Maka 15

1

2

3

4

5

6

7

8

9

10

11

12

13

14

15

16

¹Pana munumunu hokara si tuturei vivinei sari na ṉati hiama koari na koimata tadi na tie Ziu, meke koari na tie va tumatumae koasa Tinarae te Mosese, meke koari doduru pule pu koa pa puku tie varipitui tadi na tie Ziu, pude di vizatia sa siraṉa gua pude va matea se Zisu. Pusi rini sari na limana, meke turaṉa la nia rini si Asa koe Paelati.

²Meke sipu kamo rini vasina si nanasia Paelati se Zisu, “Vea Agoi tugo sa Baṉara tadi na tie Ziu?” Meke olaṉa si Asa, “Uve, gua tugo sapu zama nia goi sana,” gua si Asa.

³Meke soku ginugua kaleadi si zutu nia rina ṉati hiama se Zisu.

⁴Ke nanasa pulea Paelati si Asa, “Na vegua ke lopu hite olaṉa tu si Goi? Avoso latu koari doduru dia tinazutumu Goi!” gua si asa.

⁵Ba korona kulu se Zisu, ke magasa hola nana se Paelati.

⁶Meke sa hahanana te Paelati pa totoso Pasova, si pude rupahia si keke tie ta pusina pu ta tepa koari na tie pa totoso asa.

⁷Keke tie, e Barabasi pozana, si ta pusi turaṉae koarini pu raza ia sa qinavuna Roma. Koasa vinaripera si va mate tie tugo si asa.

⁸Meke sipu varigara sa kobi tinoni si podalae tepa ia rini se Paelati pude va malumu nia koa rini sapu gua hoke tavetia sa.

⁹Meke nanasa la i Paelati si arini, “Hiva nia gamu si pude vata rupaha vatua koa gamu sa Baṉara tadi na Ziu?” gua si asa.

¹⁰Sina gilania nana Paelati sapu na konokono nia mo rina ṉati hiama se Zisu, ke luara la nia rini koa sa.

¹¹Ba sovuti rina ṉati hiama sari na kobi tinoni, pude mani vata rupaha la nia Paelati koa rini se Barabasi, ba lopu se Zisu, gua.

¹²Meke zama pule la koasa kobi tinoni se Paelati, “Ke sa kaqu tavete nia rau se Zisu, sapu poza nia Baṉara tadi na tie Ziu gamu?” gua si asa.

¹³Meke velavela si arini, “Va matea pa korosi!” gua si arini.

¹⁴Ba nanasa pulei tugo Paelati sarini, “Na sinea sa si tavetia Sa?” Ba velavela va sisigitae si arini, “Va matea pa korosi!” gua si arini.

¹⁵Sina hiva va qetua Paelati sa kobi tinoni, ke vata rupaha la nia sa koarini se Barabasi. Ba tozi ni sa sari na solodia pude seke nia hilihiliburuana se Zisu, meke tiqe luara vala nia sa koa rini si Asa pude di la va matea pa korosi, gua.

¹⁶Meke turaṉa nuquru la nia rina solodia se Zisu, koasa pavasa pa vetu qavuna, meke tioko varigara beto mae ni rini sari na solodia.

¹⁷Meke va sage nia poko pepolo tana baṉara rini si Asa, meke tavetia rini si keke piribatu rakirakihi guana toropae baṉara, meke va hakea rini pa batuna.

¹⁸Meke va lavalavata kokoha ia rini si Asa meke zama: “Mani toa va gelenae sa Baṉara tadi na tie Ziu!” gua.

¹⁹Meke seke nia kolu rini batuna, meke loroa, na kokotuṉu meke todoṉo nia rini si Asa.

²⁰Sipu beto ṉoṉovala gunia rini si Asa, si va gorea rini sa poko pepolo, meke va sage pule ni rini sari Nana poko soti, meke tiqe turaṉa vura nia rini, pude la va matea pa korosi.

²¹Koasa dia inene la si tutuvia rini si keke tie Saerini, pozana si e Saimone, na tamadia ri Alekezada e Rupasi, na tiqe nuquru maena mo pa Zerusalema si asa. Tuqe vagia rina solodia si asa, meke va paleke nia rini sa korosi te Zisu.

²²Meke turaṉa la nia rini se Zisu pa keke vasina pozana Qoloqota, ginuana asa si na vasina batu tomate.

²³Vasina si hiva poni nia rini sa vaeni sapu ta henie oto, pozana moa, ba korona napoa Zisu si asa.

²⁴Meke poka nia rini pa korosi si Asa, pa sia koloko munumunu, meke mudumudukeda ni rini sari Nana poko pude dogoria esei kote vagi.

²⁶Ta kubere guahe sa tinazutuna Sa: “SA BAṈARA TADINA TIE ZIU,” gua.

