لُكِ 16:15-26

¹⁵عِسَ نَشَ عَ مَسٍن عٍ بّ، «وٌ وَ مَ وٌ يّتّ مَسٍنقٍ تِنشِنتْييٍ نَن نَ عَدَ مَدِيٍ يَ عِ، كْنْ عَلَ وٌ بْحّ مَ قٍ كٌلٌن. نَشَن تِدٍ فبٌ مِشِيٍ بّ، عَلَ نَ شْنشِ.»

¹⁶«عَننَبِ مُنسَ شَ سّرِيّ نُن نَمِحْنمّيٍ شَ كِتَابُييٍ نَن كَوَندِ هَن يَيَ شَ وَشَتِ. كٍلِ نَ تّمُي مَ، عَلَ شَ مَنفّيَ نِينِ شَ شِبَارُ قَنيِ نَن كَوَندِ مَ قَ، مِشِيٍ قٍ بِرِن نَن نَبَقٍ، عَلَكٌ عٍ شَ سٌ عَلَ شَ مَنفّيَ نِينِ بُن مَ.

¹⁷كٌورٍ نُن بْشِ لْيمَ نّ بٍينُن سِفِرّ كٍرٍن شَ بَ عَلَ شَ سّرِيّ رَ.»

¹⁸«شّمّ يٌ مّي عَ شَ فِنّ رَ، عَ سَ فبّتّ دْشْ، عَ كَنيِ بَرَ يّنّ رَبَ. نَشَن نَ فِنّ دْشْ شّمّ بَرَ مّي نَشَن نَ، عَ قَن بَرَ يّنّ رَبَ.»

¹⁹«شّمّ بَننَشِ ندٍ نُ نَ، نَشَن نُ لُمَ عَ مَشِرِ رَ دُفِ سَرٍ شْرْشْييٍ رَ. تّمُي بِرِن، عَ نُ شُلُنيِ نَن تِقٍ. لْشْ يٌ لْشْ، عَ نُ لُفَمَ دٌنسٍ حْشُنمّ نَن نَ.

²⁰مِسِكِينّ ندٍ نُ سَشِ يِ بَننَ شَ تّتّ سٌدٍ دّ رَ، نَشَن نُ شِلِ لَسَرُ. سُورِيٍ نُ نَ عَ قَتٍ بِرِن مَ.

²¹عَ نُ وَ مَ دٌنسٍ شُنتُنيِ ندٍيٍ نَن سْتْقٍ نَشٍيٍ نُ بِرَ مَ نَ بَننَ شَ تٍيبِلِ رَ. عَ تٌ نُ سَشِ نَا، بَرٍيٍ نَن نُ قَمَ عَ يِرٍ، عٍ نُ عَ شَ سُورِيٍ مَكْن.»

²²«لْشْ ندٍ مِسِكِينّ نَشَ لَاشِرَ، مَلٍكّيٍ نَشَ سَ عَ شَنِن عَننَبِ عِبُرَهِمَ يِرٍ. نَ بَننَ شّمّ قَن نَشَ قَشَ، عَ رَفَتَ،

²³عَ سِفَ يَهَننَمَ. عَ شَ حَشَنكَتّ كُي مّننِ، عَ نَشَ عَ يَ رَتٍ عَ سَ عَننَبِ عِبُرَهِمَ تٌ يِرٍ مَكُيٍ، عٍ نُن لَسَرُ.

²⁴عَ نَشَ عَ شُي رَ مِنِ، ‹ﭑ بَبَ عِبُرَهِمَ، كِنِكِنِ ﭑ مَ! يَندِ، لَسَرُ شّي ﭑ يِرٍ، عَ شَ عَ بّلّشّسٌلٍ رَ سِن يٍ شْورَ، عَ ﭑ نّنيِ مَشِنبٍلِ، بَرِ مَ ﭑ نَ يِ تّ نَشَن شْورَ، عَ ﭑ حَشَنكَتَقٍ عَ حَاشِ رَ!›»

²⁵«كْنْ عَننَبِ عِبُرَهِمَ نَشَ عَ يَابِ، ‹ﭑ مَ دِ، عِ شَ عِ رَتُ، عِ تَن بَرَ قٍ قَنيِ سْتْ عِ شَ دُنِحّءِفِرِ كُي، كْنْ لَسَرُ تَن تْورّ نَن سْتْ. يَكْسِ، عَ تَن بَرَ مَدُندُ بٍ، عِ تَن نَ حَشَنكَتَقٍ.

²⁶سَ نَ بِرِن شُن، فُلُنبَ بٍلٍبٍلٍ نَن سَشِ وٌن تَفِ، عَلَكٌ مِشِ نَشَ نْ كٍلِدٍ بٍ سِفَقٍ رَ عِ يِرٍ، مِشِ مَن نَشَ نْ كٍلِدٍ مّننِ فِرِقٍ رَ مُشُ قَن يِرٍ.›»