1Eme Jesuzi ŋic guru sâko hâcne honec‐joparâ tikio ferâ ŋehame motecfâcne maŋfuŋ‐ticnao rapie
2miti kecʒiŋuc muhuc jaza qazuc ewec:
3“Maŋjeŋicte manapie hapetac eekac jaŋere manape ʒerine ekac, jaŋe hâcne sambâŋte uucmaŋ rauckeŋgopieŋ.
4Ki busâqochec jueŋgopieŋ jaŋere manape ʒerine ekac, jaŋe hâcne bubiaŋ qajarezo.
5Maŋuruc jueŋgopieŋ jaŋere manape ʒerine ekac, jaŋe hâcne mâreŋ sâko mâreŋ hotâckeniŋmu.
6Biaŋkeniŋte nânâ opâre hâhâmo hâmoeŋgopieŋ jaŋere manape ʒerine ekac, jaŋe hâcne gapec‐jopaocmu.
7Aki uruc‐jeŋichec jaŋere manape ʒerine ekac, jaŋe hâcne Anutuzi aki uruc ejareocmu.
8Maŋ ɋaɋacne jueŋgopieŋ jaŋere manape ʒerine ekac, jaŋe hâcne Anutu honenʒoŋgopieŋ.
9Wamare guriŋne baeŋgopieŋ jaŋere manape ʒerine ekac, jaŋe hâcne Anuture naru motec mujarezo.
10Mitire erâ ʒika kâpâcwâru hotâckeeŋgopieŋ jaŋere manape ʒerine ekac, jaŋe hâcne sambâŋte uucmaŋzi ɋoroc‐jopaocmu.
11Nore qâqâiŋne sopec‐ŋopahuc ŋopa jâpec ehuc sâqocnere micko âkec eŋareniŋmu ŋoŋere manape ʒerine ekac.
12Ŋoŋe sambâŋko furi sâko roniŋmure bubiaŋ manahuc ʒerienʒepieŋ. Porofete mârâc jaha jumbiŋ jaŋe iŋuc jaha jopa jâpec ejarekicne.
13“Ŋoŋe ŋic jaŋere hâwec. Hâweczi sâqoreme izi wemo ezo? I mâc hae ʒoŋao hesiepie rame ŋic jaŋe kikezi âteniŋmu.
14Erâ ŋoŋe ŋic jaŋere lambe. Hae moc tiki taniŋko ŋeme wiac moczi mi sâockeocmu.
15Me lambe qazerâ kuʒizi mi hetutuckeeŋgopeneŋ, i ŋeŋenao hepene ŋeekac, ehuc ficmaŋko ŋec foc eniŋmu jaŋe tamae‐jare‐fâreekac.
16Irec ŋoŋere lambezi iŋuc jaha ŋic tamae‐jarezejec. Eme jaŋe juju bapa‐ŋeŋic honepie biaŋkeme sambâŋ Mamac‐ŋeŋic muteŋkenʒepieŋ.
17“Ŋoŋe sâcmutâc dâŋqâhâc â porofete jaŋere dâŋ qataraocte wahawec, nore iŋuc moc mupie. No qatarapere mâcne, reŋkepere fisipo.
18No jâmbomac ŋazape: Sambâŋ â mâreŋ fonicmu sâc sâcmutâc dâŋqâhâc iŋuc jaha fohuc juocmu, ehuc dâŋ uucne moc mâc foku mi omaeocmu, i fârinehec efâreocmu.
19Irec ŋic moczi sâcmutâc dâŋ piticne mac moc qâsuahuc gâcne ijaha eniŋte qafeŋ‐jopaocmu, e sambâŋte kikefuŋ guruo ŋic wawahane juocmu, â moczi ine reŋkehuc gâcne ijaha eniŋte qafeŋ jopaocmu, e sambâŋte kikefuŋ guruo ŋic fekicne juocmu.
20Irec ŋazape mananiŋ: Ŋoŋe miti qaqazu â farisaio jaŋere sâc mi jâuruhuc tiŋke biaŋ eniŋmuo sambâŋte kikefuŋ mi eniŋmu.
21“Mimiŋnefâc‐ŋeŋic dâŋ kecʒiŋuc jazakicne: ‘Go ʒika mi qazemec. Moc e ʒika qaocmu, e dâŋte biŋe ekac.’
22Noni ine ʒiŋuc ŋazakopac: Moc e âgo‐ticne aaric manacneocmu, e dâŋte biŋe ekac. Moc e âgo‐ticne mimiec mamakâc mucneocmu, e micne bapa tutumaŋte biŋe ekac. Moc e âgo‐ticne maric maŋgâpâc mucneocmu, e ʒochârâcte biŋe ekac.
23Irec go taha bâzi wiac alatao râezo ehuc ʒiŋuc manasucmu: Âgo‐nanehec fâfâuc‐nâhec fokac;
24iŋuc manasucmuo taha wiacge behetec foha rarâ âgogehec dâŋ mufâsâerâ ie risierâ taha wiacge alatao râezemec.
25Go kiare haeo mi fifisi hatao juhuc kisâgehec kiŋ bebehec ezepirec. Iŋuc mi etecne kisâgezi biac kiarao ra fuŋnege mume kiazi momori‐ticne ecneme kâpâcwâru ficko râecguocmu.
