1Ja nurujeli, matja nguramarana, Priesta ja pinaru ja jaura jinkinietja ja kapara pratjana ngankamalina wonti; ja tanali Jesus dupudupu ngankana wonti, ja nina wapalkana wonti, ja nina Pilatungu jinkina wonti.
2Pilatulu nina jakalkana wonti: “Jidni Juda kanaia Kapara nganai?” Nulu kalabana wonti ja nunkangu jatana wonti: “Jidni matja jatai.”
3Ja Priesta pirnali nunkangu jaura marapujeli ngulkuterkana wonti.
4Pilatulu nina nakaldra jakalkana wonti ja jatana wonti: Jundru panila kalabai? Mai, worderu ngurungurujeli tanaia jinkangundru ngulkuterkai!”
5Jesujeli nunkangu wata morla kalabana wonti, jeruja Pilatus ngaruparana wonti.
6Ditji pirnani nulu tanangu milingeru kanjangarila kurakana wonti, worananina tanali ngatjina wonti.
7Kulno nganana wonti, tala nunkani Barabbas, nina tanali tirijiritjibanietjani jela dupudupu ngankana warai, ngangau tanali tirijiritjibanani kana kulno narielu nandrana warai.
8Ja kana wolara pirna maritjina wonti ja wonina wonti ngatjila, worderu nulu tanangu milingeru ngankana wonti.
9Pilatulu tanangu kalabana wonti ja jatana wonti: “Jura jertapateriai, ngato jurangu Juda kanaia Kapara kurakananto?”
10Ngangau nulu ngujamana wonti, Priesta pirnali nina windri kuterilkanandru ngulkuterkana warai.
11Priesta pirnali kana wolara ngankana wonti, nulu tanangu Barabbas kurakananto.
12Pilatus nakaldra kalabana wonti ja tanangu jatana wonti: “Mina jura jertapateriai ngato nunkangu ngankananto, ninaia juru dikai Juda kanaia Kapara?”
13Tana nakaldra maritjina wonti: “Ninaia kunarkunj katibamai!”
14Pilatus tanangu jatana wonti: “Mina madlentji Nulia ngankana warai?” Tana morla maritjina wonti: “Ninaia kunarkuni katibamai!”
15Pilatulu ngundrana wonti kana wolaraia jertapaterina ngankala, ja tanangu Barabbas kurakana wonti, ja nulu Jesus jinkina wonti, nulu nina matja nandrana, tanali nina kunarkuni katibananto.
16Mitaia kaparaia milieli nina palaraia pirini wapalkana wonti, nauja kalala jinkini piri nganai, ja tanali mili pratjana karkana wonti.
17Ja tanali nunkangu kati maralje widmana wonti, ja nunkangu dilka pirapira kurana wonti, nina tanali matja dakana.
18Ja tanali wonina wonti nunkangu jaura murlali jinkila: “Murlali nganamai, jidni Juda kanaia Kapara!”
19Ja milingeru tanali nina mangatandra pitali nandrana wonti, ja nunkangu ngaltja worana wonti, ja nunkangu pantjaterkana ngarina wonti, ja nunkangu woraterina wonti.
20Ja tanali nina matja ngirkibana, tanali nunkangundru kati maralje dukarana wonti; ja kati pilki nunkani nunkangu widmana wonti; ja tanali nina dunkalkana wonti, nina kunarkuni katibala.
21Ja tanali kana kulno watawatali patana wonti, nau wiringanani, Simon Kyrenala, nau marundru wokarana wonti, Alexandrini ja Ruphuni ngaperi, nulu kunarku nunkani waltananto.
22Ja tanali nina Golgatha pirini wapalkana wonti, jenia wondrai: “Mangatandra piri.”
23Ja tanali nunkangu waina jinkina wonti nina kaldrieli ngokana, tapananto; ja Nulu nina wata manina wonti.
24Ja tanali nina kunarkuni matja katibana, tanali kati nunkani puntibana wonti wontjani malkali, warle palpa mainanto.
