1ꞌEnega tomwa ꞌiulisina ga totaliyao sinabwadi be ꞌinapwanao be loina ꞌadi toeꞌitao be toloinao maiboꞌadi sideli egogonama ga siloiloina Yesu manuna, ꞌenega nimana siyonidi ga sitauyena Pailato ꞌena be ꞌaene Pailato nina ꞌida loine.
2ꞌEnega Pailato Yesu ꞌienaidena, ꞌigwae, “ꞌUda simana, ꞌoyo me Yudia ꞌidi kini, aga?” Ta Yesu ꞌigwae, “Niꞌatu nate ꞌuona saba.”
3Ta ꞌenega totaliyao sinabwadi yage yaudi manudi Yesu sieꞌewena.
4ꞌEnega Pailato Yesu ꞌienaida limena, ꞌigwae, “Mwaꞌadega nigeya ꞌimu eꞌisamo? Simana getedi ꞌamu eꞌewa manuna ꞌunononaya?”
5Ta Yesu nigeya ꞌebweu wate ꞌieꞌieꞌisa, ꞌenega Pailato nuwana ꞌiowana sinabwana.
6Yakwala ꞌebweuna ꞌebweuna Ataona Sagalina ꞌana tuta ꞌenaya toloina nina ꞌina bubuna nate deliyega ꞌebweu tai ꞌiliꞌami be ꞌiapwesa, ꞌeguma yaita pwalu siesinuwe.
7Tuta gote ꞌena ꞌaina me Loma ꞌadi talauwalao deliya simiyami, manuna geya nuwadi me Loma ꞌidi loina ga silosaiyedi, ga ꞌebweuna ꞌediyega ꞌana esana Balaba, losaiya nina solanaya tomota ꞌiloemwawasidi. ꞌEnega me Loma Balaba magosenao sigiyaidi ga deliya sisaꞌudi.
8ꞌEnega boda siegogonama ga siꞌawanoi Pailato ꞌenaya, sigwae, “Sawesawenaya be ꞌebweu tai ꞌuda liꞌami manuma, nadigega ꞌima sidasida ꞌemuya ꞌuguiguinuwe yakwala ꞌebweuna ꞌebweuna ꞌenaya?”
9ꞌEnega Pailato ꞌieonedi, “Nuwanuwami ꞌaene me Yudia ꞌimi kini yada ꞌetoliꞌami manumi, aga?”
10Manuna Pailato ꞌimwalatonina ꞌaene totaliya sinabwadi ꞌidi eꞌipiꞌipiyega Yesu siwasegigiyena sabi loemwawasina.
11Ta saꞌi totaliya sinabwadi niꞌatu tomota nuwanuwa toꞌumalina sienuwa saꞌuyena ꞌediya, ꞌenega Yesu siguitoyasena ta Balaba esiya ꞌana esana siꞌinanena be ꞌida liꞌami manudi.
12Ta Pailato ꞌieonedi wate ꞌigwae, “Ta mwaꞌadega yada loinaꞌesa tauna waeesena ꞌimi kini?”
13Ga wate sibwau, sigwae, “Kelose ꞌena tada tutuepaꞌiye!”
14Ta Pailato ꞌigwae, “Toꞌase sana ꞌina loegesi ga ꞌenega ꞌaene mwawasa ꞌiloba?” Ta sibwau toitoila, sigwae, “Kelose ꞌena tada tutuepaꞌiye.”
15ꞌEnega Pailato nuwanuwana be pwalu ꞌida giegwausowalidi ga Balaba ꞌiliꞌamina, ta wate ꞌina tolosaiyao ꞌiloinedi be Yesu balaeyega sida sapi be muliyega sida tutuepaꞌiye kelose ꞌenaya.
16ꞌEnega Pailato ꞌina tolosaiyao Yesu sisapina ta siꞌauꞌewena ga ꞌina anuwaya siluguyena, nate tolosaiyao ꞌidi sena sinabwana anuwa solanaya, ga tolosaiyao ꞌidi bodao maiboꞌadi sibwau egogonedima.
