LUKAS 16:15-26

¹⁵Naž Jesusen' gože' ḻégake': —Ḻe'e ẕḻoé'ezele chawe' kwinle ḻawgak benách ka', san nnézkzele Dios da' yo'o ḻo yichj ḻáẕdo'le, dan' bi ẕḻe'el Dios chawe' da' ẕdan ḻáže'gak benách ka'.

¹⁶Ḻezka' wnná Jesusen': —Bengak žin da' bchi'le Moisés, na' da' bzojgak benne' ka' bcháḻjgake' ḻo wláz Dios, na' zejte ža wzóa Ẕwa. Naž katen' bḻa' Ẕwan', wzó ḻaw ẕze diža' kan gak cho'ogak benách ka' gan ẕnna bia' Dios, na' žon byengak yógo'te benách chó'ogake' ga na'.

¹⁷’Ḻa'kze žaken ki, gakže te che ya'abá, na' che yežlyó nga ka kwia yi' to díža'ze da' nyejwn ḻe'e yich da' ẕnna Dios.

¹⁸Ḻezka' wnná Jesusen': —Cha' no benne' byo wsane' ẕo'le', na' cha' wechág ná'ḻene' no'le yoble, gone' doḻa' da' ẕka'n ditjen yeḻa' ẕchag na', na' cha' no benne' byo wchág ná'ḻene' no'len' bsan benne' byo chie' ḻe', ḻezka' gone' doḻa' da' ẕka'n ditjen yeḻa' ẕchag na'.

¹⁹Naž bzaka' ḻebe Jesusen', na' wnné': —Wzóa to benne' wnni'a. Žakwe' laže' da' záka'ḻe'en, na' tža tža žónteze' lni, na' že'j žáwgake' da' dẕi'ḻe'e.

²⁰Ḻezka' wzóa to benne' yáche'do' ga na', benne' lie' Lásaro. Bennen' ẕnnable' no benne' bi da' wneẕjwe' chie', na' do ẕentie' žie' we', na' ži'e ža yo'o che benne' wnni'a na'.

²¹Žak ḻaže' benne' yáche'don' gawe' da' biẕjw ka' da' žéx̱jwgaken ẕan gan že'j žaw benne' wnni'a na'. Ḻezka' zej nnita' beko' ka' ga na', na' bel-ḻe'eba' ḻo we' ka' che benne' yáche'don'.

²²Bžin ža got benne' yáche'don', na' wbás che ya'abá ka' belchi'e ḻe' nich chejzóaḻene' Bran gan nak latje x̱tan che Dios. Ḻezka' got benne' wnni'a na', na' bkáche'gake' ḻe' ḻo yežw ba.

²³Kate' ne ẕzáka'ḻe'e bennen' góta'ḻe'e yeḻa' wnni'a chie', gan zoe' latje chegak benne' gat ka', na' bchis ḻawe', na' bḻe'ele' Bran, gan zoe' zí'to'le, na' zoaḻen Lásaron' ḻe'.

²⁴Naž wnníe' zižje, na' wnné': “X̱e, Bran, beyache' ḻaže'l neda'. Bseḻa' Lásaro ga zoa' ni nich yesbise' x̱ben ne'e, na' yedjsbise' loža'a, dan' ẕzáka'ḻi'a ḻo yi' nga.”

²⁵Bran na' gože' ḻe', na' wnné': “Ẕi'na', bejsá' ḻaže' kan gok chio', kan góta'ḻe'e yeḻa' wnni'a chio' katen' wzó' nbano', san Lásaro ni, gok yeḻa' yache' chie', na' na'a, žebél Lásaro nga, na' le' ẕzako'o ga na'.

²⁶Ḻezka', to žoa'a ya'a sibe naken, dan' zoan gachje ḻáwe'le gan zoale ḻe'e, na' ga zoato' neto' ni. Che ḻen benne' ka' nníta'gake' nga, cha' yénegekle' tégake' gan zoale ḻe'e, bi gak tégake', na' ḻezka' benne' ka' nníta'gake' ga na' bi gak yídgake' kile.”