1Goro ḡoeꞌa ꞌuguḡaꞌe gigiꞌaḡa oꞌoꞌa. Eꞌanoꞌo ḡabone ḡauḡa adureo radiuꞌeteꞌe daꞌo zamare borofeꞌenaꞌa vaḡoꞌi! Mazaḡa zaꞌe Keriso teite ḡabozadu, ḡabone iziga meiro. Ebu Keriso ani adureo Badiꞌa edaꞌe moneo inaraḡeta radiuꞌohe.
2Eꞌanoꞌo adure ḡauḡa daꞌo zamaroꞌi! U raha ꞌadi ḡauḡaꞌe ago zamaroꞌi!
3Mazaḡa zaꞌe ibiꞌa haḡaiḡa sauꞌa modiro, ebu zaꞌe Badiꞌa ꞌevore zamaḡano Keriso teite tiburu radiuꞌohe. Badiꞌa aḡuꞌa azaḡaꞌe eꞌe ederoga mene idaḡa.
4Kerisoꞌe ḡabone iziga ziniꞌeteꞌe vazeḡa. Keriso aneꞌa bare onaiꞌuma madaḡano, zae zuni ani teite agaḡa manoḡano edaꞌuma.
5Eꞌanoꞌo zaꞌe ahiriꞌa urateꞌeteꞌe haḡaiḡa niduꞌa mae mode hauḡoꞌi! Aꞌe ubuma ḡezo, zamarone toraga, ahiri uꞌuteꞌeteꞌe zamare borofeꞌeteꞌe, ḡau mae buroga urateꞌeteꞌe. Ebu ḡau ḡehaḡa ago urate rudanoꞌi, mazaḡa ꞌuguḡa vazeḡaꞌe ire emoga mazao kurauꞌeteꞌe heuḡa.
6Eꞌe guḡa haḡaiḡa uꞌano Badiꞌaꞌe zamaḡa ḡugine runadu, eꞌe naeḡa ziniꞌuma.
7Zae zuni ibite ꞌuguḡa haḡaiḡa haḡaeꞌeteꞌe azaḡa teite tiburu radiudo, ebu ꞌuguḡa haḡaiḡa haḡaido.
8Rehano izidi zaꞌe, maḡunu, zama ḡugi, vaze sausauneꞌeteꞌe, vaze ni sausaune ḡoereꞌeteꞌe, ꞌuguḡa haḡaiḡa niduꞌa modoꞌi! Ebu ufire ḡoea zae hebeonoꞌo ago roꞌi!
9Ebu vaze teite ago ḡurirotitoꞌi, mazaḡa zaꞌe sauꞌa haḡaoga urateꞌeteꞌe zamaroneḡa zu ibite raha ꞌada haḡairoteꞌe haḡaiḡa modiro,
10ebu vaze iziga reiro. Badiꞌa ani, aneꞌa vaze haḡairoteꞌe iraḡa idunaḡano, zae izifeꞌohe, zaeꞌa Badiꞌa faifairu ederifine.
11Badiꞌaꞌa ḡabone iziga rifiroteꞌe moneo, emeꞌe ꞌahige mene reꞌuma: Giriki azaḡa ga Iuda azaḡa, ahiꞌrio iḡuri haḡairoteꞌe azaḡa ga iḡuri mene haḡairoteꞌe azaḡa, guniꞌa azaḡa ga Sikute azaḡa, ḡuꞌa teige gauꞌeteꞌe azaḡa ga bohaꞌa azaḡa. ꞌOuge emeꞌe emeḡeꞌa bare avoavo mene rae reꞌuma. Rehano emeḡe niduꞌa Keriso mone raꞌeteꞌe daꞌo zamare borofiꞌuma. Kerisoꞌe emeḡe niduꞌa zamao radiuꞌohe.
12Eꞌanoꞌo Badiꞌaꞌa ane mone raꞌeteꞌe azaḡa zu aneꞌa zamare borofeꞌeteꞌe azaḡa, zaꞌe, Badiꞌaꞌa ane veize meiro ꞌahine, vaze vetuḡazeadu danazoꞌi! Haḡai manoḡa vaze mazao haḡaoꞌi! Ḡaeꞌa ḡae bare niḡo mae ovoroꞌi! Roḡeru radoꞌi! Ago ḡarihe maḡunoꞌi!
