1Afaliseyu winango pabodzi na apfundzisi winango wa Mtemo, omwe adacokera ku Jerusalemu, adasonkhana m'uphepete mwa Jezu.
2Iwo wadawona kuti wakupfundzira wace winango wakhambadya cakudya na mmanja mwakuswipa (ndiye kuti wakhalibe kuteweza mtemo wa kusamba mmanja ninga momwe wafalizeyu wakhadayiwuza mbumba kuti yicite.)
3Thangwe Afaliseyu na Ajuda wentse ambadya lini alibe kusamba mmanja na tcero, kuti akoye mtemo wa makolo.
4Ndipo angacoka ku msika, ambadya lini wakanati kubzitsuka bzetse bzomwe wabweranabzo. Ambakoya pomwe mitemo inango mizinji yomwe makolo yawo yadawasiyira, ninga kutsuka mikhombo, bzikhalango, na bzikasi bza mkuwa na talimba.
5Na tenepo Afaliseyu na amisiri wa Mtemo wale wadabvundza Jezu kuti, “Thangwe ranyi wakupfundzira wanu ambakoya lini mtemo wa makolo, tsono ambandodya napo alibe kusamba mmanja?”
6Jezu adawatawira kuti, “Imwe wanthu wa ciphamaso, ncadidi bzomwe mpolofiti Isaya adalewa pa cipande caimwe,iye adanemba kuti, ‘Wanthuwa ambandondilemekeza na mulomo basi, tsono mitima yawo iri kutali na Ine.
7kundipemba kwawo nkhwakusaya basa, thangwe wambapfundzisa mitemo ya wanthu, ninga walikuphundzisa mitemo ya mulungu.’”
8Jezu adapitiriza, “Imwe mumbasiya Mtemo wa Mulungu, mucimbakoya mitemo ya wanthu.”
9Tsono pakupitiriza mafala, Jezu adati, “Tsono imwe muna njira yanu yakucenjera yakusiyira Mtemo wa Mulungu kuti mukoye mitemo yanu.
10Nakuti Mozeji adalewa kuti, ‘Lemekeza Baba wako na mai wako,’ ndipombo kuti, ‘Wakunyoza Baba wace ayai mai wace, aphewe.’
11Tsono imwe mumbati, ‘Munthu akawuza Baba wace ayai mai wace kuti, “Bzomwe ndingadakuthandizani nabzo ndabzipereka kuna Mulungu, ”
12umweyo anfunika lini pomwe kuwathandiza Baba wace na mai wace.’
13Na tenepo mafala ya Mulungu imwe mumbayasandusa yapezi, thangwe ra mtemo wanu omwe mumbasiyirana. Ndipo mumbacita bzinango bzizinji tenepayu.”
14Pambuyo pace Jezu adacemera pomwe mthithi wa wanthu ule kuti ubwere, aciti: “Tetekerani mwentsenemwe,ndipo mubvesese.
15bzentse bzomwe bzicoka kunja bzicipita mkati mwa munthu bzinimuswipisa lini. Tsono bzomwe bzimbacoka mwa iye ndibzo bzinimuswipisa.”
16“Omwe ana makutu yakubva, abve!”
17Pomwe Jezu adasiya mthithi ule wa wanthu acipita mnyumba, wakupfundzira wace wadamubvundza bza mfananizo ule.
18Iye adati: “Kodi na imwembo mulikukhala ninga wanango wale; muli kubvesesa lini? Kodi muli kudziwa lini kuti bzetse bzakucokera kunja, na kupita mwa munthu, bzin'kwanisa lini kumuswipisa?
19Thangwe bzin'pita lini mumtima mwace, tsono mmimba, pambuyo pace nkhukabzitaya ku thengo.” (Pakulewa bzimwebzi, Jezu adalamulira kuti bzakudya bzentse wanthu angakwanise kudya.)
20Adati pomwe, “Bzomwe dzimbaswipisa munthu nidzire bzincoka mmtima mwace.
21Thangwe mkati mwa mitima wa wanthu ndimo mumbacoka ndzeru zakuipa, za ciwerewere, za kuba, za kuphana,
22upombo, kusirira, kuipa mtima, cinyengo, bzakunyantsa, kuipidwa, kunyoza, kubzikuza, ndipombo kupusa.
23Bzakuipa bzentsenebzi bzimbacokera mkati mwa munthu, ndipo ndibzo bzimbamuswipisa.”
24Jezu adanyamuka komweko aciyenda kumbali ya ku Tiru. adapita munyumba inango, ndipo akhafuna lini kuti wanthu wadziwe kuti iye ali kumweko. Tsono alibe kukwanisa kubisika,
25Nakuti mkazi winango, omwe mwana wace wacikazi akhabonera na mzimu wakuipa, adabva bza Iye. Adabwera kwa Jezu acigodama kuminyendo kwace.
26Mkaziyo akhali wakunja, wa dziko la Siro-Fenisiya. Adakumbira Jezu kuti akacose mzimu wakuipa kwa mwana wace.
27Tsono Jezu adamutawira kuti, “ayai, alekeni wana atome adya acikhuta. Mpsabwino lini kutenga cakudya ca wana nkhuthusira tuntsidza.”
28Pamwepo mkazi ule adati, “Ncadidi, Mbuya, tsono tuntsidza tumbakhala pafupi na mbuto yakudyera tucimbadya tumisuwa tomwe wana ambataya.”
29Pamwepo Jezu adamuuza kuti, “Thangwe la matawiridwe yako , ndoko, mzimu wakuipa wacoka mwa mwana wako.”
30pomwe mkazi ule adabwerera kunyumba kwace,adakawona mwana ule adagona pa talimba, mzimu wakuipa ule wacoka.
31Jezu adacoka pomwe ku mbali ire ya ku Tiru,acipita na ku Sidoni, kuyenda ku thawale la ku Galileya,adapita na pakati pa Mizinda Khumi.
32Wanthu winango wadamubweresera munthu omwe akhali mkhutwi na ubewewe. Wanthuwo adakumbira Jezu kuti amulimbise pakumsandzika manja munthu ule.
33Jezu adamucosa munthu ule pa mthithi wa wanthu acienda naye pa mbali. Adapitisa bzala mmakutu mwace, acipsipa mata, nkhukuya lirime lace munthu ule.
34Iye adanyang'ana kudzulu, acisisimira, acimuwuza kuti, “Efata!” ndiko kulewa “Funguka!”
35makutu ya munthu ule adafunguka, pamwepo lirime lace lidatsudzuka, aciyamba kulewa-lewa bwino
36Jezu adalumurira andzace wa munthu ule kuti, “Lekani kukawuza winango ali-yentse bzimwebzi.” Tsono napo iye akhadawaletsa, iwo adayenda acibzizimbula kwene-kwene.
37Ndipo wanthu wentse omwe wakhabzibva wakhadabwa kwene-kwene. waciti, “Omweyu ambacita bzentse mbzabwino. Ngakhale mkhutwi ambazilimbisa zicibva, pomwe wakusaya kulewa-lewa ambawacitisa kuti walewe-lewe.”
