1Eme Jesuzi wokeo ferâ riqic mocwâc fotâcne warerâ e jahacne haeo fisiwec.
2Fisime ŋic ʒeke puriŋ moc kanʒeo reŋke warembiŋ. Eme Jesuzi mamanasiŋ‐jeŋicte fuŋne honerâ ʒeke puriŋ ʒiŋuc âzâcnewec: “Motec‐nane, mi hâwicguoc, sâqocnege mutâmire‐garekicne.”
3Iŋuc mume miti qaqazu gâcne maŋjeŋiczi kecʒiŋuc manasumbiŋ: “E Anutu âkehockekac.”
4Eme Jesuzi maŋjeŋic hone tararâ ʒiŋuc jazawec: “Maŋŋeŋiczi wemocte dâŋ sâqocne manasuŋgopieŋ?
5Wenimoizi afecne, ŋic ʒeke puriŋ ʒiŋuc âzâcnezo: ‘Sâqocnege mutâmire‐garekicne,’ me ʒiŋuc âzâcnezo: ‘Fofoge hâporâ rac!’
6Ŋic Fâri Wâtuŋne e mâreŋko sâqocne bâbâtâmire gie baocte tâpiri focnekac irec fuŋne hone taraniŋ.” Iŋuc murâ ʒeke puriŋ ʒiŋuc âzâcnewec: “Fahare fofoge ameckerâ haegao rac.”
7Mume ŋic e faharerâ hae‐ticnao rawec.
8Eme ŋic guru sâko jaŋe i honerâ weaŋkerâ Anutu e tâpiri iŋucne ŋicmeo râewecte muteŋkembiŋ.
9Eme Jesu e irecnec raku takesi roro ŋic moc ʒâŋene Mataio e moneŋfic‐ticnao ŋehame honerâ âzâcne muwec, “Go ware bâjâpecnuc.” Âzâcneme faharerâ bâjâpewec.
10Eme e Jesu ficticnao nânâ nâocte hefâreme feme takesi roro â sâqocne bapa bocjaha fisirâ Jesu â motecfâcne jaŋehec nânâ mâmâc nâmbiŋ.
11Iŋuc epie honec‐joparâ farisaio jaŋe motecfâcne ʒiŋuc jazambiŋ: “Qaqazu‐ŋeŋic e wemocte takesi roro â sâqocne bapa jaŋehec mâmâc ŋehuc nânâ nakac?”
12Dâŋ i Jesuzi manarâ jazawec, “Dokta e ɋiɋicne jaŋerao gie mi baekac, huchec jaŋerao baekac.
13Ŋoŋe ine rarâ dâŋ kecʒiŋuc fokac irec fuŋne mana‐hâmonʒepieŋ: ‘No tiwâ bâzi ririkere mâcne, jauŋte enareekac.’ No ine tiŋne hefârec‐jopazore aricne, sâqocne bapa hefârec‐jopazore wahapo.”
14Dameŋ ira Johanere motecfâc jaŋe Jesurao fisirâ ʒiŋuc muhuc wiocnembiŋ: “Nâŋe â farisaio dameŋ sâc nânâ sowa jueŋgopeneŋ, â gore motecfâc jaŋe ine wemocte sowa tâmiric jueŋgopieŋ?”
15Mupie jazawec, “Ŋicwofuŋ e kikefuŋfâc‐ticne jaŋehec juhame weniŋuc busâqoc erâ sowa juniŋmu? Juku ŋicwofuŋ jowac ropie ine sowa juniŋmu.
16Mozi ŋaqi raŋɋanao qoruc ɋâricnezi ɋâtâocmu? Aricne, ɋâricnezi raŋɋane fâreme boc sucke tâc ezacte iŋuc mi eeŋgopieŋ.
17Me mozi waiŋ ɋâricne ʒopo raŋɋanao qoŋgiŋkeme huocmu? Aricne, waiŋ ɋâricnezi ʒopo raŋɋane âte fâuckeme waiŋ mecne ʒopo mecne sipirickezacte iŋuc mi eeŋgopieŋ. Waiŋ ɋâricnezi ʒopo ɋâricnao hume aakic enicmu.”
