ሉቃሳ 16:15-26

¹⁵ሺን ዬሱሲ ኡንቱንታ፥ «ሂንቴንቱ ኣሳ ሲንꬃን ሂንቴንታ ፂሎ ኣሳ ኦꬂያዋንታ፤ ሺን ፆሳይ ሂንቴንቱ ዎዛና ኤሬ፤ ኣያው ጎፔ፥ ኣሳ ሲንꬃን ቦንቼቴዳዌ ፆሳ ሲንꬃን ቱና ጊዴ።

¹⁶«ሙሴ ሂጊያኔ ናባቱ ፃፌዳ ማፃፋ ዮሃኒሳ ዎዲያ ጋካናው ኣሳይ ኣዛዜቲዴ ዴዔዲኖ፤ ሄዋፔ ካላ ቃይ ፆሳ ካዉቴꬃይ ኦዴቴዳ፤ ኣሳይ ኡባይ ያ ጌላናው ኬሴቴ።

¹⁷ሺን ሂጊያፔ ኢቲባይ ኣቲያዋፔ ሳሉኔ ሳዓይ ኣꬊያዌ ማታቴ።

¹⁸«ባሬ ማቻቶ ቢሊዴ ሃራሮ ኣኪያዌ ኡባይ ዎሹሜ፤ ቃሲ ኣሲናፔ ቢሌቴዳ ማጫዉኖ ኣኪያዌ ኦኒኔካ ዎሹሜ።

¹⁹«ጋቲ ሎይꬂዴ ኣልዖ ጊዴዳ ማዩዋ ማዪዲኔ ጋላሳን ጋላሳን ኦቶሩዋን ናሼቲዴ ዴዒያ ኢቲ ዱሬ ቢታኒ ዴዔ።

²⁰ቃሲካ ኩሜንꬃ ኣሳቴꬃን ማይꬃይ ዴዒያ ኢቲ ኣሊዓዛራ ጌቴቲያ ሂዬሳይ፥ ሃ ዱሬ ቢታኒያ ካሪያን ጊሴዳ።

²¹ሃ ዱሬ ቢታኒያ ሳምፓፔ ላሌቴዳ ሱፓ ማናው ኣሞቴ፤ ሃራይ ኣቶ ካናቱካ ዪዴ ኣ ማይꬃ ላጪኖ።

²²«ሃ ሂዬሳ ቢታኒ ሃይቂና፥ ኪታንቻቱ ኣ ኣብራሃሞ ባጋ ቦንቾሳ ኣፌዲኖ፤ ዱሬ ቢታኒካ ቃሲ ሃይቂዴ ሞጌቴዳ።

²³ሲዖሊያን ዳሮ ሴሌቲዴ ዴዒሺን፥ ꬎቁ ጊዴ ሃኩዋን ኣሊዓዛራ፥ ኣብራሃሞ ባጋን ዴዒያዋ ቤዔዳ።

²⁴«ኢካ ባሬ ኮሻ ꬎቁ ኡዲዴ፥ ‹ኣብራሃሞ፥ ታ ኣቦ፥ ታው ቃሬታ። ሃ ታማ ሴላን ሜቶታ ዴዒያ ዲራው፥ ኣሊዓዛር ባሬ ቢራꬊያ ፄራ ሃꬃን ቦቺዴ፥ ታ ኢንፃርሳ ኢርፂሳናዳን ሃያና ታኮ ኪታሪኪ› ያጌዳ።

²⁵«ኣብራሃሞ ቃሲ፥ ‹ታ ናዓው፥ ኔኒ ፓፃ ዴዓዴ፥ ሎዖ ዴዑዋ ዴዒና፥ ኣሊዓዛር ሎዔና ሜቶ ዴዑዋ ዴዔዳዋ ቆፓ። ሃዒ ቃይ ኢ ሃዋኒ ናሼቲያ ዎዴ፥ ኔኒ ሜቱዋ ቦላ ዴዓ።

²⁶« ‹ሃዋፔ ሃራይ ቃይ፥ ሃዋፔ ያ ሂንቴንቱኮ ኣꬋናው ኮዪያዋንቱ ኣꬌናዳን፥ ያኒ ዴዒያዋንቱካ ቃሲ ሃ ኑኮ ፒኔናዳን፥ ኑ ጊዶኒኔ ሂንቴንቱ ጊዶን ዎጋ ኣፉ ሜꬌቴዳ› ያጌዳ።