ᤗᤢᤁᤠ 16:15-26

¹⁵ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤃ ᤛᤍᤠᤍᤡᤱ ᤗᤠ᤺ᤰᤁᤠᤳᤗᤰ ᤏᤢ᤺ᤒᤠ ᤌᤠ᤺ᤶᤛᤡᤱᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤡᤰᤗᤢᤱᤔᤥᤒᤠ ᤐᤠ᤺ᤴᤏᤡᤴ ᤏᤡ᤺ᤛᤢ᤹ᤖᤥ॥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧ ᤂᤢᤏᤡ᤹ ᤏᤡ᤺ᤔᤠᤀᤥ ᤕᤶᤗᤠᤒᤠ ᤆᤥ᤺ᤰ. ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤡᤰᤁᤧᤗᤧ᤺ᤱᤒᤠ ᤆᤥ᤺ᤰᤗᤥ॥

¹⁶ᤜᤧᤰᤁᤩᤠᤱ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤕᤧᤶ ᤌᤠᤖᤡᤰ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤀᤡᤱᤈᤠ᤺ᤱᤜᤠ᤹ ᤀᤡᤱᤓᤴ ᤐᤥ᤺ᤰᤂᤧ. ᤁᤖ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤛᤢᤏᤠᤀᤡᤱᤅᤡᤴ ᤛᤧ᤺ᤖᤧᤀᤠᤱᤎᤥ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤛᤠᤰᤁᤧᤸᤗᤧᤰ ᤗᤠ᤺ᤵᤔᤠ ᤔᤧᤃᤥ᤺ᤳᤗᤥ॥

¹⁷ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤋᤠᤱᤛᤠᤰᤐᤧᤴ ᤗᤧᤰᤔᤠ ᤐᤣ᤺ᤰᤔᤠ ᤀᤢᤛᤢᤖᤢ ᤆᤥ᤺ᤰᤐᤡᤗᤠ. ᤁᤖ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤁᤧᤒᤵᤐᤠ ᤆᤢᤰᤛᤠ ᤁᤢᤛᤠᤵᤌᤡᤰᤁᤠᤱ ᤔᤧᤔᤠ᤺ᤏᤧᤴᤗᤥ॥

¹⁸ᤜᤠ᤺ᤳᤗᤧ ᤁᤢᤔᤣ᤺ᤳᤋᤡᤴ ᤏᤠ᤹ᤖᤢᤀᤠᤱ ᤘᤣ᤹ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹. ᤂᤧᤸᤗᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤕᤧᤶᤒᤠ᤺ᤸᤗᤧ ᤏᤠ᤹ᤖᤢᤔᤠ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹. ᤂᤧᤸᤗᤧᤀᤠᤱ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥”

¹⁹ᤕᤧᤛᤢᤖᤧ ᤕᤠᤶᤔᤥ ᤔᤧᤳᤋᤢᤛᤡ. “ᤀᤢᤴᤇᤣ᤺ᤴ ᤌᤡᤰᤗᤧᤱ ᤕᤠᤱᤛᤠᤁᤢᤴᤎᤣᤛᤠᤒᤠᤎᤡᤰ ᤘᤕᤧ॥ ᤂᤧᤸᤗᤧ ᤐᤖᤠᤴᤗᤠ ᤋᤣ᤺ᤳ ᤆᤠᤰᤂᤢᤖ ᤌᤡᤰᤕᤠ᤺ᤴᤎᤰ ᤆᤠᤔᤢᤰ ᤌᤡᤔᤢᤰ ᤆᤖ ᤘᤕᤧ॥

²⁰ᤔᤏᤠᤜᤠ᤹ᤖᤧ ᤗᤠᤈᤖᤛ ᤔᤧᤵᤔᤏᤠᤒᤠ ᤕᤠᤱᤄᤣ᤺ᤰ ᤀᤡᤛᤣ᤺ᤱᤒᤠ ᤕᤠᤱᤃᤧᤛᤠ᤹ᤒᤠ ᤔᤏᤠ᤺ᤴ ᤔᤧᤍᤠᤖᤢᤀᤠᤱ ᤁᤢᤗᤠᤶᤎᤣ᤺ᤵᤐᤥ ᤔᤧᤕᤢᤰᤂᤢᤖᤥ॥

²¹ᤂᤧᤸᤗᤧ ᤆᤠᤔᤠᤍᤧᤴᤏᤥᤗᤠᤶ ᤔᤰᤁᤧᤎᤠ᤺ᤒᤠ ᤁᤢᤈᤡᤜᤠ᤹ ᤆᤠᤔᤠᤀᤠᤱ ᤂᤠ᤺ᤳᤇᤡᤱᤔᤠ ᤏᤡᤱᤛᤠᤱ ᤆᤥᤃᤢᤀᤠᤱ ᤘᤕᤧᤖᤥ॥ ᤁᤥ᤺ᤳᤆᤥᤜᤠ᤹ᤖᤧᤀᤠᤱ ᤁᤢᤕᤠᤱᤄᤣ᤺ᤰᤁᤡᤴ ᤔᤧᤗᤠᤃᤢ ᤔᤧᤒᤡᤖᤢᤖᤥ॥

²²ᤂᤧᤴ ᤕᤠᤱᤁᤧᤛᤠ᤹ᤒᤠ ᤗᤠᤈᤖᤛᤧᤴ ᤛᤩᤧᤀᤠᤱ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤒᤰᤂᤢ ᤔᤧᤍᤣ᤹ᤖᤢᤀᤠᤱ ᤀᤒᤪᤠᤜᤠᤔᤖᤧ ᤁᤢᤒᤣᤛᤠᤱ ᤔᤧᤕᤢᤰᤂᤢ॥ ᤂᤧᤴ ᤕᤠᤱᤛᤠᤁᤢᤴᤎᤣᤛᤠᤒᤧᤴᤏᤠᤱ ᤛᤩᤧᤀᤠᤱ ᤔᤧᤗᤢᤵᤋᤢ.