25Jendranguta tankubana ditji mirini nganana wonti, ja tanali nina kunarkuni katibana wonti.
26Ja tanali miri jaura kurana wonti minandru Nau palinanto: “Juda kanaia Kapara.”
27Ja nunkangu jela tanali watawatali maninietja mandru kunarkuni katibana wonti, kulno nunkangu ngunarani ja kulno nunkangu worangantjuni.
28Ja jaura morlalu pantjina wonti, nauja jatai: “Bakana madlentji ngankanietjani terti Nau parananto.”
29Wiringanietjali nina ngirkibana wonti, ja tana mangatandra walkina wonti ja jatana wonti: “Haha, jundru Godaia punga tamburibanietja ja wotinietja ditjini parkulani.
30Jidni munta kulkateriau, ja kunarkundru ngariau!”
31Tanali jeribaka nina Priesta pirnali ja jaura jinkinietja jelali ngirkibana wonti ja jatana wonti: “Kana nguru Nulia kulkana warai, ja muntali Nauja ngandandariai kulkaterila.
32Christus, Juda kanaia Kapara, karari kunarkundru ngariatimai, ngangau ngaiani najinanto ja morlalu ngundrananto.” Bakana pudlali nunkangunto kunarkuni parana, nina ngirkibana wonti.
33Ja matja todarina, ngalpuru pirna pantjina wonti ditji kunarkujelu.
34Ja ditji kunarkuni Jesus ngaiala pirnali maritjina wonti ja jatana wonti: “Eloi, Eloi, lama sabachthani?” Jenia wondrai: “Godajai ngakani, Godajai ngakani; minandru jundru ngana worarana warai?”
35Ja palpa tanangundru naka terkana, ja jenia ngarana, jatana wonti: “Mai, Nulupini Elias karkai.”
36Kulno mindrina wonti ja miritipa kulno kaldrieli ngapatjanka ngankana wonti, ja nina pitani widmana wonti ja nunkangu jinkina wonti tapananto, ja jatana wonti: “Worani, ngaiana najinanto Elias kara wokarala nganai ninaia ngarilkala.”
37Ja Jesus ngaiala pirnali maritjina wonti ja palina wonti.
38Ja kati pirna Godaia pungani puraterina wonti terti mirindru ngarinalujelu.
39Juljaia kaparali, nau nunkangunkari terkana, nulu najina, Nau ngaiala pirnali palinani jatana wonti: “Morlalu Naupini kana Godaia Ngatamura nganana warai.”
40Jerra bakana widla nganana wonti, tanali woritandru najina wonti; tanagundru Maria Magdalala ja Maria, Jakobus wakani ja Joseni ngandri, ja Salome nganana wonti.
41Nau Galilaiani nganana tana nunkangu karipaterina wonti ja mili nunkani nganana wonti; ja marapu morla, tana nunkangu jela Jerusalemia tarana wonti.
42Ja matja kalkaurarina, ngangau ngankingani ditjj nganana, jenia wondrai ditji kulno wiringani ditjini ngopera.
43Joseph Arimathiala, kapara pirna kulno, nulu bakana muntali Godaia mililani kalkana, wokarana wonti; ja nau japanguru Pilatungu wirina wonti ja Jesu palkuni ngatjina wonti.
44Pilatus ngaruparana wonti, Nau matja nari; ja nulu juljaia kapara karkana wonti ja nina jakalkana wonti, nau matja nari?
45Ja nulu jenia juljaia kaparandru matja ngujamana, nulu Josephangu nina palku jinkina wonti.
46Ja nulu kati burungankana wonti, ja nina ngarilkana wonti, ja nina katieli karana wonti, ja nina narikutuni kurana wonti, nulu nina marda taldrani matja bakuna, ja nulu marda kulno narikutuja manani tirimalkana wonti.
47Maria Nagdalalali, ja Maria Joseni ngandrieli najinn wonti, woderi nulu nina kurana wonti.
