1Eḡe Pauloꞌa emeḡe nabudi Timoteo teite fefa ꞌadi miriheꞌohe. Eꞌe Badiꞌaꞌa madu, Keriso Iesu veize apostolo gauḡano ohohiro.
2Fefa ꞌadiꞌe Kolose neḡano radiuꞌeteꞌe Badiꞌa mone raꞌeteꞌe zu Keriso gauo hubehune gaueꞌeteꞌe azaḡa veize miriheꞌohe. Badiꞌa, emeḡe mamaꞌa manohuga zu zama roḡeḡa zenoꞌi!
3Eme zae veize iḡaiḡa kurauꞌetene, Badiꞌa, emeḡe Zuhiꞌa Boro Iesu Keriso Moga mazao manoḡa tauḡi raꞌohe.
4Mazaḡa zaeꞌa Keriso Iesu mazao fieꞌeteꞌe zu Badiꞌa mone raꞌeteꞌe azaḡa niduꞌa zamaradu danazꞌeteꞌe igiro ꞌahine.
5Zaeꞌa ꞌougeꞌetaꞌaꞌe Badiꞌaꞌa zae veize eꞌe naeḡa adureo ruhiniroteꞌe mae ḡihiniꞌuma ꞌahine. Zaꞌe hari manoḡa ḡoeꞌa huga ḡadaheḡano igiroteꞌanoꞌo, Badiꞌaꞌa eꞌe naeḡa ruhine tiro. Ebu izidi zuni zaꞌe eꞌe zamareꞌohe.
6Eꞌe hariḡa manoḡaniꞌa zae mazao feuriro. Zaꞌe Keriso mazao fieꞌeteꞌe azaḡa sauꞌaze Badiꞌaꞌa rae modeꞌeteꞌe hariḡa huga igiro. Eꞌe madaḡanonoꞌo onao izidi, zaeꞌa ḡaboneze ḡihuneꞌeteꞌe teige, haba niduꞌa zamaḡano hari manoḡaniꞌa vaze zamao gauadu, ḡaboneze ḡihuneꞌohe, ebu hari manoḡa mae ḡihineꞌeteꞌe azaḡaniꞌa ḡeharuꞌohe.
7Zaꞌe Epafaraꞌa hari manoḡa ihoziro. Aniꞌe emeḡe teite gaueꞌeteꞌe zu emeḡe zamarone. Aniꞌe Keriso veize iḡaiḡa gaueꞌenaꞌa emeḡe danafeꞌohe.
8Ebu aniꞌe zaeꞌa vaze zamaradu danazeꞌeteꞌe meꞌodofiro. vaze danazoga veize, vine Zaḡoḡaniꞌa inaraḡa ziniro.
9Eꞌanoꞌo, emeḡeꞌa zae hari ꞌouge igiroteꞌe madaḡanonoꞌo onao izidi, emeꞌe hubehune zae veize iḡaiḡa kurauꞌohe, ebu Badiꞌa ahiḡe umineꞌohe; Vine Zaḡoḡa hina aniꞌa zama huhuzaḡa zu edeḡa zenadu Badiꞌaꞌa uraꞌeteꞌe gauḡa zaeꞌa hugahune ederiꞌuma.
10Eme ꞌahige kurauꞌohe; Zaeꞌa Zuhiꞌa Boro ibio ani gubaneꞌenaꞌa, zu Badiꞌa ubuḡa reifine zaeꞌa nagini haḡaeꞌeteꞌea Badiꞌaꞌa zaꞌe manoḡa reifine, zu zaeꞌa haḡai manoḡa niduꞌa faifaine haḡaifine, zu Badiꞌa borofe edere onamifine.
11Ebu eme ahiḡe kurauꞌohe; Badiꞌa gigiꞌa inaraḡa ḡonaga ꞌoꞌoꞌa hina zaeꞌa inarifine, ebu eꞌe inaraḡa hina zaeꞌa mene ḡarihe maḡunifine, zu aduganiꞌa onaiteꞌea, zaeꞌa edau gigarafine, ebu zae zamao matuꞌuꞌa iriꞌavoga.
12Ebu eme hena ahiḡe kurauꞌohe; Zaeꞌa Badiꞌa, emeḡe Mama mazao manoḡa tauḡi rouga. Badiꞌa ani, ane mone raꞌeteꞌe azaḡaniꞌa Badiꞌa haba agaḡa zamaḡano radiuꞌenaꞌa meꞌuma manohugaḡa, zae zuni zeḡe teite meifine, ibitoziniro.
13Aꞌe Badiꞌaꞌa uzaboonoꞌo emeḡe mae vaḡifiro, ebu ane ubuga zamaroneḡaniꞌa zuhiꞌaniꞌeteꞌe zamaḡano ohofiro.
14Ebu Badiꞌa ani Keriso ru hina emeḡe ḡabofiro, ebu emeḡe sauꞌa niduꞌa rae modiro.
15Eme Badiꞌaꞌe horonoga mene idaḡa, rehano Iesu Kerisoꞌe Badiꞌa iraḡa fureneꞌohe. Iesu Kerisoꞌe, ḡau niduꞌa ize izema fureranogano Badiꞌa teite radiunu, ebu ḡau niduꞌaꞌe ani ꞌuꞌuḡano.
