1Patsa atsicyärëcaptinnam, Corti Supremacho caqcuna: saserdoticunapa mandacoqnincunaqa, respetashqa auquincunawan, ley yachatsicoqcunawan y llapan autoridacunawan sesiunarir, Jesuspa maquinta pancarcur gobernador Pilatuman apar entregariyarqan.
2Chäratsiyaptinnam, Jesusta Pilatu queno taporqan: —¿Qamcu canqui israel nunacunapa reynin? —nir. Jesusnam yasquirerqan: —¡Nicanquinataq ari! —nishpa.
3Tsechomi saserdoticunapa mandacoqnincuna tuquilayapa lebantarnin Jesusta acusecuyarqan.
4Tsenam Pilatu yape queno nerqan: —¿Imanirtaq wiyaräcunqui tselaya acusecayäshuptiqui?
5Tseno niptinpis, Jesusqa upällam cacorqan. Tsemi Pilatu espantashqa quedacorqan.
6Cada watam tse Pascua fiestacho nunacuna mañacuyaptin juc presuta libri cachariyaq.
7Tsepinmi Barrabas nishqan nuna yanaqincunawan carselcho llawirëcayarqan. Pecunam Roma gobiernupa contran carnin, nunacunata wanicatsishqa cayarqan.
8Tsemi Pilatuman atscaq nunacuna ewecur, costumbrinmanno rurananpaq mañacuyarqan.
9Pilatunam taporqan queno nishpa: —¿Israel nunacunapa reynintacu cacharinäta munayanqui?
10Tseno nerqan Pilatu, tse saserdoticunapa mandacoqnincuna Jesusta chiquirnin, acusar peman entregayanqanta cuentata qocurninmi.
11Peru saserdoticunapa mandacoqnincunam nunacunata yachatsiyarqan “Barrabasta cacharinequitam munayä” niyänanpaq.
12Tseno niyaptinnam, Pilatu queno nerqan: —Israel nunacunapa reynin niyanqequitaqa ¿imatataq rurashaq?
13Nunacunanam qayaripa niyarqan: —¡Petaqa cruscho wanutsï! —nir.
14Tseno niyaptinnam, Pilatu queno nerqan: —¿Ima mana allitataq rurashqa? —nir. Peru nunacunanam “¡Cruscho wanutsun!” nishpa, qaparicachäyarqan.
15Tsenam israel nunacunawan alli quedeta munarnin, Barrabasta cacharerqan, y Jesustanam alli buenu astaratsirnin, entregarerqan crusificayänanpaq.
16Tsenam soldaducuna Jesusta jeqaratsiyarqan palasiupa “Pretorio” nishqan patiunman. Tsechonam llapan soldaducuna juntacariyarqan.
17Jesustanam puca mantuta aqshuratsiyarqan, y cashapita coronata awarir tsucuratsiyarqan.
18Tsepitanam burlacurnin, queno niyarqan: —¡Biba israel nunacunapa reynin! —nir.
19Tsepitanam shucshuwan peqan peqan wilur ushayarqan, toqapuyarqan y qonqurïcuryan adoraq tucuyarqan.
20Tseno allapa maltratarirnam, aqshutsiyanqan granati mantuta qoturatsir quiquinpa ropantana yacarcatsir, apayarqan crusificayänanpaq.
21Tseno aparëcarninnam, topariyarqan chacrapita shamicaq juc nunawan. Pepam shutin carqan Simon. Tse nunatam Jesus apecanqan crusta malas catätsiyarqan. Tse nunaqa Cirene marcacho yuricoqmi carqan, Alejandrupa y Rufupa papänin.
22Tsepitanam Golgota niyashqan sitiuman Jesusta chäratsiyarqan. (Golgotaqa calabera ninanmi).
23Tsechonam mirra nishqan jampita binuman awayarqan Jesusta uputsiyänanpaq, peru manam uporqantsu.
24Crusman clabarirnam, soldaducuna Jesuspa ropanta apacuyänanpaq sortiyayarqan, “Mä, ¿meqantsictash tocamäshun?” nishpa.
25Jesusta crusman clabayanqan öraqa carqan qoya las nuebinonam.
