Luk 16:15-26

¹⁵Eme Jises tiye i toro anya, “Ado le baden adeh, anya, ado mwasin ta mada lau adeh, arile bwe, Kindrei badeh, tanan ndrine ado. Tasah, sasah lau atou ta mada iri, anya idoh aliy le ai; arile bwe! Ta mada Kindrei anyolom badeh, lakou ndra-in laleyah.”

¹⁶“Sahou ta nyala batanau mene Moses torowenei hawe iri sahou tiri propet badeh, sendrehendreh ta aliy kabatana le Jon ta alomwa, kabwe. Ya, sahou mwasin ta nyala tondrok ta Kindrei badeh, ndratiye udu kabatana Jon ta alomwa, eme taku idah. Eme lau mari badeh, atuw iri alih bolon.

¹⁷Kandrah hawe kon munyak dah kameh ano iu mara-ei. Arile, ari kono-o tarou badu bolo batanau malen winiyan ta bano bwe.

¹⁸“Ya, i buku none are lau katikahei udun ki-iu, ano ja iy kasudi badih ari ja, iy le mesekei karei i tan. Ya i buku none are ndramak kasudi ari badih udun ndratikahei iy, iy le mesekei karei i badan.

¹⁹“Ndramak ari badeh, lakou tan solo-an labai. Iy badeh, anyasou na lakou saraman mwasin asih na luk solo-an, ma iy badeh, iwer nyamon ta aimon na len mari.

²⁰Udu boho mwendreu tan badeh, ndramak ari nyaran Lasarus. Ya iy badeh, manyah udu andri, ma badan mari ndrarahak le soso-ou.

²¹Iy udu aliy badeh, atondrok kahu nyamon ta ndramak tan lakou solo-an kataku, ya iy kaimon. Ya iri mwi badeh, asom mada soso-ou tan.

²²“Ano, Lasarus imek ya iri angelo badu kandrah ame andrei iy ili manyah udu ka-u Abraham. Ano ndramak tan lakou solo-an ale imek, ya eme iri ahi iy.

²³Eme udu bolo jih kodo-oh badeh, odan isi, ma iy anyolom i len badeh, iy atou Lasarus manyah udu ka-u Abraham.

²⁴Eme iy aloh, ‘Tama Abraham, ou tikisi jo, ya ou suni Lasarus katehei andra limen ki ta gwa keme ta kalimek, ya kanyala. Tasah, jo akohok isi laba tinan labai, udu bolo jih dah!’

²⁵“Arile, Abraham anya, ‘Naduk, ou none lomondra ou mene ado awas se. Ou badeh, mene akohok lakou mwasin, ya Lasarus mene badeh, anyidiu lakou ndra-in. Arile, na dah, iy manyah udu mwasin ai, ya ou ado ta sisi-in ai.

²⁶Ya laba tinan labai ja badeh, lek laba tinan labai udu ndrokowa to kada-ah. Ma i buku none, are lau anya kudu dah kewek bilisiu hawem badeh, winiyan bwe. Ma ale, i buku none are lau kudu bilisiu tado badeh, anya keme hawe aso kameh winiyan bwe le.’