16Mazaḡa Kerisonoꞌo Badiꞌa ḡau niduꞌa haḡairo, adure zu rahao radiuꞌeteꞌe ḡauḡa, horoneꞌeteꞌe zu horonoga mene idaḡa ḡauḡa haḡairo. Badiꞌaꞌa vine zuhiꞌaḡa, tuḡure viga inaraḡa ebu ḡau inaraḡa niduꞌa Kerisonoꞌo zu Keriso veize haḡairo.
17Kerisoꞌe ḡau niduꞌa ize izema fureranogano aniꞌe ꞌeꞌe radiunu, ebu aniꞌa ḡau niduꞌa radiu onameꞌeteꞌe zu ḡau niduꞌa gaue tiburuꞌeteꞌe haḡairo.
18Keriso ani ekalesia vadiga, ebu ekalesiaꞌe ani ahiri. Ḡadaheḡanoꞌe ḡau niduꞌa ani mazaonoꞌo fureraro, ebu aniꞌe runeonoꞌo ḡabodiꞌuma azaḡa boꞌaḡano aneꞌa ibite ḡabodiro. Aꞌe ḡau niduꞌa aneꞌa zuhiꞌanoga veize.
19Mazaḡa Badiꞌa aniꞌe ane urao Keriso zamaḡano radiꞌuma reiro. Ebu eꞌanoꞌo Kerisoꞌa Badiꞌa haḡai furenehuniꞌuma.
20Ebu Badiꞌaꞌa ane urao vaze zu ḡau niduꞌa Keriso teite bare tibuniꞌuma reiro. Ebu Badiꞌa zu ḡau niduꞌa boꞌaḡano zama roḡeḡa veize Kerisoꞌa satauroo ruḡa soniroteꞌeanoꞌo, adure zu rahao radiuꞌeteꞌe ḡauḡa niduꞌa, ibiteꞌe Badiꞌa mazao fararo rehano, Keriso teite bare tibuziro.
21Zaꞌe ibitebone Badiꞌa mazaonoꞌo fararo, ebu zaꞌe haḡai sauꞌa haḡaidoteꞌe uꞌano, za zamaꞌe agireḡa radu, Badiꞌa mazaonoꞌo fararo.
22Rehano Kerisoꞌa ane ahirio satauroo rudaroteꞌe uꞌano, izidi zaꞌe Badiꞌaꞌa ane teite bare tibuziro, zaꞌe ane zamao ohozadu, ane ubumao zaꞌe duduḡa, ebu toragani oꞌoꞌa reifine. Vazeꞌa Badiꞌa zamao zaꞌe veꞌoreha rae mene reꞌuma.
23Zaeꞌa hubehune Badiꞌa mazao fie onameꞌenaꞌa edau gigaraune, zu hari manoḡa zamaḡano, ḡabone manoḡa meꞌuma reiroteꞌe ḡoeꞌa zaeꞌa obone giganine, zaꞌe Badiꞌa ubumao duduḡa reꞌuma. Eꞌe hariḡa manoḡaꞌe haba niduꞌa zamaḡano harame onaeha. Ebu eḡe, Pauloꞌe Badiꞌaꞌa hari manoḡa harameꞌeteꞌe gauḡano ohohiro.
24Izidi ꞌada eꞌe, zae mazao hari manoḡa haramiroteꞌe uꞌano aduga hideꞌeteꞌe moneo matuꞌeꞌohe. Ebu Kerisoꞌa aduga hidiroteꞌe teiḡe, eḡe zuni eḡe ahiri hina eꞌe aduḡaḡa hideꞌeteꞌe mene rihoneꞌohe. Eꞌe haḡaiḡaꞌe Keriso ahiriꞌe ekalesia azaḡa veize.
25Eꞌe Badiꞌaꞌa ekalesia azaḡa tuḡure gauḡano ohohiro. Aꞌe zae mazao, Badiꞌa ane ḡoere ihozoga veize
26Uꞌuru radiuꞌeteꞌe ḡauḡa ꞌaꞌaꞌe amahi hune azaḡa mazao Badiꞌaꞌa mene rae fureniro, rehano izidi ane mone raꞌeteꞌe azaḡa mazao fureneꞌohe.
27Badiꞌa ani, ibite mene rae fureniroteꞌe uꞌuru radiroteꞌe ḡauḡa manoḡa ꞌaꞌaꞌe, Iuda mene azaḡa boꞌaḡano Badiꞌa inahe meiroteꞌe azaḡa mazao rae fureniꞌuma reiro. Eꞌe uꞌuru radiroꞌeteꞌe ḡauḡaꞌe Keriso. Aniꞌe zae zamao radiuꞌohe, eꞌanoꞌo Badiꞌaꞌe manoḡa hune uꞌano zae zuni manoḡa hune reꞌuma.
28Ebu emeꞌe edeḡafe niduꞌa hina iraduguzenaꞌa, zu ihozeꞌenaꞌa, vaze niduꞌa mazao Keriso hariḡa harameꞌohe, mazaḡa emeḡe uraꞌe emeḡeꞌa danazadu vaze niduꞌaꞌa Badiꞌa zama faifairu edereꞌenaꞌa, ane ibio daꞌo onameꞌenaꞌa duduḡa vazeḡa radu, Keriso ane zamao ohoziꞌuma.
29ꞌOuge haḡaeꞌeteꞌe veize eḡe zamao inare gauꞌetaꞌe Keriso gigiꞌaḡa hina inare gauꞌeꞌohe.