17ꞌEnega toesaesao ꞌadi ꞌoama bweyabweyalina ꞌenega Yesu sieꞌoamena ga ꞌana peyaula kwakwakwala ꞌediyega siguinuwena ga debanaya sisaꞌuna.
18Ga silolagata be tuyeya ꞌenega silokagutokiye, sigwaegwae, “Kamatoki ꞌoyo me Yudia ꞌidi kini ye!”
19Ta wate ꞌetoguna ꞌenega Yesu debana sisapina, ta sigiwalina, ga tuyeyega matanaya siꞌaetulasa.
20ꞌEnega ꞌidi tuyeya ꞌigumwala, ga ꞌoama esaesa ꞌenega sialolona, ta tauna ꞌana ꞌoamega sieꞌote limena, ga siꞌauꞌewena sabi giekelosena.
21Ga ꞌasa sinabwana ꞌenega siapwesa, ga goma Sailini mitawega ꞌimeemai silobena, ga sididigena be Yesu ꞌana kelose ꞌida ꞌaali. Tai nina ꞌana esana Saimoni, ta Alekisana be Lupuso tamadiya.
22ꞌEnega siꞌauꞌewena sena Goligota ꞌenaya (Goligota ꞌana mwalatoi nate ‘Bulubulu ꞌasana’),
23ga oine be mulo siꞌeinisena ga siꞌebwaꞌena be ꞌaene geyaꞌabo uya ꞌilotolotoo sinabwana, ta Yesu ꞌiguitoyasena.
24ꞌEnega kelose baleꞌuya sisaꞌunaya ta Yesu ꞌenaya situtu epaꞌiyena ga sietoolona. Ga muliyega toguinuwa nidi Yesu ꞌana ꞌoamao siꞌewedi ga sieguyaiyedi taudimo ꞌediya, ta ꞌidi eguyai esasala ulaesinuwa ꞌenega, be ꞌeguma yaita ꞌinugana ꞌana ꞌoama ꞌebweu ꞌiꞌewa.
25Tuta nina Yesu sigie kelosena nate gonagona ꞌana gamwagamwana ꞌenaya.
26Ta ꞌana kelose ꞌenaya siꞌetoladina “Me Yudia ꞌadi toloina.” Nate ꞌina mwawasa ꞌalena.
27Ta wate toꞌipwala ꞌeluwa sigie kelosedi, ꞌebweu Yesu ꞌatainaya ta ꞌebweu gegeuminaya.
28(-)
29Ta tomota ꞌaina ꞌedega Yesu kelose ꞌena situyeyena ta siedagiyena, sigwae, “Nuwaꞌoleꞌoleyo! ꞌUona ꞌaene sawesawemuya Anuwa Tabu ꞌuligei be ꞌasiyata ꞌetoi soladiya ꞌuꞌabilima.
30Baga ꞌuda ꞌetoseyeyo tauyo be keloseyega ꞌuebusima.”
31Ta wate totaliyao sinabwadi be loina ꞌana toeꞌitao taudimo ꞌediya sionaona gagasa, ga Yesu siꞌeetetena, sigwaegwae, “Mali tomota ꞌiꞌetoseyedi ta tauna ꞌida ꞌetoseye!
32Tauna ꞌaene Toꞌetoseyana nina ta sena Isileli ꞌana toloina, abaga keloseyega ꞌida ebusima be taꞌita, be ꞌenega taemise.” Ta toꞌipwala nidi Yesu maꞌenao sigie kelosediya taudi ꞌadi keloseyega sibwaꞌonao ga Yesu sibaꞌena.
33Ta niꞌatu ꞌasuoleole sena maiboꞌana ꞌiguguyoi ga ꞌana laba ꞌasuinuwanuwaya,
34ga ꞌasuinuwanuwaya Yesu ꞌenana sinabwanega ꞌibwau, ga ꞌigwae, “Eloi, eloi, lama sabakitani,” ta ꞌana gibui ꞌaene “ꞌIgu Yaubada, ꞌigu Yaubada, toꞌase manuna ꞌupilisinegu?”
