Lukas 16:15-26

¹⁵Di kagi ni Hisus kandan, “Kaniu ka ogpapitow dio to mgo otow to maroyow kow, di ka Magboboot ka ogkita kaniu ko nokoy ka duon to goinawa now, su sikan so igparakoldakol dio to goinawa to mgo otow ro, maroot lagboy dio to tangkaan to Magboboot.”

¹⁶Kagi ni Hisus, “Ka Balaod ni Moisis lagkos to mgo ingkasulat to dongan no mgo talagnangon to kagi to Magboboot, ian now pad natagaan no kagi to Magboboot kaniu taman to nignangonnangon si Huan no Talagbautismu to mgo otow. Bunsud ki Huan, nakarinog kow to soini no Maroyow no Nangnangonon tongod to Pogsakup to Magboboot to mgo otow, no mohon-ing ka mgo otow no ogpoomot ogsolod to Pogsugu to Magboboot.

¹⁷Di tongod to Balaod ta, kono ogkoimu no ogkaawo agad molintok do to sikan no impasulat ko waro pad matuman ka tibo no ingkasulat. Agad ko ogkaawo pa ka soin no langit woy ko soini no tano, kono ian ogkaawo agad sagboka ro no ingkasulat dongan to kagi to Magboboot.”

¹⁸Nigparagas si Hisus to kagi rin to, “Ka lukos no og-ongkod to asawa rin no oghutuk ogpangasawa dut dangob no boi, ogpakapanlibug sikandin. Ka sikan no lukos no og-asawoon ka boi no noongkoran to asawa rin, songo ogpakapanlibug sikandin.”

¹⁹Duon dangob no nangnangonon ni Hisus. Kagi rin, “Duon sagboka no otow no datu no nanginabo to lagboy no mahal. Ka sikan no datu, allow allow maroyow lagboy ka tibo no ogkoonon din.

²⁰Dio to libuwasan to gumawan din duon otow no lagboy ian bag no publi no ka ngaran din si Lasaru. Kandin, layun oghibathibat su natibo soi lawa rin, nigkogang.

²¹Si Lasaru, lagboy on ian oggutasan no ogkoiniatan din poron ka mgo timu no ogkoulug ligkat to lamisaan no ogkoonan to datu. Agad duon mgo asu no ogdani kandin no ogpandilaan to mgo kogang din.”

²²“No,” kagi ni Hisus, “namatoy on si Lasaru no ka mgo diwata no suguanon to Magboboot, nig-alap dan ka gimukud din dio to langit to longod ni Abraham” “Songo namatoy on ka datu no inlobong on to mgo otow ka lawa rin.

²³No ka gimukud to datu, dio makarolog to Hadis. Nabaybayaran on ian ka sika datu no poglonghag din, nigkita rin ka gimukud ni Abraham no dio to mariu, woy duon do ian nigpinnuu ka gimukud ni Lasaru to longod din.”

²⁴“Nò, nigbabansagon no nig-umow ka datu kuwo ki Abraham to, ‘Wow, Apu Abraham, kohoy-ui a nu ro. Sugua nu bag si Lasaru to oyow igtinduk din bag ka tinuru din duon to woig woy oghondini pa koddi oyow igpatuu kai to dilo ku oyow og-aguanta a su lagboy a ian ogkasakitan kai to soin no hapuy.’

²⁵Di nigtabak si Abraham to, ‘Apu, doromdoma nu ko manokal ka pad, waro kulang to pog-ugpo nu su maroyow no kalaglagan nu di si Lasaru atag, noumaan to maroot no pog-ugpo din di kai kuntoon, si Lasaru maroyow ka pog-ugpo di sikoykow kuntoon, ogkabaybayaran ka.

²⁶Igkarua,’ kagi ni Abraham kuwo dut datu to, ‘duon maralom no bitu no nokoolat kanta to oyow agad hontow no ogkoiniat poron ogbayo ligkat kai no oghondio poron to kaniu, kono ogpakabayo. Songo waro ogpakabayo ligkat dio to kaniu no oghondini to kanami.’