1Ubaubanai boiboḡi, pirisi babadai ma dogadogara ma tarawatu babadai anatapui i viboru ma i vianina da Iesu i pani ma i veredamanei Pilate au urana.
2Pilate, Iesu i vitara-virevirei i pa, “Tam mai Jew ai gulau bo?” Iesu i paribelei i pa, “Anina e ririwa nanare.”
3Pirisi Babadai e viviwavuim kaua maḡamaḡaui aubai.
4Ma nanare Pilate, Iesu i vitaraviravirana-melei i pa, “Tam ma paribelana bo eḡa? Ma nonori e viviwavuim kaua maḡamaḡaui aubai!”
5Wate Iesu i genuana ma eḡa ita paribelei. Ma Pilate i ba kaua.
6Taui ai kaua maemaena da Raḡona Torelana au marana, Pilate, panipani tagogi, rava ai ḡoanei e ruperupeni ma e vovoterei da e nenae.
7Oroto tagogi wavana Barabas; tauna Rome gabemani i viḡaviei ma i pani da panipani au numana i mamae. Ana rava maiteni tauviraḡena.
8Ma patara i ḡeta da Pilate ita vibaḡai da panipani tagogi ita rupeni Raḡona Torelana au marana.
9Pilate i paribelei, “Taumi o ḡoeḡoei da mai Jew ai gulau ana rupeni aubaimi bo?” Pilate i aramanei da Pirisi Babadai, Iesu i unurei ma lamna aubaina Iesu i veredamanei tauna awarina.
11Wate Pirisi Babadai, patara i egari da Pilate, Barabas ita rupeni ma eḡa Iesu.
12Pilate, patara i paridadana-melei i pa, “Tauna o ḡoreḡoreia mai Jew ai gulau mena ana kauanei?”
13Taui i garara, “Ma tuparatui!”
14Pilate i riwa, “Aiwai apoapoena i kauei?” Ma taui i garara guratana, “Ma tuparatui!”
15Pilate i ḡoei da patara ita vinuaubai ma Barabas i rupeni ma sorodia i egari da Iesu i kwapui da i vitaratarai ma i naei da ita tuparatui.
16Sorodia, Iesu i taravaina-ruiei Pilate ana au numa ma ai rava ḡelaui i ḡoreiai.
17Ma gara lebalebarina me gulau ana gara Iesu i vioteni ma kunuteia ai donadonanei i viri da au kolana i terei.
18Ma vinamana i raukarei ma i garara, “Egualau mai Jew ai gulau!”
19Ma kolana gonuei i raviravi ma i ovaovai. Ma ae-tutuiei i mae-ḡaira au doa ma i raudunelei ma i vivinamei.
20Ma i vijiboḡa vorovei ma gara lebalebarina i voḡiḡi-tawanei ma ana gara i vioteni. Ma i taravaina-opunei da ita tuparatui.
21Taui i nenae ma Simon i nelaḡai, rava Sairiniei (tauna Rufus ma Alexander amai). Simon wapuei i nenei. Ma sorodia, tauna i egari da Iesu ana korosi i avarai.
22Taui, Iesu i naiei da gabu i ḡoreḡorei Golgotha, lamna anona unu gabuna.
23Sorodia, wine bunama myrrh maiteni i virai ma Iesu i veredadani, wate tauna i geduaiei.
24Ma Iesu i tuparatui ma ana gara, taui ava au orai i ḡutai.
25Ubaubanai 9 kilok nanare, Iesu i tuparatui.
26Aniviwavuna i girumi ma i tutui, “Mai Jew ai gulau.”
27Danedanenei ruaḡa, Iesu au ririvana i tuparatui; tagogi au oiena ma ḡelauna au kelakelauna.
29Taubabara, kolai i kwajikwajiei ma Iesu i vivinamei, “Na! Tam Tempol taurikaina ma au pom tonuḡa ma voa-melei.
30Ma vilawana-melem ma korosiei ma ḡairai!”
31Ma nanare Pirisi Babadai ma Tarawatu Babadai maiteni, Iesu i vivinamei, “Rava ḡelaui i vilawani, wate ainelana ita vilawana-melana-avei.
32Keriso Tauvilawana, Israel ana gulau; marina korosiei ma ḡairai ma tana inanai da tana vitumaḡanei!” Danedanenei i tupatuparatui maitenai, Iesu i vinamei.
33Ma au benai dobu anatapuna i waguvarei da 3 kilok au bigai.
34Lamna maranaina Iesu ponana i rata ma i kwatu, “Eloi, Eloi, lama sabachthani?” Lamna anona, “Au God, au God aiwai aubaina u netawaneu?”
35Ma rava ḡelaui au ḡereḡere i maimairi i nonori ma i riwa, “Ona rautaniḡanei, Elijah e kwatukwatuei!”
36Ma rava tagogi i ruba da gara ai au damona i pani ma au wine tomatomana i vigaloi ma i voepai Iesu au ipirina ma i riwa, “Ona vipaipai ma tana inanai mepa da Elijah ina nei da ina tereḡairei.”
37Ma Iesu ponana i rata ma i kwatu ma i lavutu tawanana.
38Ma Tempol au orana anitereḡaḡara au pouna i wanasikai au tepana da i ḡaira au doa.
39Ma sorodia ai bada, Iesu au naona i maimairi; i ʼnanai da i lavutu tawanana ma i riwa, “Wei anina God Natuna.”
40Waivine ḡelaui aueia i mae ma i raraubiga: Mary Magdalene ma Mary (James keikeina ma Joses aloi) ma Salome.
41Taui, Iesu i votaḡotaḡoi ma i vovoagui maranai au Galili i mamae ma waivine ḡelaui maḡamaḡaui, tauna maiteni i ḡeḡae au Jerusalem, anatapui kampa.
42Ma au biga i tuturiai Joseph Arimatheaei tauna rava ḡaeḡaena tagogi boru ḡetelarana au orana. Tauna God ana vigulau ana nei i vipaipaiei. Ma vokaukaua marana (Lamna Sabat au naona) ma Joseph ana tepatorana, Pilate awarina i rui ma Iesu taubeuna i vibaḡei.
44Pilate i baiei da Iesu boiboḡi iʼraḡe. Tauna, sorodia ai bada i kwatuei ma i vitara-virevirei da Iesu iʼraḡe bo eḡa?
45Maranai sorodia ai bada i pariverei da anina riwa kaua. Ma Pilate, Joseph i riwei da Iesu tupuana i vaia.
46Joseph, gara maiana ḡaeḡaena i gimarai ma Iesu tupuana i tere-ḡairei. Garei i umai ma au guba tupuana i vimataveni ma ḡaima ḡaeḡaena i kaipeuri da kokoaga metaetana i viaitomeni.
47Mary Magdalene ma Mary - Joses alona i ʼnanai mepa Iesu taubeuna i vimataveni.