26No jâmbomac gazape: Go ira ŋeku mâc mi wahacmu, âgogere tofa bazutec tara‐jâmbâŋkeme jaha wahacmu.
27“Mimiŋnefâc‐ŋeŋic kecʒiŋuc jazakicne: ‘Ŋowe ŋonâŋ ŋohe bebehec mi ezepirec.’
28Noni ine ʒiŋuc ŋazakopac: Ŋic moczi ŋokac moc hone sasec ecneocmu, ine e jahacne ŋonâŋ biac maŋzi behejec muzo.
29Irec ʒâŋege moczi sâqocnere bitiŋko râecguzo eme riporâ behezemec. Ʒâŋe furu juku hârâcko huzicte sifu ʒâŋe hândâŋge qaisockezemec.
30Mefâregezi sâqocnere bitiŋko râecguzo eme hetâcne behezemec. Sahac furu juku sipirickerâ hârâcko huzicte sifu mege qaisockezemec.
31Dâŋ raŋɋane kecʒiŋuc fokac: ‘Moc e ŋonâŋ‐ticne behezo murâ pasi râcnehuc sorezejec.’
32Noni ine ʒiŋuc ŋazakopac: Moc e ŋonâŋ‐ticne beheocmu, e ŋokac sahacko râec ecnehuc kiŋsâko hureocmu. Mâc ŋokaczi boe sau bâfuawecko ŋicte kiŋ mi eocmu. Eme moc e ŋokac behekicne hâcne baocmu, e wâc ʒuhuc bâtâcte kiŋ hotâckeocmu.
33“Mimiŋnefâc‐ŋeŋic kecʒiŋuc jazakicne: ‘Go Anuture maio dâŋ mumupaŋ i burecko mi ezemec. Â mumupaŋ dâŋ murâ Wofuŋte maio reŋketec fârine fuazejec.’
34Noni ine ʒiŋuc ŋazakopac: Anuture maio dâŋ mumupaŋ sasawa i behe‐fârenʒepieŋ. Â sambâŋko ɋetickehuc mumupaŋ i wâc ʒiŋucte behenʒepieŋ: Sambâŋ i Anuture ŋeŋe hae.
35Mâreŋko ɋetickehuc mumupaŋ ine ʒiŋucte wâc behezo: Mâreŋ i Anuture ââtesiŋ. Â Jerusalem haeo ɋetickehuc mumupaŋ i ʒiŋucte behezo: Jerusalem i Wofuŋ sâkore hae.
36Erâ qizec‐ŋeŋicko ɋetickehuc mumupaŋ i wâc behenʒepieŋ. Ŋoŋe qizec susuc‐ŋeŋic qaŋqaŋ moc âzâcnepie gâgâpâc eocmu me? Me gâgâpâc moc âzâcnepie qaŋqaŋ eocmu me? I aricne.
37Irec dâŋŋeŋic ine jâmbomacte fârine jâmbomac ezejec, â aricnere fârine aricne jaha ezejec. Faicnao muraʒihuc mumu i sâqocne.
38“Dâŋ moc ʒiŋuc mukicne i manaeŋgopieŋ: ‘Moczi ʒâŋege âke hâpome okacne âke hâpocnezemec, me moczi micsiecge hezume okacne hezucnezemec.
39Noni ine ʒiŋuc ŋazakopac: Ba imac eŋarezo mupie sahac‐ŋeŋic mi ŋezickenʒepieŋ. Irec moczi maucge ŋifecne qame ŋifecne wâc sicnecnezemec.
40Â moczi gohec iiriac erâ ŋaqige faine rome maŋne qikiŋnecnezemec.
41Â moczi hata bembeŋne jowacte gazame go hata ʒoricne jowa razemec.
42Â moczi wiac mocte numu‐gareme râcnezemec, me wiacge jaba bajuzo mume manacnezemec.
43“Dâŋ moc ʒiŋuc mukicne i manaeŋgopieŋ: ‘Go âgoge maŋjauŋ ecnezemec â râsige qaisockezemec.’
44Noni ine ʒiŋuc ŋazakopac: Râsifâc‐ŋeŋic âgo ejarenʒepieŋ â ŋopa jâpec eŋareeŋgopieŋ jaŋere erâ numunʒepieŋ.
45Iŋuc ehuc sambâŋ Mamac‐ŋeŋicte naru motec fârine erâ juniŋmu. Eki hâcne mume ʒoaŋ‐ticnezi ŋic sâqocne â biaŋne mâmâc tamae‐ŋareekac, â hoe mume ŋic tiŋne â hehesic kosa heŋareekac.
46Ŋoŋe maŋjauŋ eŋareeŋgopieŋ jaŋe sawa maŋjauŋ ejareniŋmu, ine wemocko tofane fome juku bazu‐ŋarezo? I miti râpeckembiŋzi eeŋgopieŋ wâc.
47Me qomâfâc‐ŋeŋic jaŋe sawa âgo ejareniŋmu, ine wemo wiac sâko eŋgopieŋ eocmu? Qâpuc jaŋe i mi eeŋgopieŋ me?
48Irec ŋoŋe sambâŋ Mamac‐ŋeŋiczi tiŋne juekac irec sâc jaha junʒepieŋ.
