ሉቃሴ 16:15-26

¹⁵ዒዚ ጋዓንቴ ዒንሢ ዒ'ንሢ ቶኦኮ'' ዓሲ ቤርቲዳ ጌኤሺ ማሊሳኔ፤ «ፆኦሲ ጋዓንቴ ዒንሢኮ ዒኖ ዔራኔ፤ ዓይጎሮ ጌዔቶ ዓሲ ቤርቲዳ ቦንቺንታያ ማሊ ጴዻሢ ቢያ፥ ፆኦሲ ቤርቲዳ ቦሂንቴያኬ» ጌዔኔ።

¹⁶ዬሱሴ ቃሲ'' ኬኤዛዖ፦ «ሙሴ ዔርዜ ዎጎና ፆኦሲ ማሊፆ ኬኤዛ ዓሶኮ ማፃኣፓ ሙኪ ማስካ ዮሓኒሴ ዎዶ'' ሄላ''ንዳኣና ኬኤዚ ኬኤዚ ዴዔኔ፤ ሃሢ ዬካፓ ሃንጋ ኬኤዛሢ ፆኦሲ ካኣቱሞ ኮዦ ሃይሶኬ፤ ፔቴ'' ፔቴ'' ዓሳ ዬኖ ካኣቱሜሎይዳ ጌላኒ ኮሺ'' ሜታዻኔ።

¹⁷ማዔቶዋ ዎጎይዳፓ ፔቴ'' ባኣዚ'' ባይቃስካፓ ጫሪንጮና ሳዖና ዓኣዻኒ ሼሌዔ ማዓንዳኔ።

¹⁸«ማቾ ፔኤኮ ዓንጂ ሜሌ'' ላኣሊ ዔካሢ ቢያ ዞኦስካ ኮኦማያ ማዓኔ፤ ዬያጉዲ ሃሣ ፔ ዓኒፓ ዓንጂንቴ ላኣሌሎ ዔካሢያ ፔና ዒኢሳ''ኔ» ጌዔኔ።

¹⁹ሃሣ ዬሱሴ፦ «ዲንኪ ዞቄ ማኣዖና ሃሣ ሻኣዣ፥ ሚዛጲ ዓፒላ ማይንታ ፔቴ'' ዖርጎቺ ዓሲ ዓኣኔ፤ ዒዚ ቢያ ኬሊ''ና ሚርጌ ዎዛና፥ ሜታ ባኣያ ናንጋኔ።

²⁰ዒማ''ና ዒዛ ካራ ዑፃ ቢያ ኪሢ ሌሊ ማዔ ዓላዓዜሬ ጌይንታ ፔቴ'' ማንቆ ዓሲ ላሂ ናንጋኔ፤

²¹ዬይ ማንቆ ዓሢ ዖርጎጫሢ ሙዖይዳፓ ዲኢናሢ ሙይ ሚሽካኒ ኮዓኔ፤ ዬያ ዖርጎጫሢኮ ካናታኣ ሙኪ ሙኪ ማንቃሢኮ ኪፆ ላዓኔ።

²²«ዬካፓ ዬይ ማንቆ ዓሢ ሃይቄም፥ ፆኦሲ ኪኢታንቻ ሎ ዓብራሃሜ ኮራ ዒዛ ዔኪ ዓኣዼኔ፤ ዬያጉዲ ሃሣ ዖርጎጮ ዓሢያ ሃይቂ ዱኡቴኔ።

²³ዬኖና ጋፒንፃ ጴዹዋ ዔቶ'' ሜታሢ ቤዞይዳ ዒ ሜታዺቤቃ ዼ'ጊ ጌዒ ዓብራሃሜና ኮይሎ''ይዳ ዓኣ ዓላዓዜሬያ ሃኬና ዴንቄኔ።

²⁴ዬካፓ ዒዚ ዑኡዞ ዼ'ጊዲ ‹ታ ዓዳሢዮ ዓብራሃሜ! ሃዳራ ታኣም ማሌቴራ፤ ሃይካ ታኣኒ ታሚዳ ሚርጌና ሜታዻሢሮ ፔኤኮ ኬኤሎ'' ቤርቶ ዋኣሢዳ ዳኪ ታኣኮ ዒንዲርዞ ሺሚሳንዳጉዲ ዓላዓዜሬ ታኣም ዳኬ› ጌዔኔ።

²⁵«ዓብራሃሜ ጋዓንቴ ‹ታ ናዓሢዮ! ኔኤኒ ኔኤኮ ሳዖ ናንጎ ዎዶ''ይዳ ሚርጌ ኮሺ ባኣዚ'' ዴንቂ ዎዛዼሢ ማሊ ጶቂሡዋይ? ዓላዓዜሬ ጋዓንቴ ዬኖ ዎዶ''ና ሜቶይዳ ዓኣኔ፤ ዬያሮ ሃሢ ዒዚ ሃይካ ዎዛዻኔ፤ ኔኤኒ ጋዓንቴ ሜታዻኔ።

²⁶ዬይያ ዓኣንቴ ኑኡና ዒንሢና ባኣኮ''ይዳ ፑኡፒ ማጊ ዓኣኔ፤ ዬያሮ ኑ ኮይላ''ፓ ዒንሢ ባንሢ፥ ዒንሢ ኮይላ''ፓ ኑ ባንሢ ፒንቃኒ ዳንዳዒንቱዋሴ› ጌዔኔ።