ሉቃሳ 16:15-26

¹⁵ኢ፥ «ሂንቴ ሂንቴና ኣሳ ሲንꬃን ፂሊሴታ፥ ሺን ፆሳይ ሂንቴ ዎዛና ኤሬስ። ኣሳ ሲንꬃን ቦንቼቲዳይሲ ፆሳ ሲንꬃን ቦሬቲዳይሳ።

¹⁶«ሙሴ ሂጌይኔ ናቤታ ኪታይ ዮሃኒሳ ጋካናው ሂንቴው ኦዴቲሼ ጋምዒስ። ሄሳፌ ጉዬ፥ ፆሳ ካዎቴꬃ ዎንጌላይ ሳባኬቲሼ ጋምዒስ። ኣሲ ኡባይ ያ ጌላናው ዳፌቴስ።

¹⁷ጊዶሺን፥ ሂጊያፌ ኢሲ ላፋ ፒዳሌይ ኣታናፔ ሳሎይኔ ሳዓይ ኣꬌይሲ ካዉዬስ።

¹⁸«ባ ማቺው ዬዲዲ ሃራ ኤኪያ ኡባይ ላሜስ። ባ ኣዚናፔ ኣንጄቲዳሮ ኤኬይሲካ ላሜስ» ያጊስ።

¹⁹«ኣልዖኔ ኣሌቆ ኣፊላ ማዒያ፥ ሳዒ ኢንጄቲን ጋላስ ጋላስ ኡፋይሳን ዴዒያ ኢሲ ዱሬ ኣሲ ዴዔስ።

²⁰ሃሪ ቃሲ ኣሳቴꬃይ ኩሜꬂ ማዱንፂዳ ኢሲ ኣላዛራ ጌቴቲያ ማንቆይ ሄ ዱሬ ኡራ ካሬን ዬጌቲዲ ኣቲዳይሲ ዴዔስ።

²¹ኮሻፔ ዴንዶይሳን ዱሬ ኡራ ጋይታፔ ዎꬊያ ቲፊያ ማናው ኣሞቲሼ ዴዔስ። ሃሪ ኣቶሺን፥ ካናቲ ዪዲ ኢያ ማዱንꬃ ላጮሶና።

²²«ሄ ማንቆይ ሃይቂስ፤ ኪታንቾቲ ኢያ ኣብራሃሜ ኪዑዋ ኤፊዶሶና። ቃሲ ዱሬ ኡራይካ ሃይቂዲ ሞጌቲስ።

²³ሲዖሌን ኡንዔቲዲ ዴዒሼ ꬎቁ ጊዲ ሃሆን ኣብራሃሜኔ ኢያ ኪዖን ዴዒያ ኣላዛራ ቤዒስ።

²⁴ኢ፥ ‹ኣዋው ኣብራሃሜ፥ ታው ቃꬌታርኪ፤ ሃ ላጮ ታማን ኡንዔታዳ ዴዒያ ጊሾ ኣላዛሪ ባ ቢራꬊያ ሃꬃን ዬዲዲ ታ ኢንፃርሳ ላኮꬃና ሜላ ሃያና ኢያ ዬዳርኪ› ያጊዲ ዋሲስ።

²⁵«ሺን ኣብራሃሜይ ኢያኮ፥ ‹ታ ናዓው፥ ኔ ሳዓን ዴዒያ ዎዴ ሎዖባታ ኤኪዳይሳ፥ ቃሲ ኣላዛሪ ኢታባታ ኤኪዳይሳ ኣኬካ። ሺን ሃዒ ኢ ሃይሳን ኡፋይቴስ፥ ቃሲ ኔኒ ዋዬታሼ ዴዓሳ› ያጊስ።

²⁶ሃ ኡባፌ ኣꬊዲ፥ ‹ሃፔ ሂንቴኮ፥ ሂኒፔ ሃ ኑኮ ኣꬋናው ኮዬይሳቲ ፒኖና ሜላ ኑሲኔ ሂንቴስ ጊዶን ጊታ ኣፎይ ዴዔስ› ያጊስ።