ቆላሲያሳ 3

1

2

3

4

¹ሂዛ፥ ሂንቴ ኪሪስቶሳራ ሃይቆፔ ዴንዲዳይሳዳ፥ ፆሳፌ ኡሻቻ ባጋን ኡቲዳ ኪሪስቶሲ ዴዒያ ቤሳን፥ ሳሎን ዴዒያባታ ኮዪቴ።

²ሳሎን ዴዔይሳታ ቦላ ሂንቴ ቆፋ ዎꬂቴፔ ኣቲን ሳዓን ዴዒያባታ ቦላ ዎꬆፊቴ።

³ሂንቴ ሃይቆን ሻኬቲዳ ሜላ ሃ ኣላሚያፔ ሻኬቲዴታ። ሂንቴ ዴዖይ ኪሪስቶሳራ ኢሲፌ ፆሳን ጌሚስ።

⁴ሂንቴው ዴዖ ጊዲዳ ኪሪስቶሲ ቆንጪያ ዎዴ ሄ ዎዴ ሂንቴካ ኢያራ ቦንቾን ቆንጫና።

⁵ሄሳ ጊሾ፥ ሂንቴናን ዴዒያ ኣላሜ ኣሞታ ዎꬊቴ። ሄሳቲካ ላይማቴꬂ፥ ቱናቴꬂ፥ ላይማታናው ኣሞቴꬂ፥ ኤቃ ጎይኖ ሜላ ጊዲዳ ኡዜቴꬂ።

⁶ሃይሳታ ጋሶን ፆሳ ሃንቆይ ኪቴቶና ኣሳ ቦላ ያና።

⁷ሂንቴካ ካሴ ሄ ኢታ ኦጊያን ቢያ ኣሳ ጊዶን ዴዒሼ ሃይሳታ ኦꬂዴታ።

⁸ሃዒ ሂንቴ ሄሳታ ኦꬆፊቴ። ቃሲ ሃንቆ፥ ኢፆ፥ ካቺ፥ ዚጊርሲኔ ቦርሶ ኦዳ ሂንቴፌ ዲጊት።

⁹ጬጋ ኣሳቴꬃ ኢያ ኦሱዋራ ሂንቴፌ ቃሪዳ ጊሾ ኢሶይ ኢሱዋስ ዎርዶቶፒቴ።

¹⁰ፆሳ ሜꬎ ዳኒያ፥ ኤራቴꬃን ላሜቲዳ ኦራꬃ ኣሳቴꬃ ማዒቴ።

¹¹ሃ ኦራꬃ ሜꬌቴꬃን፥ ጊሪኬ ኣሲ ዎይኮ ኣይሁዴ ኣሲ፥ ቃፃሬቲዳይ ዎይኮ ቃፃሬቶናይ፥ ባርባሬ ኣሲ ዎይኮ ኢስኩቴ ኣሲ ኣይሌይ ዎይኮ ዎማኖይ ባዋ። ኪሪስቶሲ ኡባ፤ ኢ ኡባን ዴዔስ።

¹²ሄሳ ጊሾ፥ ፆሳን ዶሬቲዳ ኣሳዳ ጌሻታኔ ዶሴቲዳይሳታ ጊዲዲ፥ ማሮቴꬃ፥ ኬሃቴꬃ፥ ኣሽኬቴꬃኔ ዳንዳዓ ማዒቴ።

¹³ኢሶይ ኢሱዋ ዳንዳዒቴ። ኦኒካ ባ ላጊያን ቆሄቲዳባይ ዴዒኮ ኢያው ኣቶ ጎ። ጎዳይ ሂንቴው ኣቶ ጊዳይሳዳ ሂንቴካ ዎሊስ ኣቶ ጊቴ።

¹⁴ሄ ኡባ ቦላ ኡባባ ኢሲፌ ሺሺዲ ቃቺያ ሲቆ ማዒቴ።

¹⁵ፆሳይ ሂንቴና ኢሲ ኣሲ ኦꬂዲ ፄጊዳይ፥ ሳሮቴꬃስ ጊዲያ ጊሾ ኪሪስቶሳ ሳሮቴꬃይ ሂንቴ ዎዛና ሃሮ።

¹⁶ኪሪስቶሳ ቃላይ ሂንቴ ዎዛናን ኩሚዲ ዴዖ። ጪንጫቴꬃ ኡባን ኢሶይ ኢሱዋ ታማርሲቴኔ ዞሪቴ። ማዝሙሬን፥ ሳባኒኔ ኣያና ዬꬃን ፆሳ ዎዛናፔ ጋላቲሼ ዬፂቴ።

¹⁷ፆሳ ኣዋ ዬሱሳ ባጋራ ጋላቲሼ ሂንቴ ኦዴቲያባ ዎይኮ ኦꬂያባ ኡባ ጎዳ ዬሱሳ ሱንꬃን ኦꬂቴ።

¹⁸ማቼቶ፥ ኣማኒያ ኣሳስ ቤሲያባ ጊዲያ ጊሾ ሂንቴ ኣዚናታስ ሃሬቲቴ።

¹⁹ኣዚናቶ፥ ሂንቴ ማቼታ ሲቂቴ፤ ኤንታው ኢቶፒቴ።

²⁰ናይቶ፥ ሂንቴና ዬሊዳይሳታስ ኡባባን ኪቴቲቴ፤ ሄሲ ጎዳ ኡፋይሲያባ።

²¹ኣዋቶ፥ ሂንቴ ናይቲ ኡፋይሲ ቃንፆና ሜላ ኤንታ ጫሜꬆፊቴ።

²²ኣይሌቶ፥ ሳዓን ሂንቴው ጎዳ ጊዲዳይሳታስ ኡባባን ኪቴቲቴ። ጎዳ ቦንቺሼ ሱሬ ዎዛናፔ ኪቴቲዲ ኤንታ ኡፋይሲቴፔ ኣቲን ኣሲ ቤዖ ጊዲ ኦꬆፊቴ።

²³ሂንቴ ኦꬂያ ኦሶ ኡባ ኣሳስ ጊዶናሺን ጎዳስ ኦꬂያ ሜላ ዎዛናፔ ኦꬂቴ።

²⁴ጎዳፔ ላታ ዎይቶ ኦꬂዲ ሂንቴ ኤኬይሳ ኤሪቴ፤ ሂንቴ ጎዳ ኪሪስቶሳ ሃጋዜታ።

²⁵ፆሳይ ኣሳ ሶምዖ ቤዒዲ ፒርዶና ጊሾ ኦኒካ ኢታ ኦሶ ኦꬂኮ ባ ኢታ ኦሱዋ ጊሾ ዛሮ ኤካና።