Marakos 15

1

2

3

4

5

6

7

8

9

10

11

12

13

14

15

16

¹Kyze zokorobyitu Sudeutsa Deus wahoro eze ziknapamykysonahaktsa, taparaktsa kapitãotsa Moises harere nisihyrinymyrykynahatsitsa iwatsa sizubarẽtsa inakypyknahaze hawa Sesus tabeze nipamykysokonaha iwaze Sesus Piratus bo zioktykyryknaha. Taparaka zipawarakanaha. Iwaze Piratus bo zipehahik. Piratus abazubata iharere awatu zeka Sudeutsa ba zikbezenaha.

²Piratus ipe niy: — O Sesus ikia ja Sudeutsa pehatsa — niy. — Ikia tihi tsiktsaso — Sesus niy.

³Taparaktsa Deus wahoro zubata eze ziknapamykysokonahatsitsa: — O Piratus Sesus batu imysapy — nikaranaha. Isoho humo zispihikbatakanaha.

⁴Piratus ipezo niy: — Amo Sesus. Asoho humo zasapybyrikinaha. Tsiwaby sa. Iwa wasani sa — niy.

⁵Batu harere tasoho humo batu harere. Iwatahi Piratus ata zuba tatu mytsaty nikara — O amo skaraba! Batu harere ziky, batu taokani! — niy.

⁶Tapara tahamyikaha eze Piratus maku estuba inazukenaha. Maku sizubarẽtsa sakyriukrẽnikitsa hurukwy eze tu. Situkta estuba nizuke. — O aty sa myzuke — nikara. Atakta! Serusarẽhe ezektsa nikaranaha, yhỹ nikara. Iwa simyikaha eze ziknakara.

⁷Serusarẽhe eze kytsa niwatsoronaha iwaze sakyriukrẽtsa nitsahurukiknaha. Estuba sakyriukrẽnikitsa hurukwy eze Bahabas inarokota niy. Kytsa bakatsa niy. Ana humo hi nitsahurukiknaha.

⁸Iwaze kytsa sizubarẽtsa Piratus bo zumunaha. — O aty sa tsimyzuke — nikaranaha.

⁹Piratus: — O ikiahatsa istsa. Hawa sa tsimyzihikiknaha. Sudeutsa pehatsa za myzuke Sesusta tsimysapyrẽta! — niy.

¹⁰Taparaktsa Sudeutsa tahakyrikinaha sizokdirẽtsa nikaranaha iwatsahi Sesus ibo zioktyhyryknaha ana humo hi Piratus tsihyrinymyrẽta.

¹¹— O batu. Mektatukta! Bahabas zakta! — niaha. Iwa taparaktsa botu kytsa sizubarẽtsa pe niy: — Ikiahatsa tsimaha zeka Bahabas. Bahabas tsimaha — niaha.

¹²Piratus ispe niy: — Sesus ja. Hawa sa Sesus ty my. Atakta Sudeutsa pehatsa — niy.

¹³Myzubaha tihi: — Tabezehikta! Iharapatawyhyta humo tabezehikta! — nikaranaha.

¹⁴Piratus: — Amo humo sa. Amy ty sa imysapybara ty nikara — niy. — Tabezehikta! Tabezehikta! — opykani kazi nikaranaha.

¹⁵Iwaze Piratus: Yhỹ niy. Nawa myzubaha humo zuba harereziu tsihik mykara iwatahi Bahabas nizukehik. Sesus ta batu. Sodadutsa pe: — O tytsakinahaktsa! Iharapatawyhyta humo tsibezehiknahaktsa! — niy. De.

¹⁶Kyze sodadutsa Sesus tahawahoro isturupeze bo zioktyhyryknaha. Sodadutsa zumubanahaze Sesus zispihikbatakanaha.

¹⁷Isuk tsaririta ty zisuknaha. — O abaka Sudeutsa pehatsa abazubata! tsimy — zimyijakanaha. Inisaha ty zitsorikiknaha. Tubabatu nawa sisopyk. Sipehatsa mekywa tu sitsorik. Sesus ty ka inisaha ty zitsorikiknaha iwaze zimyijakanaha.

¹⁸— O ikia Sudeutsa pehakatsa — zispihikbatakanaha.

¹⁹Hwi ty ziharektotokoknaha, zihwezozokoknaha. Tahaekaratsa humo iokeryk puruk puruk nikaranaha, sipehatsa okeryk watsa iwa zisininiwyky.

²⁰Zispihikbatabanahaze isuk tsaririta zibokiknaha. Isuk babata ty tysukzonaha. Iwaze ape bo zioktykyryknaha. Iharapatawyhyta humo tabeze nikaranaha.

²¹Ske buruk niukurunahaze, Simaõ nasihobyk. Atakta Sireni ezekta tatsuhuk ikny ziksikirita. Ihyrytsa Aresãdere Hupus ahatsa inarokotsa. Iwaze sodadutsa ipe niaha: — O iharapatawyhyta tsebykta! — niaha.

²²Niytahi zebykyk! Iharekpokoso sapy inarokoha bo Sesus zioktyhyryknaha, iharekpokoso Sudeutsa harere kokota maha.

²³Anabo izumunahaze aty tohi mymyitsapyri hwi ty Sesus bo nyny niy: — Tsõty — niy. Batu niy. Batu tsõ.