26Imanir crusificayanqanta nunacuna musyayänanpaqmi, cruspa puntanman juc letreruta churayarqan, “Quemi israel nunacunapa reynin” nir.
27Petawan juntum ishcaq suwacunatapis crusificayarqan, jucta derechu ladunman, jucnintana itsoq ladunman.
28˻Tsenomi cumplicärerqan Diospa palabran queno escribirëcanqan: “Jutsasapacunatawan iwalmi Diospa tsurinta tratayanqa” nir.˼
29Tsepa pasaq nunacunanam peqancunata awir cushipäyarqan, queno nishpa: “¡Qamqa, ‘Diospa templunta juchurirmi, quima junaqllata sharcatsishaq’ nishpataq, nerqequi!
30Tseno nicarqa, mä, salbacurirnin cruspita yarparamï.”
31Tsenollam jina saserdoticunapa mandacoqnincunapis y ley yachatsicoqcunapis Jesusta burlacurnin, queno niyarqan: —¡Juccunataqa salbashqam; peru quiquenqa salbaquita manataq puedintsu!
32Israel nunacunapaq Dios Acrashqan rey carnenqa, cruspita yarpamï, tseta ricarnin creyiyänäpaq —nir. Y laduncho crusificarëcaqcunapis tsenollam burlacuyarqan.
33Tse öraqa pullan junaqnam carqan. Tse örapitam asta lastrescamayaqmi patsa pasepa paqasyäcurcorqan.
34Tse öram Jesus fuertipa queno nir qaparïcorqan: —Eloi, Eloi ¿lama sabactani? (Tse ninanqa carqan “Dios, Dios, ¿imanirtaq noqata jaqiramarqonqui?” ninanmi.)
35Tseta wiyarnam, tsecho quecaq waquin nunacuna queno niyarqan: —Une profeta Eliastam qayecan —nir.
36Juc nunanam coripa ewar esponjata puchqoq binuman tullpurcur shoqushpa puntanman watarcur, Jesuspa shiminman churarqan shoqunanpaq queno nishpa: —Mä, ¿rasonpacush Elias shamonqa cruspita yarputsinanpaq? —nir.
37Tsellanam fuertipa qayaricur, Jesus wanurerqan.
38Tse öram templu rurincho tsaparaq cortina umapita urepa ishqueman qashqacärerqan.
39Soldaducunapa capitanninnam Jesuspa frentincho quecarqan. Tseno qayarir wanoqta riquecurnam, queno nerqan: —¡Que nunaqa rasonpam Diospa Tsurin cashqa!
40Waquin warmicunapis carullapitam ricarëcayarqan. Pecunawanmi quecayarqan Maria Magdalena y menor caq Santiagupa y Josepa maman Mariapis y Salomepis
41Tse warmicunam Jesusta qatimushqa cayarqan, y Galileachopis Jesusta pecunam yanapayarqan. Jina pecunawanmi atscaq warmicunapis Jerusalenman shayämushqa cayarqan Jesusta qatirnin.
42Tse tardeqa carqan jamacuyänan junaqpa dispirannam.
43Tse tardim Arimatea marcapita Jose jutiyoq autorida balorta tsarïcur Pilatuman ewarqan, Jesuspa ayanta mañananpaq. Pëqa Sanhedrin nisqhan corticho allapa presisaq autoridami carqan, y Diospa mandaquinintam shuyararqan.
44Pilatunam “¿Wanurishqanatsuraq?” nir, yarpacacharqan. Tsemi soldaducunapa capitanninta qayarir queno taporqan: —¿Wanurishqanacu tse nuna? —nir.
45Capitan “Aumi” niptinnam, Jesuspa ayanta apacunanpaq Joseta änirerqan.
46Tse öram Jose linu sabanasta rantirir Jesuspa ayanta cruspita yarparatsirnin, tse sabanaswan pitorqan, y apacurnam pampecorqan qaqacho uchcushqa sepulturaman. Tsepitanam sepulturapa puncunta qaqawan alli buenu tsapecorqan.
47Meman pampayashqantapis Maria Magdalenam y Josepa maman Mariam ricarëcayarqan.
