiac i sasawa garepemu.”
10Eme Jesuzi dâŋ ʒiŋuc bâtikiecnewec: “Sataŋ go behecnurâ rac. Dâŋqâreŋ kecʒiŋuc fokac: ‘Wofuŋ Anutuge dieŋzi herâ numucnezo, â e mocjaha kiŋaŋ qacnezo’.”
11Iŋuc mume Sataŋzi beherâ rawec. Ehame aŋelo jaŋe fisirâ kime dopec ecnembiŋ.
12Johane kâpâcwâru ficko râepie ŋehame Jesuzi irec biŋe manarâ Galilaia mâreŋko rawec.
13Ehuc Nazarete hae beherâ Kafanaum haeo ŋeŋe juju ewec. Hae i riqicmecko, Sebuloŋ â Naftali mâreŋko ŋewec.
14Iŋuc eme porofete Jesaja ere dâŋ moc ʒiŋuc fokac i sanaŋkewec:
15“Sebuloŋ â Naftali mâreŋ, riqickopec, Jordaŋ ocniŋuc fokac, Galilaia, qâpuc jaŋere juju.
16Ŋicguru dapâcko ŋeŋene jaŋe ʒocsâko honeŋgopieŋ, hâmo qanʒaraŋ mâreŋko ŋeŋene jaŋe tatamac fua‐jarekac.”
17Dameŋ ira Jesuzi miti muhuc ŋic ʒiŋuc fuŋkerâ jazawec: “Sambâŋte uucmaŋ maic‐ŋopakacte maŋŋeŋic bârisieniŋ.”
18Eme ʒoaŋ mocko Jesu e Galilaia riqic irec moŋgeŋko rac warec ehuc ŋic jajahec hahac ɋa honec‐jofawec, moc Simoŋ, ʒâŋe‐ticne moc Petoro, erâ ɋaticne Anderea. Jahe riqicko wasaŋ‐jekic behehuc domapic, qowi gie bapa ŋic jupic hâcne.
19Eme honec‐jofarâ jasa muwec, “Ware no bâjâpecnunic, eme ŋicko gie bapa bacŋofapemu.”
20Mume izia wasaŋ‐jekic beherâ bâjâpepic.
21Eme ipec rarâ ŋic hahac ɋa jaha wâc bâfuac‐jofawec, Jakobo â ɋaticne Johane, jahe Ʒebedaiore ŋokâ jahec, mamac‐jekic Ʒebedaiohec wokeo ŋehuc wasaŋ he bâpiaŋ embiŋ.
22Eme Jesuzi hefârec‐jofame woke â mamac behec‐jofarâ bâjâpepic.
23Eme Jesu e Galilaia mâreŋ râreckehuc mitific sâc ferâ uucmaŋte Biŋebiaŋ jazawec â ŋic huc ʒâic‐jeŋichec ɋiɋicne bacjopawec.
24Iŋuc eme biŋe‐ticne Siria mâreŋko haŋ bafâreme manarâ ŋic huc ʒâichec â demoŋhec â hâmo ɋârecne â ʒeke puriŋ erao amec‐jopa rapie bâpiaŋ‐jopa‐fârewec.
25Eme Galilaia mâreŋkonec â hae 10 ŋerawec irecnec â Jerusalem haeonec â Judaia mâreŋkonec â Jordaŋ ʒiŋuc ocniŋuc ŋicguru sokawec jâmbâŋ qâturerâ bâjâpembiŋ.
