1Macibese-bese, akulu wa azibaba wa ntsembe na akulu wa maJuda na apfundzisi wa Mtemo, pabodzi na wentse wa mbuto ikulu ya mirandu ya maJuda adasonkhana. Adam'manga Jezu acikamupereka kwa Pilatu.
2Pilatu adambvundza kuti, “Kodi iwe, ndiwe Mambo wa maJuda?” Jezu adamutawira kuti, “ Mwalewa mwalewa dimwe.”
3Akulu wa azibaba wa ntsembe adayamba kumunamizira bzinthu bzizinji.
4Pilatu adamubvundza pomwe kuti, “Kodi un'tawira lini? nyang'ana ni bzinthu bzingasi bzomwe ali kukunamizira.”
5Tsono Jezu alibe kudzatawira pomwe, na tenepo Pilatu adadabwa kwene-kwene.
6Pa nthawe ya cikodwereso ca Phasika, Piratu akhambawatsudzulira mkaidi m'bodzi, omwe iwo akhakumbira.
7Pakhana m'bodzi wakucemeredwa Balabasi, omwe akhali mukaidi pabodzi na wanthu winango thangwe ra kusandulikira Boma na kupha wanthu.
8Ndipo mthithi wa wanthu udabwera, wadayamba kukumbira Pilatu kuti awacitire bzomwe wakhadazerewera.
9Pilatu adawabvundza kuti, “Kodi muli kufuna kuti ndikutsudzulireni Mambo wa majudayu?”
10Adalewa terepo thangwe adadziwa kuti akulu wa azibaba wa ntsembewo wadamupereka, thangwe ra njiru.
11Tsono akulu wa azibaba wa ntsembewo wakhapasa mphambvu mthithi wa wanthu kuti wakumbire kuwatsudzulira Balabasi pambuto pa Jesu.
12Ndipo Pilatu adawabvundza pomwe kuti:“tsono mun'funa kuti ndicite ciyani naye omwe muli kuti ni Mambo wa Majuda?”
13Wanthuwo adakuwa pomwe kuti, “M'khomereni pa mtanda!”
14Pilatu adawabvundza kuti, “Thangwe ranyi? waphonyanyi?” Tsono iwo wadathimizira kukuwa kuti, “M'khomereni pa mtanda!”
15Na tenepo Pilatu, pakufuna kukondweresa mthithi wa wanthuwo, adawatsudzulira Balabasi, acilamula kuti Jezu achangidwe. Patsogolo pace adam'pereka kuti akam'khomere pa mtanda.
16Pamwepo acikunda wadapitisa Jezu kumsasa kuseri kwa nyumba ya mkulu wawo, wacikhonceza mthithi wentse wa acikunda andzawo.
17Patsogolo pace wadam'bvazika cakubvala cifuira, wacikondza nkhata ya minga wacimuikha mumsolo.
18Kutsogolo kwace wadayamba kumbam'musa kuti, “bzipulumuse mambo wa majuda.”
19Wacimbamumenya mmsolo na mpsimbo, wacimbam'psipira mata, wacimbanamizira kum'godamira.
20Pomwe wadamala kumsinjirira terepoyo, wadamucosa cakubvala cire, wacim'bvazika pomwe cakubvala cace. Patsogolo pace wadam'tenga, aciyenda naye kuti wakam'khomere pa mtanda.
21Pa njira wadagumana na Sirimau wa kuKhirene baba wa Alexandre na Rufu akhagwata kucokera ku munda. Ndipo acikunda wale adam'kakamiza kuti anyamule mtanda wa Jezu.
22Iwo adayenda naye Jezuyo ku mbuto yikha cemerewa Golokota, (ndiko kuti “Mbuto ya N'khadzi za Msolo.”)
23wadam'pasa vinyu ina mankhwala yan'cemeredwa mira kuti amwe tsono Iye ulibe kutambira.
24Ndipo dam'khomera pa mtanda, wadagawana bzakubvala bzace. Wadacita muvima-vima kuti awone comwe m'bodzi na m'bodzi angada tenga.
25Pamwe wadamukhomera pa mtanda, zikhali nthawe zipfemba za kumacibese.
