1Xaba paquescaiya sacerdote hapobo, judiobaan hanibo, huishani honanbo, jaabo rahsibi tsinquitax yohinani. Jesus menexxon hioxon Pilato hinancanquin.
2Pilatonen sca yocaquin: —¿Mia min judiobaan quiquin hapo quin? —hahquin. —Min yohihi quesca rahan —hahquin.
3Hahqui tiromahi yohuanquin sca cahen sacerdote hapobaan joi tsamanscaquin.
4Pilatonen sca jaa yocarihbiquin: —¿Min jahua yohiti yamahin? ¿Mihqui hicha yohuanquin joi tsamanaibo min nincayamahin? —hahquin.
5Yocacah bi Jesus jahua hihyamascaiya Pilato rahteti.
6Pascua fiesta tian ta jan sipojani huesti Pilatonen jato picoxonpahonishqui, jaabaan yocacai huesti picoxonquin.
7Jaton quiquin hapo potacatsihquin, rehtenanxon huetsa jonibo rehtehiton jan sipojanibo jai. Huesti cahen Barrabas janeya.
8Tsamajaquetai jonibo mapexon sca, jan jato hahxonpahoni quescajaquin Pilatonen jato hahxonnon yocacanquin.
9Yocacatsihquibo bi jaan pari yocaquin: —¿Judiobaan quiquin hapo hen mato picoxonti man queenyamahin? —hahquin.
10Sacerdote hapobo notsi notsixon hinanai honanscaxon jascajaquin.
11Jascahah bi cahen sacerdote hapobaan tsamajaquetaibo yohuanquihnquin sinamaquin, Jesus yocatima shinanahbo. Sinaxon sca Jesusma bi Barrabas jan jato picoxonnon yocacanquin.
12Jascajahiton Pilatonen jato yocarihbiquin: —¿Barrabas picoxonti man queenaiya maton quiquin hapo hahcaibo joni cahran? ¿Jaa hean jahuejatihin? —jato jaquin.
13—Jihuin hueonhue —hahcanquin coshin bi res.
14—¿Jahua copi nan? ¿Jahua tiroma jaiquin? —jato jaquin Pilatonen. Jan jascahah bi hashoan coshin sca yohuancani: —Jihuin hueonhue —hahcanquin.
15Jenimahabo sca Pilatonen Barrabas jato picoxonquin. Jesus rishquimaxon, jihuin hueonnon hihxon, bihnahue jato jaquin.
16Bihnahue hahca hapon xobo chicho sca sontarobaan Jesus hioquin, pretorio janeya xoboho. Jano hioxon sca hahbe sontarobo jatihibi quenacanquin.
17Yancon chopa sahuemaxon moxa maitijaxon maimacanquin.
18—Jihuehue, judiobaan quiquin hapon —hahcanquin hapojahicamaxon.
19Jascajaxon jihui taxon marishquicanquin. Hahqui toshbanhihcani. Hapojahicamaxon hahqui raboxonen tisquihahpaquecanquin.
20Hosanquin queyoscaxon yancon chopa pecaxon jahuen chopa sahuemacanquin. Sahuemaxon jihuin hueonnoxon sca hiocanquin.
21Simon janeya joni cahchihoh quehax jahuex jano huinotaiton jahuen coros hiamacanquin. Jaa ta Alejandro betan Rufo jaton papa hihpahonishqui, Cirene mai janinhah.
22Jano Gólgota jane jaiton hiocanquin. Gólgota cahen mapo xaoya manan hihcatsihqui.
23Mirra rahoya vino mescoxon xehamacatsihquibaan bi queenyamahi.
24Jihuin hueonscacanquin. Jahuen chopabo metisahcanquin. Tsoana banetihiquin hihxon macan bero borasa qui nanexon chicoha huetsa pari cainaiya huetsan bihnon, huetsa macan pari cainaiya huetsan sca bihnon.
25Bari hihinahtaiya hueoncanquin.
26Jahua copi rehtehiquin honanahbo hihxon quirica sca hueoncanquin. Judiobaan quiquin hapo, hihqui jaa quirica.
27Rabe yometsoh rihbi hueoncanquin, huetsa jahuen mecayaho, huetsa jahuen memiho.
28Jaatianbi ta huishani joi quesca sca janishqui: Hohchataibo betan hihqui shinanxon rehtehah ta qui, hihqui jaa joi.
29Jano huinotaibaan sca jaton mapo bose bosehihcahinxon hosanquin. —Heeeen. Papan xobo potapaquehipixon tah hen quimisha neten hihxon jaa xahnen hen huenirihbiyaxihqui hih ta min jaipiqui.
30Coros janinhax bototax mihmebi sca teehihhue —hihcani.
31Sacerdote hapobo, huishani honanbo betan jascarihbihi yohuani. Hosancanquin. —Caibo teehihmaxon bi ta hahmebi teehihti hahtipahyamahiqui.
32Criston, Israelibaan quiquin hapon, coros janinhax rahmabi botopaquequihranhue, botoquihranai mia jisxon non mia nincacoinnon —hihcani. Hahbe hueonahbaan rihbi hosanquin.
33Barin manan tsacahiya sca jatihibi mai bahquishihcahinscai, bari racapaquenon caman.
34Bari racapaquetaiya sca Jesus coshin yohuani: —Eloi, Eloi, ¿lama sabactani? —hahquin. Papan Dios, Papan Dios, ¿jahua jenquetsahin min hea jenescain? hihcatsihqui.
35Jan jascahi nincaxon: —Jisnahue, Elías ta quenahiqui —hahcanquin jano nichibaan.
36Hishtocahinxon huesti jonin xehati cachani qui taco quescapah maosahxon jihui taxo qui queonxon sananhihnixon xehamaquin. Xehamaxon: —Mananahue. Jaa botonnoxon Elías jahui non jisnon.
37Jaatian sca saisaihihquish Jesus mahuascai.
38Jaatianbi ta Papan xobo janin rontamehtai chopa chique huaxacahinnishqui, bochiqui janinhax naman caman.
39Jesus bebon nihxon jan jascari mahuatai jisish capitan sca yohuani: —Hihcoini, nea ta Diosen baque qui —hahquin.
40Haibobaan rihbi ta hochoxon jisnishqui. Huetsa cahen María Magdalena, huetsa cahen María, hoa chinitai Jacoboya José jaton mama, huetsa cahen Salomé. Jano nihxon ta jiscannishqui.
41Galilea janin Jesus nichiya cahen jaabaan jaa chibanpahonish. Jaa pimarihbipahonish. Jesus betan Jerusalen janin jahuipi haibobo rihbi ta jano nihxon jiscannishqui, hichaxon.
42Yantanscaiya cahen bahquish tantiti neten piyanoxon pitijacanquin, jaton pitijati neten.
43Jaa copi jahuen raque potahax Pilato janin caxon Jesusen yora Josepan yocaquin. Jaa José ta Arimatea janinhah hihpahonishqui hahbe hapobo tsinquinica, shinanyahpa joni. Papan jihuemahi jiscatsihqui jaan rihbi manaquin.
44Jesus mahuascai nincacax Pilato rahteti. Capitan quenaxon sca yocaquin: —¿Mahua sca jaiquin? —hahquin.
45—Mahua sca ta jaaxqui —capitan jaiya jeenhihscai, Josepan jahuen yora bihnon.
46Sábana maroxon Jesus botonpaquexon sabananen rahcoxon macan xanquen poquinipibo tsahon chicho racanquin. Macan taranxon sca tsahon quini behpoquin.
47Jan jano tsahonai ta María Magdalena betan Josepan mama Marian jisnishqui.
