1“Sambâŋte miti hata i gie rune moczi waiŋ gie‐ticnere erâ gieŋic rocjopaocte rawec irec sâc.
2Erâ gâcne rocjoparâ gie bapa mocjahare furine 50 toea mufua‐jareme manapie sâckeme gie‐ticnao sorec‐jopame rambiŋ.
3Eme 9 kilok ehame mocwâc rarâ ŋic gâcne hae ʒoŋao mâc ŋe domac epie honec‐joparâ
4ʒiŋuc jazawec: ‘Waiŋ gie‐nane fokac, ra bapie furine sâcne ŋarepemu.’ Mume manarâ waiŋ gie‐ticnao rambiŋ.
5Eme 12 kilok erâ wâc 3 kilok ehame rarâ iŋuc jaha rocjopawec.
6Eme 5 kilok ehame mocwâc rarâ ŋic gâcne gie tâmiric mâc juhapie bâfuac‐joparâ jazawec, ‘Ŋoŋe wemocte ʒoaŋ ʒora qâoma ehuc juhapie hae owâekac?’
7Jaŋe mumbiŋ, ‘Ŋâŋe gie moc mi munârekicne.’ Mupie jaza sorec erâ muwec, ‘Waiŋ gie‐nane fokac ra baniŋ.’
8Gie runezi iŋuc eha ŋafeme soŋaŋ âzâcne muwec, ‘Go gie bapa ŋic hefârec‐joparâ moneŋ jarec, ehuc ʒâhec fisimbieŋ jaŋeraonec fuŋkerâ jare raku bâbâni fisimbieŋ jaŋerao jare tarazemec.’
9Eme ʒâhec fisimbiŋ jaŋe ejareme warepie 50 toea, 50 toea jare‐fârewec.
10Jareme bâbâni jaŋe honerâ furine bafehuc nâreocmu muhapie soŋaŋzi 50 toea jaha jarewec.
11Iŋuc rorâ gie rune kâroŋ qacnembiŋ,
12ehuc mumbiŋ, ‘Ʒâhec fisimbieŋ gie mâc âruckembieŋ, â nâŋe ine ʒoaŋ bâroŋ gieo ʒâic fâro manahuc domahapene ŋafejec, ehame wemocte ʒâhec jaŋehec sâc mocjaha nârekic?’
13Iŋuc mupie gie runezi jaŋeraonec moc ʒiŋuc âzâcnewec: ‘Âgo, no mi bâsâqore‐garekopac, go 50 toeare gazape manatec sâckejec i.
14Irec moneŋge rorâ rac. No ʒâhec fisimbieŋ jaŋe gohec sâc mocjaha jarepemurâ manape sâckejec.
15No nahacne wiaczi iŋuc me iŋuc me iŋuc ezo murâ sâcne mi epemu me? Go buafec‐nanere erâ iiŋguuŋ ejarekomec me?’
16Irec hâcne ʒâheczi micne eniŋmu â micnezi ʒâhec eniŋmu.”
17Eme Jesu e Jerusalem haeo feocte motecfâcne 12 jaŋe sawa rocjopame jaŋackoaŋ rambiŋ. Hatao rahuctecne kecʒiŋuc jazawec:
18“Manaŋgopieŋ, nâŋâc Jerusalem haeo feŋgopeneŋ. Eme Ŋic Fâri Wâtuŋne e taha bapa micne â miti qaqazu jaŋere meo feme jaŋe hâmoocte mucnerâ
19qâpuc jaŋerao râepie jaŋe ima bâroŋ baku maripoŋko qapie hâmoocmu. Eme ʒoaŋ gie bapa jahec â moc eha fahareocmu.”
20Dameŋ ira Ʒebedaio ŋonâŋ‐ticnezi ŋokâ jahec‐ticne Jesure maŋfuŋko bacjofa rarâ fodapehuc wiac mocte numucnewec.
21Eme wiocnerâ muwec, “Go wemo wiacte egarekac?” Eme eki muwec, “Go mutec ŋokâ jahec‐nane Wofuŋ sâko fua tâcnezokic dameŋ ira gâjoŋgao ŋifec â ŋifec ŋezepirec.”
22Mume Jesuzi âzâcnewec, “Ŋoŋe fuŋne kâuc bahuc iŋuc muŋgopieŋ. Noni opâ ʒaʒacne nâpemu i ŋohe sâcne nânicmu me?” Eme jahe mupic, “Ea, sâcne nanacmu.”
23Mupire jasawec, “Opâ ʒaʒacne nânâ i nânicmu, â gâjoŋ‐naneo ŋeŋe irec dâŋ mumu ine norao mi fokac, Mamac‐nanezi mujarewec i jaŋe ŋeŋe ira ŋeniŋmu.”
24Eme motec 10 jaŋe dâŋ i manarâ âgo jahec‐jeŋic jahere mana sâqorembiŋ.
25Eme Jesuzi hefârec‐joparâ ʒiŋuc jazawec: “Mâreŋ ŋicwofuŋ jaŋe ŋic rauc‐jopahuc kiŋaŋ qaqafâc‐jeŋic bacjopaeŋgopieŋ, â fekicne jaŋe omane qâhuc‐joparâ ŋicbomboŋ ejareeŋgopieŋ, i manaeŋgopieŋ.
26Ŋoŋe ine iŋuc mi enʒepieŋ. Ŋoŋeraonec moczi fekicne ezo murâ gâcne ŋoŋere wahamicne erâ juzejec.
27Â micne ezo murâ gâcne ŋoŋere kiŋaŋ qaqa erâ juzejec.
28Ŋic Fâri Wâtuŋne e iŋuc jaha ŋoŋe kiŋaŋ qacneniŋte mâcne, e jahac kiŋaŋ qaqa gie bahuc ŋic bocjaha kiwiric‐jeŋic rorâ juju‐ticne qikiŋneocte wahawec.”
29Jesu motecfâc jaŋe Jeriko hae fotâcnerâ rapie ŋic hâmbâŋ sâkozi bâjâpec‐jopambiŋ.
30Ehame ŋic tiŋtuŋ jajahec hatamecko ŋehuc, Jesu ware rakac, mupie manarâ ʒocnehec wirahuc mupic, “Wofuŋ, go Dawidire ɋâriczi nâhere mac buge sâqoreoc.”
31Boc wirapire ŋic jaŋe hecke‐jactehuc mu hâhâwic ejactembiŋ. Eme jahe mana‐bipiehuc fotarierâ wirahuc mupic, “Wofuŋ, go Dawidire ɋâriczi nâhere mac buge sâqoreoc.”
32Eme Jesu e hatao domahuc ejacteme warepire wio‐jacterâ muwec, “Weniŋuc eŋactepere mukopirec?”
33Mume kecʒiŋuc âzâcnepic: “Wofuŋ, ʒâŋe fifi bacnâfocmurâ mukoperec.”
34Mupire Jesuzi bune sâqoreme ʒâŋe‐jekic bâuame izia ʒâŋe fipic. Erâ Jesu bâjâpepic.