35Ta ꞌaina tomota selabenaya sitootoolo ꞌina bwau sinonona ta sigwae, “Wanono, Ilaitiya ꞌibwaubwauye.”
36ꞌEnega ꞌebweuna ꞌediyega ꞌipili ga balou ꞌiꞌewena, ga oine dalelena ꞌena ꞌietupaꞌutuina, ꞌenega ꞌebweu kaiwe ꞌena matana ꞌibadiyena ga ꞌieꞌetotuꞌeyena Yesu ꞌawanaya be ꞌisokuku, ta tai nina ꞌigwae, “Tuga tayamwayamwa, nai ꞌiabe Ilaitiya ꞌimama be keloseyega ꞌiꞌetoseye.”
37Ta Yesu ꞌibwau toitoila ga yawasina ꞌigumwala.
38Ta kaleko nina Anuwa Tabu ꞌana pitaupa ꞌiesabu luwena etanega ga ꞌimwaꞌuta ꞌubunaya.
39Ta tolosaiyao ꞌadi toanugana Yesu ꞌana kelose matanaya ꞌitootoolo Yesu ꞌina mwawasa ꞌana ꞌita gete nadigega ꞌiꞌitena, ꞌenega ꞌigwae, “Onaꞌaiꞌaila tai gote Yaubada natuna.”
40ꞌAina iine wate ꞌedasolega sidunedune, nate Meli Magidala be ꞌina waliyesa, tauna Yosese be tasina megwamana Yemesa sinadiya, be Salome wate,
41taudi lowa Yesu simuliyena ta ꞌana masula siguinuwenaya ꞌina sakowasi Galili solanaya manuna, ta ꞌaina iine wate Galiliyega Yesu maꞌenao silagama Yelusalema ꞌenaya, maiboꞌadi siduneduneye.
42Ta niꞌatu ꞌasuinuwa ga gibubuna mali ꞌasiyata manuna, nate me Yudia ꞌidi Sabate.
43ꞌEnega goma Alimatia ꞌana esana Yosepa ꞌimai, tauna ꞌebweu me Yudia ꞌidi toanugana ma ꞌana emisa, ta ꞌiyamwayamwa be to tuta Yaubada baleꞌuya ꞌida etoloina. Tauna Yosepa nina ꞌimai ga ma ina ꞌatepatu ꞌilugu Pailato matanaya ga Yesu kokowana ꞌisidena be ꞌaene ꞌida saꞌuꞌaliꞌaliye.
44Ta ꞌenega Pailato ꞌilosuyaena, ꞌigwae, “Iyae! Yesu niꞌatu ꞌimwawasaya?” ꞌEnega tolosaiyao ꞌadi toanugana ꞌibwauyenama, ga ꞌimai, ga Pailato ꞌienaida, ꞌigwae, “Mwaꞌadega, Yesu niꞌatu ꞌimwawasa?”
45Ga tai nina ꞌigwae, “O, niꞌatu ꞌimwawasa.” ꞌEnega Pailato ꞌitagwala be Yosepa Yesu kokowana ꞌida ꞌewa.
46Ga Yosepa kaleko wakewakekena ꞌigimwanena ga ꞌiꞌewenama, ga ma ina toguinuwao Yesu kokowana kelose ꞌenega siꞌewa mwaꞌutenama, ga kaleko nina ꞌenega siwaduna, ga muliyega sisaꞌu ꞌaliꞌaliyena. Ta ꞌaliꞌali nina sitainaya ꞌatuwa duluwa gulewa solanaya, ta gulewa sinabwana ta pulipulina ꞌenega ꞌaliꞌali ꞌawana sisaꞌu bodena.
47Ta Meli Magidala be ꞌina waliyesa, tauna Yosese sinana, maꞌiyana sieꞌasiyedi ga ꞌaliꞌali nina ꞌena kokowana sisaꞌuna siꞌitena.
