1Itou no tere Kristus ngate jaimu tigaiha, onou waha bona tere dada ouwe nomo waha elegei nomo haruwe taagu. Haumu ouwe waha langa, Kristus no Itou owo hilou langa, nomo sia king langa yafana.
2Tere gai-gai nere dada ouweha bonade ninatege isagu. Tere oula nomo dada bonade ninatege adai isagu.
3Tere umeyenga, tebere agetege auma yafou no Kristus bagu huwari waha yafa ganga, tere Itou fada tuya.
4Kristus no tebere agetege auma yafou nomo hugu. Onodu saini no malala heige gonga, tere fere no ngate lala anyakaro bagu, Itou nomo mujari bagu heigagu ganga.
5Onou waha bona, tere tebere huwanyatege langa oula beha nomo onowou oruwanga inyide waha, dunege kote wadenga umode. Ji onowou benou boni leni, longi fanyimu bagu, onowou jijiga bagu, fanyimu inyaba onowei nomo huwanyage jayou bagu, fai ete nomo dada boya agege warou bagu. Ariya agege warou fanyimu waha no yaawa itou unyi isouwou fanyimu dorofe.
6Itou no fai oruwanga fanyimu onouha onode waha, agou inyaba nigei nomo amina haiyawai, wa fai nere nomo beele feiyade waha.
7Amina tere fere fai nere waha bagu goloboya, fanyimu waha oruwanga ono geye.
8Onou wa, elebe tere onowou inyaba hogo fere-fere oruwanga elege ayaru wagu, wa honggoro guruwou, houge mayou, huwanyage inyaba guruwou, nere ila beele inyaba lenigei nomo fanyimu, beele jijiga bagu lewou.
9Tere etenga-etenga nere Kristen ila adai yaawa nigagu, taate bona, tere huwanyatege asari nomo fanyimu oruwanga elege ayarudu boya,
10tere fai eege heigeyeha. Itou no tere ono tigainga fai eege heigeye, no gai-gai isou hilobainga baingaro tigi bona, tere ono tigainga eege heigedu boya, no nogo dorofenga heigeye.
11Onodu ere fai eege heigeye waha, ere oruwanga hogo etenga yafaya. Ere ege benou adai isei nomo, ere Grik nebere yo, Juda nebere yo, ere geege gala karu weye yo, ere geege gala karuwei uwa yo, onodu ere matane beele hogo fere-fereha nomo yo, kantri hogo fere-fereha nomo yo, ere haruwe magana ewe yafaya yo, ere ebere gauwou langa yafaya yo, taate bona, Kristus nogonga yafana, onodu Kristus nogo ere oruwanga huwanyage langa yafana.
12Itou no tere hangada tigai, onodu tere no nomo fai-aita yafa geyenga, no tere bona gaude tu‑tuna. Onou waha bona, tere fanyimu benou waha elegagu. Tere ila bonade augamide tigi gonga, hilou tafa nigagu. Tere tage tebere onowou ilei bonade, nere fai foinga langa ono nigi bonade, fai tere nyabulumu tigide waha bonade houtege fasayadu adai mayou.
13Fai ete tere gamatege langa no baabo ete nyabulumu tuwai waha no bagu beele bagu wonga, no ou waha auledu baabo waha nomo une uulu fuwona. Anyakaro no tere tebere une amina uulu tagaiha, onou dorofenga, tere fere nere ila nebere une uulu nagagu.
14Tere huwanyatege nere fai-aita ila nigagu. Onowou waha no onowou ila oruwa feiyade nigou, onodu no onowou hilobainga ila ono nigi ganga danga bagu heigedu, komodu haruwe te‑tede.
15Kristus no huwanyage foinga inyou higi bona, ere ono higi ganga huwanyage etenga yafaya, onodu huwanyage foinga inyou waha no edo tebere huwanyatege tigini oofa tagona bona. Itou no tere edo langa getege gala etenga heigedu bonade, huwanyatege tigini etengadu yafei nomo bona yaure tigaiha. Tere gai-gai Itou hilobainga tuwagu.
16Tere Kristus nomo beele awa tuwadenga tebere huwanyatege langa danga bagu inyona. Tere etenga-etenga Kristen ila isisiwou nigi bonade, ninanege isou hilou nigadenga, nere onowou hilobainga wahanga onowode. Tere huwanyatege langa, Itou hilobainga tuwagu, onodu tere Buk Song nomo moone te bonade, bori moone ila bagu, Hauri Guuni tere huwanyatege langa moone heigemuna waha taagu.
17Tere tebere beele lewou langa, tebere haruwe langa, onodu tere dada oruwanga onoya langa, tere Anyakaro Yesus unyi langa ono wagu. Onodu no unyi langa, tere Jijei Itou hilobainga tuwagu.
18Tere aita, tere tebere fai gane nebere huuna langa yafagu. Fanyimu waha Anyakaro ago langa no tigini.
19Tere fai, tere tebere oyatege gane gaude nigagu, onodu tere nere huwanyanege adai inyabamu nagagu.
20Tere magana, tere tebere ametege, anyatege gane dada oruwanga bonade nebere beele oojo wagu. Anyakaro no fanyimu onouha waha gaude tu‑tuna.
21Tere amenege gane, tere tebere magana gane adai ono nigadenga honggoro wode, gamaji nere benou isoguga, nere haruwe hilobainga ete ada ono wodbode.
22Tere haruwe magana, tere tebere hoobu fai nebere beele oruwanga oojo wagu. Gamaji saini nere hinetege langa yafa gogunga tere gelele nigei nomo ninatege isi bonade, haruwe hilobainga taagu ganga. Tere Anyakaro umuge tuwagu, onodu tere gai-gai haruwe hilobainga tei nomo jala bonade ninatege isagu.
23Tere dada oruwanga ono bonade, tere haruwe danga bagu taagu. Tere fai nebere haruwe teya dorofe uwa. Tere Anyakaro nomo haruwe tefuya.
24Tere isiya, iinga Anyakaro no agou tigonbona, wa dada hilobainga no nomo fai-aita hangada nagai waha. Isagu, Tere Kristus nomo haruwe magana yafaya, onodu no nogonga tebere Hoobu Fai tigini yafana.
25Onodu fai no nyabulu bona wa, no nomo nyabuluwou agou tonbona. Itou no fai-aita oruwanga onowou hogo etenga langanga haawe nigi-nigina.
