Colosenses 3

1

2

3

4

¹Nu nel tubka mroban be kwaan Jesucrist, nzhaal kwaan be kwaan nak kwaan naz yiba, paro nzob Jesucrist lad li lo Dios, pa nabeyy xaa.

²Nu nzhaal le be xgab re kwaan yiba nu naletra be xgab re kwaan yizhyo ne,

³nel ngutla re be tubka kwaan Jesucrist zee Dios nkanap yalnaban cheen rese be.

⁴¡Jesucrist nak yalnaban cheen be! Nu gorna yaad xaa stub welt, nya be pa nabeyy xaa pa nla xni.

⁵Kwaanzee naletra be re kwaan nak kwaan yizhyo ne: Nalet be re kwaan nzhekla kwerp cheen be, nalet be re kwaan beed, nazoblazht be le be re kwaan nzhekla kwerp cheen be, nalet be re xgab nachan kwaan nzho yek be, nu nazoblazht be rese kwaan nzho lo yizhyo kwaan nak mod ngwii xaa lo re maj, nel sbaa nangwiit xaa lo Dios.

⁶Nu rese kwaane nle zee nxaal Dios yalnayii cheen xaa lo re xaa sbaa nle,

⁷modxa mle be yilo leezha mle be mod nle re xaa yizhyo.

⁸Per nal laa be rese kwaane: yalnayii, re xyan kwaan nzho yek be, re wdizh nawent kwaan nii be lo stub naz xaa, nu re wdizh kwaan beed,

⁹nu re yalnkade. Nel mlaa be mod ngok be yilo nu re kwaan nawent kwaan mle be yilo;

¹⁰nu nal mban be lo stub yalnaban kwaan kub, nu lee yalnaban ne kale kub Dios yizata mbizh, zee nzho mod labeyyra be xaa, zee gak be kwenta lee xaa.

¹¹Nu lo yalnaban kub ne, nanontra nen che nak xaa sawlazh na o nanakt xaa, che nzho xaa beyy o nanzhot xaa beyy cheen re nu, che nak xaa xaa zit, che nak xaa tub mos o nanakt xaa tub mos, kwaan non nak Jesucrist, nu chelee xaa nabeyy xaa leen lextoo be.

¹²Dios mleey be zee gak be xaa xaa, nel nkela xaa be nu mle xaa nambey be lo xaa. Kwaanzee liib be lextoo be: zee lesla be ne be wechxinn be, nu gak be nadoo, natot be yalxwa, nakwaant be dil,

¹³nu yela be ne be tub be stub be, nu yenlazh be re kwaan nawent kwaan mle xaa lo be, modxa mchee Xaa Nabeyy re jwalt cheen be.

¹⁴Nu kwaan mas nonra lo re kwaane nak: Nzhaal kela be wechxinn be, nel lee yalnkela nle zee le be duzna kwaan wen.

¹⁵Nu nak be mod tubka kwerp cheen Jesucrist, nel nabeyy xaa leen lextoo be, kwaanzee nzhaal kwi wen rese be, nu nzhaal zaa be dixkix lo Dios.

¹⁶Laa be tubka nabeyy xtizh Jesucrist leen lextoo be, zee kwaan re yalnzhak cheen Dios nzho mod le be zee nye gak lextoo stub be. Nu nzhaal gool be salm nu kant, nel nzhekla be zaa be dixkix lo Dios.

¹⁷Kwaanzee rese kwaan nle be nu rese kwaan nii be, nzhaal le beya kwaan yalnabeyy cheen Jesús, Xaa Nabeyy be, nu zaa be dixkix lo Dios, xaa nak Xuz re be kwent cheen Jesucrist.

¹⁸Lee re ngwnaa nzhaal gon me xtizh sa me, nel kwaane nak kwaan nzhaal le tub me nkela Xaa Nabeyy.

¹⁹Lee re xaabyi nzhaal kela xaa sa xaa nu nayiit xaa lo sa xaa.

²⁰Lee re xaawin nzhaal gon xaa xtizh xuz xaa nu xtizh xnaa xaa, nel snee nyula Xaa Nabeyy.

²¹Nu lee re xaa nak xuz mad nanzhaalt le xaa rixyan mad, zee nagakt nalest lextoo mad.

²²Rese xaa nak mos, nzhaal gon xaa xtizh xaa nabeyy lo xaa lo yizhyo ne. Nu tubka nzhaal kee xaa zhiin nu nakeet xaa zhiin nebse leezha kawii xaa nabeyy lo xaa, zee chul zo xaa kwaan lee xaa, nzhaal kee xaa zhiin kwaan dub lextoo xaa, nel nzheb xaa ne xaa Xaa Nabeyy, xaa nzho naz leen yiba.

²³Kwaanzee rese kwaan le be nzhaal le beya kwaan dub lextoo be, mod tub xaa nkee zhiin lo Xaa Nabeyy nu nalet beya mod tub xaa nkee zhiin lo myet.

²⁴Nel nela be, lee Xaa Nabeyy zaa re kwaan chul cheen xaa lo be, nel nkee be zhiin lo Jesucrist, Xaa Nabeyy be.

²⁵Per lee xaa kwaan nle kwaan nawent, leeka kwaan nawent kwaan mle xaa yex ka xaa, nel nyent mod le Dios nonra tub xaa ke stub xaa.