1Avke, te imar ušťiľan le Kristoha andral o meriben, roden oda, so hin upre, kaj bešel o Kristus pal e čači (pravo) sera le Devleskeri.
2Gondoľinen pre oda, so hin upre, a na pre oda, so hin pre phuv.
3Bo imar muľan a tumaro dživipen hin garudo le Kristoha andro Del.
4A sar pes sikavela o Kristus, savo hin tumaro dživipen, akor the tumen pes leha sikavena andre slava.
5Murdaren andre tumende o ťeloskere žadosci: O lubipen, o nalačhipen, o nažužipen, e nalačhi žadosca the oda, hoj te aven izdrade pal o love, so hin e modloslužba.
6Angle kala veci avel e choľi le Devleskeri pre ola, save na kamen te šunel.
7The tumen varekana avke andre kada phirenas a dživenas.
8Ale akana čhiven tumendar oda savoro het: E choľi, oda, hoj chučena avri choľaha, o nalačhipen, o nalačhe lava pal aver džene the o džungale lava andral o muj.
9Ma klaminen jekh avreske, bo imar čhiďan tele le purane manušes leskere skutkenca
10a urďan pre tumende le neve manušes, saves o Del furt kerel neveder pal peskero obrazis, hoj furt feder te prindžarel Oles, ko les kerďa.
11Vašoda imar nane aňi Grekos aňi Židos, abo občhindo (obrezimen) vaj naobčhindo, aňi cudzincos vaj barbaris, abo otrokos vaj slobodno, ale o Kristus hin savoro a andre savorende.
12Vašoda, hoj o Del tumen kidňa avri a kerďa sentnen, a vašoda, hoj tumen igen kamel, uren tumen andro lačhejileskeriben, lačhipen the pokora a aven kovle andro jile a ľikeren avri.
13Zľidžan jekh avres a odmuken tumenge, te hin varekas vareso pre varekaste. Avke, sar tumenge o Kristus odmukľa, odmuken jekh avreske.
14Ale upral savoreste uren tumen andro kamiben, bo o kamiben tumen sphandel čačes jekhetane.
15O smirom le Kristoskero mi ľidžal tumare jile, se sanas vičimen andre jekh ťelos, hoj te dživen andro smirom. A aven pherarde le paľikeribnaha.
16O lav le Kristoskero mi el barvales andre tumende. Bare goďaveripnaha sikaven a dovakeren jekh avres. Giľaven le Devleske a paľikeren leske le žalmenca, le chvalenca the le duchovne giľenca andral o jile.
17A savoro, so keren, abo vakeren, keren andro nav le Rajeskero le Ježišoskero a prekal leste paľikeren le Devleske amare Dadeske.
18Džuvľale, podden tumen tumare romenge, avke sar oda kampel te kerel andro Raj.
19Muršale, kamen tumare romňijen, ma vakeren zorales pre lende a ma šulaven lenca sar la metlaha.
20Čhavorale, šunen le dajen the le daden andre savoreste, bo ada hin le Rajeske pre dzeka.
21Dadale, ma aven igen zorale pre tumare čhave, hoj te na pes phanden andre peste.
22Tumen, o sluhi, šunen tumare rajen andre savoreste a ma služinen pačivales ča anglal lengere jakha sar ola, save kamen te avel pre dzeka le manušenge, ale služinen žuže jilestar a daratar le Devlestar.
23Savoro, so keren, keren andral o jilo sar le Rajeske, a na sar le manušenge.
24Se džanen, hoj le Rajestar chudena o ďeďictvos sar o počiňiben, bo le Rajeske le Kristoske služinen.
25Oleske, ko kerel o nalačhipen, ela počimen vaš oda nalačhipen, so kerďa. Bo o Del peske na kidel avri ňisave manušes, sar sudzinel.
