1Wdxiin tebëd men ne nak farisew lo Jesus no le tebëd maxter ley ne wruu Jerusalén.
2Wii men kayu txup tson xpén Jesus noze nyarbeed men, waadet nya men zegne nak xkoxtumber men yra men, por neguin wzelo men rnii men diznyaan por xpén Ne.
3(Porke yra men-Israel ne nak farisew no le yra men-Israel ne nakdet farisew, rsalzaandet men xkoxtumber xpenkwlal men, rudet men belne raadet nya men zegne ryal ga meno.
4No chene rberee men lgyeey, belne raadet nya men, rudet men. No ndalre ne rlaa men, zegnak ne raa men bas ne rdaa ne roo men no le byak no le gyusgyiib ne rkyiinen men no le xloon men.)
5Lex wnabdiiz men ne nak farisew no le maxter ley lo Ne, re men: ―¿Penak rlaadet xpén de zegnak xkoxtumber xpenkwlal be ne raa nya men antes ne gu men, le xpén de raadet nya?
6Wke Ne re Ne: ―Gugannaa laa de wen. Nli ke ne re profet-Isaías por laa de yra de chene re men: Yra ménree noze xdiiz men za ne rzaknon men noo, per rlaadet meno ydeblextoo men.
7Bat rkyiindet yra ne rlaa men chene rzaknon men noo, porke yra ne rneluu men, noze mén rkyeeno.
8Porke lugar ne ylaa de ne rkyeen Dëdyuzh, lel xkoxtumber mén zanal de: zegnak ne raa de byak no le bas ne rdaa ne roo de, no ndalre ne rzaglo neree rlaa de.
9No regue Ne ste: ―Lugar ne ylaa de ne rkyeen Dëdyuzh, lel xkoxtumber de zanal de.
10Chekwlo re Moises: “Gugaknzebnëz lo xuz de, gugaknzebnëz lo xnaa de”, “Mén ne rninyaan lo xuz o men ne rninyaan lo xnaa, rzëël guet men.”
11Per le laa de yra de re de ne zak gue te mén lo xuz men o lo xnaa men: “Gundet noo gan gun noo xyudar de porke che Corbán yrandxee ne nniiz noo lo de” (Corbán rna, che por Dëdyuzh nako).
12No re de, men ne guese zenga, che yëtre neguin ne gun men xyudar xuz men o xyudar xnaa men.
13Ne rlaa de zenga, rsan de ne rkyeen Dëdyuzh tebkoo, lel koxtumber ne wsan xpenkwlal de lo de zanal de. No ndalre ne rzaglo neree rlaa de.
14Lex wbëz Jesus yra menroo menduxtee guin, re Ne lo men: ―Gugon neree ne yzëët noo lo de yra de no gudee kwento:
15Let ne rudet mén rlaa ne rak men mendol, sinke ne mal ne rzaa lextoo men, neguin nak ne rlaa ne rak men mendol.
16Men ne rkagyedyag diiz, gon men neree ne rzëët noo.
17Chene che wruu Jesus lad yra mén guin, wdee Ne lenyuu, lex wnabdiiz yra xpén Ne lo Ne gan pe rna neguin ne re Ne.
18Orguin re Ne lo men: ―¿Pe ni laa de yra de rdeedet kwento? ¿Pe rdeedet de kwent ne yrandxee ne ru mén, let laadeto rlaa ne rak men mendol?
19Porke rdxiindeto lextoo men, sinke le we rdxiin txu men, zhich guin rruu ko. Ne re Ne zenga, rna xdiiz Ne ne yrandxee ne ru mén ndaa we.
20No re Ne ste: ―Ne mal ne rzaa lextoo mén, neguin nak ne rlaa ne rak men mendol.
21Porke lextoo mén nuu yra ne mal ne rlebleedx men, zegnak ne rkano men mén ne nakdet lzaa men, zegnak ne rkanogue men xkompanyer men chene gardet ytsëlnya men, zegnak ne rket men semén men,
22zegnak ne rbaan men, zegnak ne ndeblextoo men, zegnak ne rlaa men ne mal, zegnak ne rkade men, zegnak ne rap men bisye, zegnak ne rakmbidye men, zegnak ne rnii men diznyaan, zegnak ne nugya lextoo men, zegnak ne rdeedet men bnii xgyeryen men.
23Yra ne malree, lextoo mén rruu we. Laa we nak ne rlaa ne rak men mendol.
24Wruu Jesus nga, za Ne nes Tiro no le nes Sidón. Lex wdee Ne te lenyuu; wlaandet Ne ne nyaknan mén ne wdxiin Ne nga, per wakdet gan ne nkarlaan Ne.
25Waknangue te wnaa ne le Ne wdxiin nga. Rap wnaa guin te nzaap ne nuu menzab lextoo, lex wa men wzuzhib men lo Ne,
26wnab men lo Ne ne koo Ne menzab lextoo xsaap men. Nakdet men men-Israel, sinke le men nak men-Sirofenicia.
27Per re Jesus lo men: ―Rap mén degne ydee men si gu zhiin men primer, porke ngyidet ne ygyitxee men ne ru zhiin men chen ynii meno lo mëëk.
28Wke men re men: ―Nli we Dechey; per axtegue mëëk ne zu zhiin mezh ru ne byu ne ratxee nya minwin.
29Orguin re Jesus lo men: ―Por ne na de zegwa, gugya. Le menzab che wruu lextoo xsaap de.
30Chene wdxiin men ruxyuu men, wii men le xsaap men che nex lo loon; che wruu menzab lextoo nzeb.
31Wruu Jesus nes Tiro ste, wdee Ne nes Sidón no le nes Decápolis, wdxiin Ne runis-Galilea.
32Nga wdxinno mén te mgyeey lo Ne, nkwëët mgyeey guin no rninga men; lex wnab mén lo Ne ne yxob nya Ne led mgyeey guin.
33Orguin wano Jesus mgyeey guin tebkoo ledne yëtet mén. Lex wsee xkwen Ne lengyedyag men no wtxonxen Ne nya Ne, lex wtee No lo loz men.
34Zhich guin wii Ne gyeybaa, wonleedx Ne, lex re Ne: ―¡Efata! ―diizree rna: ¡Gugyal!
35Orgueguin wdee bnii gyedyag mgyeey guin, no wakwen loz men, wnixnëz men.
36Lex re Ne lo yra mén ne rut lo guedet meno; per mase re Ne ne rut lo guedet meno, lel mazre wlaa men wuu men diizo.
37Kesentyent rzee rzak yra mén, re men: ―Yrandxee ne rlaa ménree, wen rlaa meno; axtegue mennkwëët rlaa men ne ryenii gyedyag no rlaa men ne rnii menngup.
