San Lucas 16:15-26

¹⁵Junni Jesús yalabe itsantinue: —Nulari duque tenfeminlae yape uyan tsachila nulaca sen jolajoe tilatisa. Aman nulachi tencabi mantimini Diosi mirae tinue. Tsachila duque sen joe tinunca Diosi ti quiran seiton joe timin joe tinue. Jesús tsanque micarinue.

¹⁶Junni Jesús camicarinato itsantinue: —Matu mate Diosi yachi mantaca chutesa carinue. Junsi yachi mantate paminlanan yachi pila chutelaquinue tinue. Aman yalachi fiquica Mumunmin Juan jano fecári merántsan jominue tinue. Junni ya janunle nechi mantimini casan fiquica merántsan joe. Diosiri ya mantananun tsachi bolon suwanaeque micarica fiquica merántsan joe tinue. Junni duque tsachila ya fiquica meráto, jun bolonbi pewichique tenfelainae tinue.

¹⁷Junni tsan josanan Diosichi mantá pilari natiya epe ituchunae tinue. Aman yoquidobe, tobe jeraica josatiya, Diosichi mantári natiya epe ituchunae tinue. Jesús tsanque micarinue.

¹⁸Junni Jesús micarinato itsantinue: —Aman tencachique sonaca purato, uyan sona mancaminlari seiton quiminla jochunae tinue. Puraca jun sonaca mancaminlanan, yalanan seitonque quiminla jochunae tinue.

¹⁹Junni Jesús manca cuenta polarito itsantinue: —Tsachi manca duque oco jochunae tinue. Yari uraran sen camisa poto, ma cura sen anori fimin jochunae tinue.

²⁰Junni yachi sela tamolante popere tsachi manca tsomin jochunae tinue Lázaro mumun. Yari duque bichi chun jochunae tinue.

²¹Ya oco tsachichi ano puchuicaca fichique tsochunae. Junni susu jato, yachi bichica milanchunae tinue.

²²Junni aman Lázaro puyachunae. Junni anjelila patato, yachi tencaca tanloto, senbi chutelaquichunae matu to Abrahanbe. Junni oco tsachinan puyato, menaichunae tinue.

²³Junto aman puyan ocolachibi duque pasainato, jamochi bareca quirato, Abrahanbe Lázarobeca quirachunae tinue.

²⁴Junni yalaca quirato, matu to tata Abrahanca otito, tata Abraham tichunae. Laca laquirade! Lázaroca erede! yape temisu puntaca pibi poto, lachi nicaca taquirasa yape lachi nasi isanle tenjasa. Lari in ninbi duque padeseinayoe tichunae tinue.

²⁵Junni Abrahanni yachi alica padeseinaminbe itsantichunae tinue: Nuri matuca mantenhide! Cason jominnan, nuri jera sensiri taminue. Lázarori padeseito sonnaminue. Amanari yari pansi josanan, numan padeseinae.

²⁶Tsan josanan, Lázaro nuchica jichi timanpari, podeituno jomin jonhoe tichunae tinue. Wa foro quica joe. Natiya poletuntsan joe. Inte nechi nulachica, o nulachibi nechi inchi, natiya pola jatuntsan joe tichunae tinue.