15ꞌOugadu Iesuꞌa ziro, raenaꞌa, “Vaze ubumao zaꞌe zaeꞌa bare duduḡa raꞌohe, rehano Badiꞌaꞌe zae zamaꞌe sauꞌa rae edeḡa. Vazeꞌa ḡau boro raꞌeteꞌe ḡauḡaꞌe, Badiꞌaꞌa agirohauꞌenaꞌa mene urateꞌohe.
16Ioane Babatisoꞌa izema onairoteꞌe madaḡano, Mose goro ḡoeꞌa zu peroveta azaḡaniꞌa mirihiroteꞌe ḡoeꞌa vaze ibitoziniro. Eꞌe ḡarugano Badiꞌa hari manoḡaꞌe eḡeꞌa harameꞌohe, ebu vaze ḡehaḡaꞌe Badiꞌaꞌa ibitohauꞌeteꞌe habaꞌa diuḡoga veize inareꞌohe.
17Adure zu rahaꞌe dauḡiꞌuma, rehano Mose goro ḡoeꞌa komeꞌa hune zuni mene dauḡiꞌuma.
18Mose goro ḡoeꞌa ꞌahoga idaniꞌuma. Hahu ohozeꞌa inuga modadu roḡae ꞌahoga teite hahurine, aniꞌe daroꞌeꞌohe. Ebu ohoze ꞌahogaꞌe iꞌaniꞌa modiroteꞌe roḡaeḡa teite hahurine, ani zuni daroꞌeꞌohe.”
19Iesuꞌa hari ꞌahoga idaniro, raenaꞌa, “Maꞌora vazeḡa ꞌahoganiꞌa radiunu. Ani dabua miriḡa manoḡa vidaunu zu mada niduꞌa ani ogomu manoḡa aunu ebu ne manoḡa huneo radiunu.
20U ani ne ḡabiriḡa ibihetaḡano zahara vazeḡa niḡa Lazaroꞌa radiunu. Ani ahiriꞌe idiri ḡunuḡa.
21Ani maꞌora vazeḡaniꞌa fatao oganadu mumuḡaniꞌa rururaudoteꞌe ufe atihi reinu. Rehano ḡuniꞌa aradu ane idiri ubidinu.
22Ḡonagano Lazaroꞌa rudarotene tuḡure vigaꞌa ovadu Aberahamo vaḡe zamahu itiro. Ebu maꞌora vazeḡa zuni rudanadu guriro.
23Maꞌora vazeḡa vigaꞌe rune habaꞌa onamadu ani eꞌea huau ḡaniḡanauꞌenaꞌa ite ehamaro, ebu faḡano Aberahamo babaḡano Lazaro horoniro.
24ꞌOugadu aniꞌa huaro, raenaꞌa, 'Aberahamo, mama! Eḡe vetuḡahoꞌi! Lazaro tuḡunadu ane ꞌevoꞌa huduꞌa vuo taradu mazanehe amunanoꞌi! E ire roga duhuḡa zamaḡano gigiꞌa boro hideꞌohe!'
25Rehano Aberahamoꞌa naenaeniro, raenaꞌa, 'Ubude, ḡa ꞌahi zamaroꞌi! Ḡaꞌa rahao ḡabode radiudoteꞌe madaḡano ḡau manomano hidinu, u Lazaro ani aduga hidinu. ꞌAhine Lazaro ani izidi ahao matuꞌe rudauꞌohe, u ḡaꞌe gigiꞌa hideꞌohe.
26Ḡau ꞌahoga zuni ꞌahi eꞌe, emeḡe boꞌaḡanoꞌe dofara boro. Vaze ꞌahoga ahanoꞌo ḡa mone fare amoga mene idaḡa, ebu eme none fare aroga mene idaḡa.'
Luka 16
Luka 16:15-26