Korose 3

1

2

3

4

¹Godima yaini Yesu Kerisoini ma uyariea yanu imuka yaisina i urero eraerabusa mane imukenewaa uawe. Yesu Keriso Dawae iro Godinu baena wana enaro yaure ibinua i urero eraerabusa mane imuawe.

²Aine wai ure i urero eraerabusa mane imukada yewa doonu imukeka mediawe.

³Baya, yae feakaroma nono awoenae yanu wirokeroma me ibekae Yesu Kerisoini Godibairo fe ibinua i urero eraerabusa mane imuawe.

⁴Yesu Keriso Dawae iyanu me ibekanu ubi. Dawa fafekuie iyaini Danu arakekawere edororo Dawaini demuiro ibeifeisi.

⁵Danu arakekawere edororo ibifone uisaya yanu adinaro meramawere ukeka imuka imuke mediawe. Yanu i adinaro meramawere ukekae eno, moi minu aruma aweka enare odekaini eme emenu emenu dodoo ukekaini awekabo emenu emenu dodoo ukekaini inowere moi minu aruma aweka enare odeka imuka imukekaini moi orou ereroma imuka uyare naisa ure owere ma owere ukekaini eraerabusa keuwere munekaini i yaisina ba me godibairo guriguri ukeka ariya i imuka yaisina mediawe.

⁶Aina ainama i merama imuka imukada ukaisaie Godinu dino daiwere emuabairo ibeibaku.

⁷Adinaro yanu ibekae yewa dooro ibeka orou ari ibaada ibake yae enaenari ukaada ibeibisa.

⁸Nono awoenae ibai yaisina mune sianadae i yaisina mune siaewe. Ie eno, dino ukekaini ararua uyarekaini meomao weekaini emebairo moi mi we ma merama ukekaini wake merama weekaini yanu bebekuroma i yaisina mune siaeweke mediawe.

⁹Yanu yanu meomao da we makaewe. Yae i merama imukaini danu merama ukekaini yaisina meisake awoena irau imuka mukaya meomao da we makaewe.

¹⁰Yae awoena orou ari sika. Godima yanu awoena imuka aine wai ure makeibirie ibake yanu iwoka daiwere sinaada Dawa ari eno sinaisa.

¹¹Yabairoe eme imusu imusu ibe me. Yabairo Guriki orouini Du orouini ibe me. Yabairo ofe kuureka orouini ofe kuure me orouini ibe me. Yabairoe waiya ukeka orouini eme ereka orouini ibe me. Yabairoe Yesu Keriso Dawa mane daiwere. Ibake Dawama iya yaisina demui oroua weada ma demuiro ukaada iyanu imukaro ibeibakua yanu yanu ma fiake ku imusu imusu ukaada iyae Guriki oroua we nono iyae Du oroua eno da we makaewe.

¹²Yae Godinu we murie orou. Enoya Godima ya imukari ukaada Danu waiya ufone ibake ya we mune imusu odirieya i waiyae yanu wau ari baruawe. I waiyae i ari eno, imukari ukekaini eme moibairo naka naka ukekaini yanu ibi da we ma daiwere ukekaini we iifa ukekaini dino daukekaini i yaisina yanu wau ari baruaweke irauaiai mane uawe.

¹³Dino sabu da uaweke yanu yanu unu kore makaeweke moi mima yabake kamena wake wefekuie i wake da nauaweke mune imuke mediawe. Iyanu Dai Waria Mima iyanu merama ukeka mune imuke medi enaenari naiyemukubake i ari eno ukeibiawe.

¹⁴Yama eno uaweke nono i daiwere ufonebakeie i ari eno uawe. Yanu yanu imukari uke makaewe. Eno ufoisaie i imukari ukekama ya yaisina demuiro ma dakaa ufiakuke ma irau ufiakuro me irauaiai ibifoisa.

¹⁵Yesu Kerisoma ya u we murieke ofe demui orou ari uke odiriea Danu irau ukekama yanu imuka yawokeifiaro me irauaiai mane ufoke Godibairo we ma irauaiai ufone ibake weakune.

¹⁶Yesu Kerisonu we ma iwoka ukeka wake imuawero yanu imuka kairo ibifi. Ibai imuaweke iwoka daiwere sinaada yanu yanu we ma iwoka uke makaweke we iifa uke makanada i Samusi bukaro wakeini i Godi we ma irauaiai ukaada weaisa yaura kaini emuae Godinu Imumu Iraunu yaura kaiya yanu imukaroma Godibairo yaura kai weada Godi we ma irauaiai uawe.

¹⁷Aneme wefone ukaada o aneme aneme ufone ukaada ufoisaie Yesu Kerisonu ibiro weada Dawaini Babae Godinu ibooro enare ibaada we ma irauaiai uawe.

¹⁸Nanu moi wake wemaro ya yaisina nauawe. Ya awekabo, yae yanu emeakanu wake naukenewaa uawe. Eno ufoisaie Yesu Kerisonu arara mane ufoisa.

¹⁹Nono ya emeaka, yaini iini enaenari yanu awekabobake imukari ukaada dino da uaweke irauaiai mane uawe.

²⁰Nono ya amarakuini iini yanu amae babaenu wake da nauke mediaweke emenu wake naukenewaa uawe. Eno ufoisaie Yesu Kerisonu arara mane ufoisa.

²¹Ya amarakunu babaemuku, yae yanu amara arumabairo me sara merama wake areare da weawe. Eno weifoisaro ukeebe emua yaisina emenu imuka merama imunao ufeisaya.

²²Ya waiya ukeka orou yama yanu eme ereka orounu wake yaisina naukada ukenewaa uawe. Yanu dai eme ereka orouma ya yawoke ibaada ereibekaro emua efisane bunawere uke gagao da uaweke ukenewaa uawe. Yanu imukae Yesubairo ibinua emenu wake naukenewaa uawe.

²³Ya orou aneme aneme ukaisaie emenu waiya me. Ie Yesu Kerisonu waiyaya eno weada imuaweke ukenewaa uawe.

²⁴Eno ufoisaie ya iwoka, iyanu Dai Waria mibairo me ibene ibene ibeka mufoisa ie yanu moko muneka idua. Yae Yesu Kerisonu waiya ukeibaisaba ibake Dawabairo yanu moko mufoisa.

²⁵Ainama meramawere ufekuie Godima dawabake moko meramawere enaenari mafeku. Moi orouini iini da medifiakuke emua yaisina emenu aneme aneme ufeisa enaenari emenu moko mafiaku.