18Jesu e dâŋ i jazahuc domahame mitire micne moczi erao warerâ maŋfuŋ‐ticnao fodaperâ muwec, “Otâ‐nane miŋecne hâmokac, go jowacgupe ra bâuac, eme ɋâreocmu.”
19Iŋuc âzâcnerâ rame Jesu e faharerâ motecfâcne jaŋehec bâjâperâ rambiŋ.
20Rahapie ŋokac moc, soc rohuc juhame jara 12 ewec, eki mi Jesu râpefuŋnao ra ŋaqi‐ticne bâuazejec i.
21Ehuc maŋnezi ʒiŋuc manasuwec: “Ŋaqi‐ticne sawa bâuarâ biaŋnuocmu.”
22Eme Jesuzi fotikierâ erao ʒâŋe fihuc muwec, “Otâ‐mae, mi hâwicguoc, mamanasiŋgere biaŋgukac.” Mume izia ŋokac biaŋkewec.
23Eme Jesu e raku soŋaŋte ficko ferâ ki soŋgâŋ fânâŋ manawec.
24Manarâ jazawec, “Ŋoŋe hufâreniŋ, naru e mi hâmojec, e mâc guŋ fokac.” Mume gâwiecnembiŋ.
25Eme ejareme hufârepie qâŋɋâŋ fowecko raʒirâ naru menao rome faharewec.
26Eme irec biŋezi mâreŋ ira qareŋko rafârewec.
27Eme Jesu e mâreŋ i beherâ rahame ŋic ʒâŋe tiŋtuŋ jajaheczi bâjâpehuc wiwic jaha wiracnerâ mupic, “Go Dawidire ɋâriczi nâhere buge sâqoreoc.”
28Eme raku ficko feme maŋfuŋnao rapire indiŋ‐jofarâ muwec, “Ʒâŋe‐ŋekic bâpiaŋkepere tâpiri fonarekac i mana ʒakiekopirec me?” Eme jahe mupic, “Ea, Wofuŋ, mana ʒakiekoperec.”
29Iŋuc mupire ʒâŋe‐jekic bâuahuc muwec, “Mamanasiŋ‐ŋekicte fârine fua‐ŋacteoc.”
30Mume ʒâŋe fitâcnepic. Eme Jesuzi mic muac ejactehuc ʒiŋuc jasawec: “Manakopirec, ŋohe irec biŋe ŋic moc mi jazapire mananʒepieŋ.”
31Eme jahe dâŋ i mana‐bipiehuc rarâ biŋe‐ticne mupire mâreŋ fotâcne qâqâwiric rawec.
32Eme jahe raha rahapire biac ŋic moc Jesurao barembiŋ. E demoŋ moczi ecneme nâŋguŋ ewec.
33Eme demoŋ jâpecneme ŋic e dâŋ dâŋ ewec. Eme ŋic guru sâko fombiŋ jaŋe wareckerâ mumbiŋ, “Israe mâreŋko mârâc jaha wiac iŋucne moc mi fuame hone jumbeneŋ.”
34Farisaio jaŋe ine Jesure ʒiŋuc mumbiŋ: “Demoŋ jaŋere fekicnezi bafickeme demoŋ jâpe‐jareekac.”
35Eme Jesu e iŋuc hâcne ehuc hae kâcɋene piticne mâmâc jufârewec. Ehuc mitificne ficne miti qazu‐jarehuc uucmaŋte Biŋebiaŋ jazahuc juwec â huc wic ʒâic‐jeŋichec bâmâteŋ‐jopa‐fârewec.
36Eme ŋic guru sâko honec‐joparâ jaŋere bune sâqorewec. Jaŋe lama soŋaŋ tâmiric juhuc qac qâsoric erâ qarâ suriŋne jueŋgopieŋ iŋuc tinac jumbiŋ hâcne.
37Eme irec motecfâc‐ticne kecʒiŋuc jazawec: “Qa roro giezi kâcɋene, gie bapa ŋiczi ine afecne.
38Irec ŋoŋe gie rune numucnepie gie bapa ŋic bâfuac‐jopame gie‐ticnao ranʒepieŋ.”
