Mataio 6

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹“Ŋoŋe miti babaju i mâc ŋic mumuteŋte manasuhuc mi bajunʒepieŋ. Iŋuc moc epie sambâŋ Mamac‐ŋeŋiczi mi suanʒeŋ‐ŋopaocmu.

²Irec go ŋic bâmec bajarehuc gâcnezi hone manac egareniŋte qeŋ mi qazemec. Mitiŋic burec burec jaŋe hâcne mitificko â tomao ŋic bâmec bajareeŋgopieŋ, gâcnezi honec‐joparâ muafec‐jopaniŋte. No jâmbomac ŋazape: Jaŋe furi‐jeŋic biac ropie tarakac.

³Mâcne, go bâmec bajarehuc mefâregezi wiac ecmu i qanazi mi manazejec.

⁴Iŋuc etecne bâmec eehâmoge soŋsoŋko fogareocmu. Eme Mamacge wiac soŋsoŋko hone manac eekaczi okacne bazu‐gareocmu.

⁵“Ŋoŋe bucko numuniŋte mitiŋic racne jaŋe iŋucne mi enʒepieŋ. Jaŋe mitificko â tomao numuniŋte boc ejareekac, ine ŋiczi hone warec ejareniŋte iŋuc eeŋgopieŋ. No jâmbomac ŋazape, hone warec ejarepie izi furi‐jeŋic eme tarakac.

⁶Go numuzo murâ ficgao ferâ motâc herâ Mamacge soŋsoŋko juekac erao numuzemec. Eme Mamacge soŋsoŋko wiac hone manac eekaczi fârine bâfua‐gareocmu.

⁷Ŋoŋe nunumu mâc miczi mu raʒic wefuc ehuc mi munʒepieŋ. I miti tâmiric jaŋere mâsi. Jaŋe hâcne dâŋ bocjaha wose rakupene mana‐nâreocmu mueŋgopieŋ.

⁸Irec ŋoŋe jaŋe iŋucne mi enʒepieŋ. Mamac‐ŋeŋic e mi numucnehapie wiac basaeŋgopieŋ i biac manaekac.

⁹Irec ŋoŋe kecʒiŋuc muhuc numunʒepieŋ: ‘Sambâŋ Mamac‐nâŋec, gore ʒâŋe tiri fozejec.

¹⁰Ware maŋ sâc mâreŋ sâc Wofuŋ enârec. Sambâŋko gore micrereŋ fokac, iŋuc jaha mâreŋko nâŋerao fuazejec.

¹¹Go miŋecgac nânâ sâcnâŋec nârezemec.

¹²Kiŋtofa‐nâŋec behe‐nârec, nâŋe iŋuc jaha ŋic jaŋere kiŋtofa beheŋgopeneŋ.

¹³Eesâicko mi râec‐nâpozemec. Sâqocnaonec bâhoc‐nâpozemec.’

¹⁴Ŋoŋe ŋic jaŋere bahac behepie sambâŋ Mamac‐ŋeŋiczi ŋoŋere bahac iŋuc jaha beheocmu.

¹⁵Me ŋoŋe ŋic jaŋere bahac bajupie Mamac‐ŋeŋiczi ŋoŋere bahac iŋuc jaha bajuocmu.

¹⁶“Ŋoŋe sowa juhuc ʒâŋe mai‐ŋeŋic sorondoŋ mi ezejec. Mitiŋic racne jaŋe hâcne iŋuc ehuc ʒâŋe mai‐jeŋic fâsâeme jueŋgopieŋ, ŋic gâcne jaŋe sowa juju‐jeŋicte ʒâŋitac‐jopaniŋte. No jâmbomac ŋazape, jaŋe suanʒeŋ‐jeŋic biac ropie tarakac.

¹⁷Goki ine sowa juhuc qizecge tokic ruacnerâ ʒâŋe maige ʒurezemec.

¹⁸Eme ŋic jaŋe sowa jujuge mi ʒâŋitanʒepieŋ, Mamacge soŋsoŋ juekac e buc manazejec. Eme e soŋsoŋko wiac hone manac eekaczi okacne bazu‐gareocmu.