²⁴Isuk zibokiknahaze ziaksenaha. Sodadutsa harahare zipyryktsa ty nisipaparakanaha aty ja Sesus suk piakse nikaranaha tsahi ziwatawykynaha. Iharapatawyhyta humo zihyrizikiknaha, itsyhyry soikare eze zaza nikaranaha zihyrizikiknaha, ipyrytsa ty kino niwatihi zaza nikaranaha zihyrizikiknaha. Iwaze nepykbanahaze iharapatawyhyta ziriktonaha.

²⁵Haramwe nazotoktoze iharapatawyhyta humo zihyrizikiknaha. Zikymynahaze, iharapatawyhyta zitseknahaze ziriktonahaze.

²⁶Iharapu bete iwatahaha ty. SUDEUTSA PEHATSA ziwatahakanaha iwa isoho humo hazi nikaranaha.

²⁷Kytsa petoktsa sitsyhyryboanikitsa ituk nisibanaha siharapatawyhytsa humo nisibanaha estuba ipanuryk taba usta ipawazo taba ahatsa niaha.

²⁹Kytsa nabaze ske buruk niukurunahatsa, zisapybyrikinaha hazi nikaranaha: — O iktsatahaktsa. Taparaka zuba: “Deus wahoro zubata myokarabaka bykyze petok puruze usta pizi tsikykara” abaka tsimyraka — nikaranaha.

³⁰— Ikia tsahyrinymyrẽta babata zeka, pany, tynasikta! Ba zikumuzakta — zimyijakanaha.

³¹Deus wahoro zubata eze ziknapamykysokonahatsa Moises harere nisihyrinymyrykynahatsitsa kino niwatihi nitsasokonaha: — O ustsa kytsa nisitsumuẽhĩkĩ, atahi ba ziktsumuẽhĩ! Iwatatu sa pomoza Deus zipeha zeka “tynasikty”, Sudeutsa pehatsa babata zeka, iharapatawyhyta ekze “tynasikta!” Iwa tsimy zeka: “O Sesus hi Deus zipehata babata” tsimaha — mybarapetu nikaranaha. Asaktsa ituk nihyrikosokdanahatsa asa kino niwatihi zisapybyrikinaha.

³³Iwaze tokbaha eze miwa niyzik. Batu haramweke. Sudeja eze miwa niyzik.

³⁴Iharakibikia bo zoize inaharamwezo. Iwaze Sesus: — Eri Eri rama sabaktani — ana taharere baba ty huahua niy. Anatyhi myharere. — O Deus amo skaraba uta zuba tsipikarikik — niy.

³⁵Ustsa kytsa niaha: — Amo sa Erias bo hua mykara — niaha.

³⁶Tohi duabohotsa tsik ipokzitsibara ty itsãrãkbara ty morosuk eze ky ty tsikok niy. Anabo mazori waha ty duabohotsa tsik bo sokyk niy. Zipypyikik. Mazori waha ty hwi humo korokbykyk jobo Sesus sak bo tsyk tsyk nikara. Atakta: — Byriktsa, tozeka ja Erias mozumu, iharapatawyhyta humo piakse. Tsiperynahaktsa! — niy.

³⁷Iwaze Sesus kakazo niyze zumuza.

³⁸Iwaze panu ipamaba ipokpedawy Deus wahoro zubata eze ky nisykbaik. Tsapukte buruk nisyk bijoikny tu niaksykyryk.

³⁹Sodadutsa pehakatsa tuk nikozoko iharapatawyhyta okeryk niriktohoko Sesus iwa nihyrikosokdaze atahi: — O atahi Deus tse babata — niy.

⁴⁰Wastuhu wytykyryk nizokparakanaha. Maria Madarena, ustatsa Maria, Sarome, usiza, iwa ẽryk tu nizokparakanaha. Maria hyrytsa Sose Tsiaku jypykyhyzytykta iwatsa niy.

⁴¹Asiza hi Karireja ikny ihumo simypokzitsiarẽza nikaranaha. Usiza wytykyryk iapik Serusarẽhe bo zikzumukunaha za kino niwatihi asiza nizokparakanaha: Zitsumuẽhĩekiknaha.

⁴²Iwaze byiri Sudeutsa nawa zurunahaze tahabyrykywy, nubaze Sose Arimeteja ezekta Piratus bo izumu. Sose taparakta Deus wahoro zubata eze tu niy. Tsimysapyrẽta atahi kytsa Deus harere bo hyỹ mykaranaha ana hi mozihikik. Batu pyby iwaze Piratus pe niy. — O Sesus nury ty kabokta. Uta inury ty iytyk bo mytsahok — niy.

⁴⁴Piratus: — Botu sa pỹ niy — niy. Iwaze sodadutsa pehatsa pe niy: — Sesus sa botu nihyrikosokda — niy. Sodadutsa pehatsa ipe niy: — Yhỹ pỹ — niy. Iwaze Piratus: — Ikia za tsinazipik Sose. Iwaze tsimytsahok — niy.

⁴⁶Sose panu kõpara niy inury inazipikze, panu ty ziakwaraka. Tubabatu harahare yktaba nitsahoknaha, abaka anabo hi nitsahok. Harahare bobyri ihok bo zikorore. Zihokbore.

⁴⁷Maria Madarena, ustatsa Maria, ahaza nizokparakanaha. Iytyk zinyrenaha.