²³ᤜᤧᤰᤁᤩᤠᤱ ᤂᤧᤴ ᤂᤧᤔᤠᤕᤱᤛᤱᤅᤥ ᤐᤣᤀᤠᤱ ᤛᤠ᤹ᤖᤡᤰ ᤋᤢᤰᤂᤣ ᤆᤩᤧ॥ ᤂᤧᤴ ᤔᤠ᤺ᤱᤄᤠ ᤀᤥᤔᤕᤧᤸᤗᤧ ᤗᤠᤈᤖᤛᤧᤴ ᤀᤒᤪᤠᤜᤠᤔᤖᤧ ᤁᤢᤓᤰᤋᤢᤱᤅᤥ ᤕᤢᤅᤧᤒᤠ ᤏᤡ᤺ᤛᤢᤖᤥ॥

²⁴ᤜᤧᤰᤁᤩᤠᤱ ᤂᤧᤴ ᤕᤠᤱᤛᤠᤁᤢᤴᤎᤣᤛᤠᤒᤠᤸᤗᤧ ᤀ᤺ᤰᤋᤧᤖ ᤔᤧᤳᤋᤢ. ‘ᤐᤠᤏᤢᤍᤡᤱ ᤀᤠᤶᤒᤣ. ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤠᤱ ᤗᤠᤈᤖᤛᤧᤴ ᤁ᤹ᤕᤥ ᤐᤠᤱᤄᤧ ᤕᤢ᤺ᤛᤧ᤹ᤀᤥ॥ ᤁᤢᤜᤢᤰᤆᤥ᤺ᤴ ᤆᤫᤠ᤺ᤳᤋᤥ ᤏᤡ᤺ᤵᤛᤢᤀᤠᤱ ᤀᤠᤸᤛᤥ᤺ᤵᤐᤠᤸᤗᤧ ᤁᤢᤛᤶᤔᤥ ᤌᤠ᤺ᤛᤢ ᤐᤡᤀᤠᤏᤡᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤔᤡᤖᤠ᤺ᤰᤁᤥ ᤀᤡᤱᤃᤠ᤹ ᤛᤠ᤹ᤖᤡᤰ ᤋᤢᤰᤂᤣ ᤆᤠᤀᤠᤖ ᤕᤠ᤺ᤰᤁᤠᤖᤥ॥’

²⁵ᤁᤖ ᤀᤒᤪᤠᤜᤠᤶᤔᤡᤸᤗᤧ ᤂᤢᤏᤧ᤹ ᤔᤧᤳᤋᤢ. ‘ᤀᤠᤛ᤻ᤛᤠ᤺ᤀᤣ. ᤏᤡᤱᤘᤠ᤹ ᤀᤡ᤺ᤳᤋᤧ ᤛᤠ᤹ᤖᤧ. ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤕᤧᤸᤗᤧ ᤛᤢᤰᤂᤣᤘᤠᤀᤥ ᤁᤧᤘᤕᤧ. ᤜᤧᤰᤁᤩᤠᤱ ᤁᤴ ᤗᤠᤈᤖᤛᤧᤴ ᤋᤢᤰᤂᤣᤘᤠᤀᤥᤀᤣ ᤘᤕᤧ. ᤁᤖ ᤀᤠᤸᤗᤥ ᤂᤢᤏᤧ᤹ ᤛᤢᤰᤂᤣᤘᤠᤀᤥ ᤘᤠ᤹. ᤂᤧᤏᤧ᤹ ᤋᤢᤰᤂᤣ ᤁᤧᤈᤖ ᤁᤧᤕᤠᤰᤗᤥ॥

²⁶ᤂᤧᤴᤏᤢ᤺ᤸᤗᤧᤀᤠᤱ ᤂᤡᤏᤡ᤹ ᤁᤧᤘᤕᤡᤒᤠᤍᤧᤴᤏᤥ ᤀᤠᤏᤡᤃᤧ ᤕᤢ᤺ᤔᤠ ᤔᤧᤛᤢᤰᤋᤢᤶᤒᤠᤴ. ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤀᤠᤏᤡᤃᤧ ᤘᤕᤡᤃᤧᤒᤠᤍᤧᤴᤏᤥ ᤌᤠᤱᤔᤠ ᤁᤧᤴᤇᤢᤰᤋᤢᤶᤔᤡᤴᤗ ᤑᤠ᤹ᤀᤠᤱ ᤀᤠᤏᤡ᤹ ᤗᤢᤶᤔᤥ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳ ᤏᤧᤖᤥ॥’