26Mafala yakulatiza mulandu wakumuphera, wakhadayanemba pa dzaulu pa mutanda tenepa, “Mambo wa Majuda.”
27Pabodzi na Iye pakhadakhomeredwambo akambowa awiri, m'bondzi ku boko ladidi, winango ku boko ladzere.
28Na tenepo bzidacitika bzomwe mafala ya Mulungu yadalewa kuti, “ wadamuyesa ninga m'bodzi wa wanthu wakuphonya.”
29Wanthu omwe akhambagwata na pamwepo akhambamusinjirira. Acimbagwededza misolo acimbalewa kuti, “Ha, ndiwe lini iwe ukhambati, ‘Nin'dzapfudza Nyumba ya Mulungu ndicimanga pomwe pa ntsiku zitatu?’
30Bzipulumuse, buluka pamtandapo!”
31Iwombo akulu wa azibaba wa ntsembe akhamuseka, wacimbawuzana na apfundzisi wa Mtemo kuti, “Adapulumusa wanthu winango, tsono ataza kubzipulumusa!
32Iye akhati ni Krixtu wakulewedwa, Mambo wa maIzirayeri, buluka tsono pamtandapo, kuti tiwone tikhulupirire!” Ndipombo omwe akhadakhomeredwa pabodzi na iye wale wakhambamutukanambo.
33Kuyambira nthawe ya masikati, padacita mdima pa dziko lentse mpaka pa nthawe zitatu za kumawulo.
34Ndipo nthawe zitatu za kumawulo, Jezu adakuwa mwa mphambvu kuti, “Yeloi, Yeloi, lama sabakitani?” Ndiko kulewa, “Mulungu wangu, Mulungu wangu, thangwe ranyi mwandisiya?”
35Anango omwe akhadaima pamwepo, adabva mafalayo wadati:“Bvani, ali kucemera Eliya.”
36Na tenepo m'bodzi wawo adathamanga acikabviika cigunsalinya muvinyu yakusasa, acipfikirira ku m'tete acimupasira, kuti amwe. Acimbati, “Lekani, tiwone penu Eliyayo an'bwera kudzam'bulusa.”
37Ndipo Jezu adakuwa mwa mphambvu, acimalizika.
38Cinguwo ca muNyumba ya Mulungu cidang'ambika pakati nakati, kuyambira padzaulu mpaka pantsi.
39Mkulu wa acikunda omwe akhadaima pamwepo acimbamnyang'anisisa, pomwe adawona kuti Jezu ali kukuwa tenepo acimalizika, adati, “Cadidi, munthuyu akhali Mwana wa Mulungu.”
40Patali na iye pakhana azimai, akhanyang'anisisa. Winango mwa iwo akhali Maliya wa kuMagadala, na Maliya, mai wa Tiyagu mng'ono na wa Zuze, ndipombo Salome.
41Azimaiwa akhatewera Jezu pomwe Iye akhali ku Galileya, acimbam'tumikira. akhalipombo azimai winango azinji omwe adayenda naye ku Jerusalemu.
42Kukhadadoka kale. Ndipo cikhali Cixanu, ntsiku yakukondzekera Malinkhuma,
43Zuze wa ku Alimateya adafika. Akhali mkulu wakudziwika, wa mbuto ikulu* ya maJuda. Na iyembo akhadikhira Umambo bwa Mulungu. Ndipo iye adalimba mtima, acienda kwa Pilatu kukakumbira kuti am'pase citanda ca Jezu.
44Pilatu adadabwa kubva kuti Jezu wafa kale. Na tenepo adacemeresa mkulu wa acikunda ule, acimubvundza kuti, “Kodi Jezu wafa kale-kale?”
45Mkulu wa acikundayo pomwe adam'tsimikizira bza khaniyo, Pilatu adam'bvumiza Zuze kuti akatenge citandaco.
46Zuze adagula nguwo yicena, adabulusa citanda cire acicitsetenga na nguwo ire. Aciciikha kucingwidza cakucera pa mwala, patsogolo pace adagulumundisa cimwala acifungira pa msuwo.
47Maliya wa kuMagadala ule, na Maliya mai wa Zuze, wakhawona komwe akhamuikha Jezu.
