Luka 16:15-26

¹⁵A o Isus phendas lenđe: “Tumen ćeren tumen kaj sen pravedne anglo them, ali džanel o Del tumare ile. Kaj so e manuša smatrisaren vredno, e Devlešće grjacolpe.”

¹⁶Sikavenas e Mojsijasko zakono thaj e knjige save ramosardine e purane prorokurja, sa dok či avilo o Jovano savo bolelas, a katar askal mothos e lačhi nevimata palo carstvo e Devlesko. Thaj nagovoris savoren te den ando carstvo e Devlesko.

¹⁷Ali godova či značil kaj e Mojsijesko zakon majbut či vredil kaj majloće nestanila o nebo thaj e phuv, nego te propadnisarel jek tačkica andar o zakono.”

¹⁸Svako kova savo rastanilpe katar piri romnja thaj lel avrja, ćerel preljub; thaj ko oženilpe e romnjasa savi si rastanime, preljub ćerel.

¹⁹Sas varesosko barvalo manuš, savo lelas pe peste majšukar pohtan katar o grimiz thaj svila, thaj trailas svako đes raikane thaj veselilaspe.

²⁰A angle lesko vudar pašljolas varesavo čoro manuš savo sas sa ande čirurja. Lesko alav sas Lazar,

²¹thaj čeznilas samo te čaljol e mrvicenca kaj perenas katar e barvalešći sinija. Dok gajda pašljolas avenas e džućhela thaj čarnas e čirurja pe leste.

²²A kana mulo o čoro, e anđelurja inđardinele ande Avraamešće angalja. Pale godova mulo vi o barvalo manuš, thaj prahosardine les.

²³A lešći duša đeli po than kaj si e mule, thaj dok sas ande bare muke vazda pire jakha thaj dadural dikhlas e Lazare ande Avraamešće angalja.

²⁴Thaj čhutas muj: “Dade Avraame, smiluitu manđe thaj bičhal e Lazare te umočil piro naj ando paj thaj šudrjal mungri čhib kaj zurales mučiman ande kava plameno.”

²⁵Pe godova phendas o Avraam: “Detut gođi, čhaveja, kaj tu pale ćiro trajo primisardan ćiro lačhipe, a gajda vi o Lazar piro bilačhipe. Akana vo akate tešilpe, a tu mučistu.

²⁶Osim godova, maškar amende thaj tumende si bari provalija, thaj vi okola save kamlinesas naštik naćhen okotar akaring, niti akatar okoring.”