¹⁹“Ŋoŋe mâreŋte mafa, wâfu qoʒazaŋzi nânâne â ŋiczi fiuc rorone, i boc mi hurepie fezejec.

²⁰Ŋoŋe sambâŋte boreŋ ʒeŋaŋ, wâfu qoʒazaŋzi mi nânâne â ŋiczi fiuc mi rorone, i hurepie fezejec.

²¹Manakic, ʒeŋaŋge foocmu ijaha maŋge foocmu.

²²Sahacgere lambe ine ʒâŋege. Ʒâŋege biaŋne fohuc sahacge sâcne batamaecneocmu,

²³ʒâŋege sâqoreme ine sahacge tiŋtuŋ qaocmu. Â maŋgere tatamaczi dapâc eme, opo, dapâc mo iŋucne fua‐gareme tiŋtuŋ qahuc jucmu.

²⁴Motec mocjahazi ŋicbomboŋ jajahec jahere kiŋaŋ sâcne mi qaocmu. E moc âgo ecnehuc moc hone takireocmu, ehuc moctao qohotahuc moc râpeckeocmu. Ŋoŋe iŋuc jaha Anuture gie mecne â moneŋ mafa qâqâhâc sâko irec gie mecne sâckoa sâcne mi bacjofaniŋmu.

²⁵“Irec ŋazape mananiŋ: Ŋoŋe juju‐ŋeŋicte mana mezac ehuc ʒiŋuc boc mi munʒepieŋ: Wemo wiac ba nâc enaŋmu? Me sahac‐ŋeŋicte mu heŋɋâŋ ehuc ʒiŋuc boc mi munʒepieŋ: Wemo wiac rojunaŋmu? Ŋoŋe muniŋ, juju‐ŋeŋiczi fârine me nânâzi fârine? Sahac‐ŋeŋiczi fârine me ŋaqizi fârine?

²⁶Ŋoŋe sawao wipe honeniŋ, jaŋe he sarac me qa roro me nâ rowaŋ mi eeŋgopieŋ. Eme sambâŋ Mamac‐ŋeŋiczi sifu nânâ bâfua‐jareekac. Eme weniŋuc, ŋoŋe jaŋere wahamicne me?

²⁷Me ŋoŋe tâpiri‐ŋeŋic moc fokacko mu waiʒoc ehuc sahac‐ŋeŋic sâcne basanaŋkerâ dameŋ ŋondeŋ bembeŋne mac jufeniŋmu?

²⁸Iŋuc eene mi fokacko ine wemocte ŋaqi qoructe mana mezac boc eeŋgopieŋ? Ŋoŋe firindoac kâteo fuarâ domaekac, irec fuŋne mananʒapiŋ me. E ŋaqi qoruc‐ticnere gie mi baekac.

²⁹Eme irec ŋazape mananiŋ: Salomo e eri qaraweŋ‐ticneheczi hawari biaŋ iŋucne mi rojuwec.

³⁰Eme kâteo âri wiac dodocne, miŋecgac iŋuc fuaekac â tomâcko iŋuc mârâŋkeekac, i Anutuzi sifu mume hawari biaŋ fuaekac. Eme ŋoŋe ŋaqi qoruc sâcne mi bâfua‐ŋareocmu me, mamanasiŋ gogoroŋ ŋoŋe?

³¹Irec ŋoŋe mu mezac ehuc ʒiŋuc boc mi munʒepieŋ: ‘Wemo wiac ba nâc enaŋmu, wemo wiac rojunaŋmu?’

³²I qâpuc jaŋe hâcne maŋ mamanasu‐jeŋic ira duckepie foekac. Ŋoŋe wiac i tâmiric sâcne mi juniŋmu, i sambâŋ Mamac‐ŋeŋiczi manaekac.

³³Ŋoŋe ere sambâŋ miti â ere tiŋke biaŋ hata ira maŋ mamanasu‐ŋeŋic qanaŋ râepie fozejec, eme fainao wiac gâcne sasawa i wâc fua‐ŋareocmu.

³⁴Ŋoŋe tomâckore harac huacbuc mi enʒepieŋ. Tomâckore harac huacbuc i tomâckore biŋe. Ʒoaŋ gie bapa sâc ʒâic‐ticnezi jahacne biŋe fome sâckeocmu.