²⁷Meke karua tie hikohiko si somana ta poka turaṉae koe Zisu pa hopeke dia korosi, keke pa kali mataona, meke keke pa kali gedena.

²⁸Ke tava gorevura sa Kinubekubere Hope sapu guahe: “Ta nae turaṉae koari na tie kaleadi si Asa,” gua.

²⁹Sari na tie pu ene hola si va qenoqeno batu, meke pesipesia rini se Zisu, “Ke isana, si Agoi sapu kote huaria sa Zelepade, meke kuri pulea pa ka ṉeta rane, gua!

³⁰Ego, mamu harupu pulenigo, mu gore mae pa korosi kamahire!” gua si arini.

³¹Sari na ṉati hiama, meke sari na tie va tumatumae koasa Tinarae te Mosese, ba zama ṉoṉovala kekeṉoṉo gunia tugo rini asa se Zisu, meke vari zamai guahe teledia, “Votiki tie si harupi Sa, ba lopu boka harupu pule nia telena!

³²Ego, be sa Karisito, sa Baṉara tadi na tie Izireli si Asa, si mani gore mae kamahire pa korosi, pude mada dogoria meke va hinokaria!” gua si arini. Sari karua pu somana ta poka pa korosi ba zama ṉoṉovala la gua tugo koe Zisu.

³³Sipu kamo sa korapa rane, si huporo sa doduru popoa, padana ka ṉeta aoa.

³⁴Sipu kamo sa ṉeta koloko si velavela se Zisu, “Iloi, Iloi, lema sabakatani?” Sa ginuana sa si guahe: “Qua Tamasa, Qua Tamasa, na vegua ke veko pani Au tu Goi?” gua.

³⁵Totoso avosia ri kaiqa pu tuturu tata, si zama si arini, “Avoso la, korapa tiokia Sa se Ilaiza!” gua.

³⁶Meke haqala la nia keke ri kasa si keke puha, meke poṉa va bobosia sa pa vaeni pasana, meke va sotoa sa pa keke kolu, meke huhuku sage la nia sa koe Zisu, pude va napo nia, gua. Beto meke zama si asa, “Aqa paki! Mada dogoria, hokara kote mae va gorea Ilaiza Sia pa korosi,” gua si asa.

³⁷Meke velavela va ululae se Zisu, meke luaria Sa sa siniṉo.

³⁸Meke ta rikata rua gana sa poko gobana sa Lose Hopena pa korapana sa Zelepade pa Zerusalema, podalae panauluna, meke kamo pa hubina.

³⁹Meke sipu dogoria sa palabatu tadi na solodia pu korapa turu pa kenuna sa korosi, sari doduru gua pu ta evaṉa koasa minate te Zisu, si zama si asa, “Hinokara, na Tuna tugo Tamasa sa Tie hie,” gua si asa.

⁴⁰Kaiqa barikaleqe si korapa koa vasina pa seu, meke doṉodoṉo la. Koa somanae dia koa rini vasina sarini hire: e Mere pa vasileana Magidala, e Salome, meke Mere sa tinadia ri Zemisi sapu mudina meke e Zosepa.

⁴¹Lulidi mae koe Zisu pa Qaleli si arini pude toka nia si Asa, meke soku pule barikaleqe si koadia vasina, saripu lulidi koa Sa, sipu sage mae pa Zerusalema si Asa.

⁴²Na Rane Va Namanama bisa sa rane asa, sapu sa rane vugo si sa rane Sabati. Ke sipu tata lodu sa rimata,

⁴³si sage va mataqara la se Zosepa, tie pa Arimatia, koe Paelati meke tepa vagia sa sa tinina e Zisu. Na somanana koasa Sanihiderini, sa puku tie varipitui tadi na tie Ziu, meke asa ba somana aqa nia tugo sa minae tanisa Binaṉara te Tamasa.

⁴⁴Magasa se Paelati totoso avoso nia sa sapu ele mate tu se Zisu. Ke tiokia sa sa palabatu tadi na solodia, meke nanasia sa, sapu be ele mate hinokara tu se Zisu, gua.

⁴⁵Totoso gilana valeania sa koasa palabatu tadi na solodia, sapu ele mate tu se Zisu, si va malumu la nia sa koe Zosepa sa tinina.

⁴⁶Holua Zosepa si keke poko keoro lineni. Va gore vagia sa sa tinina e Zisu, meke hade nia koasa poko keoro, meke la vekoa sa pa korapa lovu sapu ta horena pa kali toqere. Beto asa si topili tuku la nia sa si keke patu nomana pa sasadana sa lovu.

⁴⁷Mere pa vasileana Magidala, meke Mere sa tinana Zosepa, si koadia, meke dogoria dia sa vasina pu ta veko sa tinina e Zisu.