13Vazeꞌa zae mazao haḡai sauꞌa haḡaoꞌidene, ago maḡunoꞌi, ebu Zuhiꞌa boroꞌa zae sauꞌa rae modiroteꞌe teige zeḡe sauꞌa zuni rae modoꞌi!
14Ebu haḡai manoḡa ꞌadi niduꞌa roꞌanoga ḡauḡaꞌe zamarone. Zaꞌe vaze teite zamarotitoꞌi! Zamarotitine, zae niduꞌa tibura onaiꞌuma.
15Badiꞌaꞌa zaꞌe Keriso ahiri radu uniho manoḡano radifine huze nuꞌoziro. Eꞌanoꞌo Keriso zama roḡeḡaniꞌa zae zama ibitozenoꞌi! Ebu iḡaiḡa Badiꞌa mazao manoḡa tauḡi roꞌi!
16Keriso ḡoere hina zamaze iriꞌvaꞌonoꞌi! Faifairu zamareꞌenaꞌa ihotitoꞌi ebu iradugutitoꞌi! Zae zamao Badiꞌa mazao manoḡa tauḡi radu, Salamo badaḡa, kuru badaḡa zu Vine Zaḡoḡaniꞌa ziniꞌeteꞌe badaḡa moꞌi!
17Ebu nagini ḡoeroꞌidene, ga nagini haḡaoꞌidene, Zuhiꞌa Boro Iesu niḡano ḡau niduꞌa haḡaoꞌi! Ebu ane niḡano Badiꞌa, emeḡe Mama mazao manoḡa tauḡi roꞌi!
18Roḡae, ohozeze ḡoere egoꞌi, mazaḡa ꞌougine, Zuhiꞌa Boro moneo raꞌeteꞌe roḡaeḡaniꞌa haḡaiꞌuma haḡaiḡa haḡaeꞌohe.
19Ohoze, inudeze zamaroꞌi, ebu ago sausau zoꞌi!
20Tahiꞌa komeꞌa komeꞌa, zaꞌe iḡaiḡa viꞌu mogo ḡoere niduꞌa egoꞌi, mazaḡa zaꞌe ꞌouge haḡaine, Zuhiꞌa Boroꞌe matuꞌiꞌuma.
21Nanu, mama, tahiꞌaze zamaze ago adufoꞌi! ꞌOugine, zamazeꞌa vetuḡaraꞌuma zu inarazeꞌa ovoiꞌuma.
22Tuḡure azaḡa, ḡuꞌa teige gauꞌeteꞌe azaḡa, zae gau niduꞌa zamaḡano, zuhiꞌaze tuḡureze ego zenoꞌi! Zeꞌe raha ꞌada daꞌo zuhiꞌaziꞌe rehano, ego zenoꞌi! Ebu zuhiꞌazeꞌa horozadu matuꞌoga veize radu ago zamare gauoꞌi! Rehano, Zuhiꞌa Boro rihoneꞌenaꞌa zae zuhiꞌa veize hube hune gauoꞌi!
23Ebu nagini gauḡa zae zuhiꞌa veize haḡaoꞌidene, zamaze niduꞌa hanadu Zuhiꞌa Boro veize gaueꞌeteꞌe teige haḡaoꞌi! Zaꞌe vaze veize daꞌo mene gaueꞌe rehano, Zuhiꞌa Boro veize borofe gaueꞌohe.
24Mazaḡa ḡianoꞌi! Za edeḡa, Badiꞌa mone raꞌeteꞌe azaḡa ziniꞌuma reiroteꞌe ḡauḡaꞌe, zaeꞌa gaueꞌeteꞌe naeḡa haḡaeꞌohe radu, Zuhiꞌa Boroꞌa ziniꞌuma. Eꞌanoꞌo zaeꞌa ꞌouge zae zuhiꞌa veize haḡaeꞌetaꞌaꞌe, Zuhiꞌa Boro Keriso veize gaueꞌohe.
25Ḡianoꞌi! Badiꞌaꞌe nize boro ga nize zuhuꞌa rehano, vazeꞌa haḡai sauꞌa haḡaetene, eꞌe naeḡa ziniꞌuma.
