1Ingkartel arrenhantherrenh itethelew, Jesus Christ-angkwarr. Arrantherr-anem Ingkart-wenh-angkwarr anterr iterreyew, Ingkart-wenh apmerew iterreyew. Christ ra Akngey-itwel aneyel.
2Arrantherr-anem anterr iterreyew irrwerl-areny-wenh-angkwarr, ahern-areny-wenh-angkwarr-weny.
3Arrantherr ahern-areny-wety ywerrew-apeny, Christ-wenh-angkwarr anyenterremel. Arrantherr innganem Christ-angkwarr intem-antey iteth aney-alpeyenh. Ahern-arenyel arey-angenh, Ingkartelant areyel.
4Ingwer-inger Jesus Christ ra apey-alpeyenh rlterrk innga. Ikwer-penh ingwerel-rnem arrenhantherrenh areyenh rlterrk innganem.
5Alakenh-anyem arrantherr ahern-arenyew inkwerelhey-angenh. Arrantherr apmwangkwarr alheyel-rnemew inkwerelhey-angenh. Arwa alhewer ingwer alwernerrey-angenh anterneyew, apmwangkwarr iterrey-angenh. Ampwal ingwer-wenhew iterrey-angenh ngkweng ineyew. Alakenh-anyem Ingkart-wenh-angkwarr irrtywerreyelarl.
6Apmwangkwarr alheyel-rnemew Ingkart ahelerreyel.
7Awank-akerr arrantherr apmwangkwarrant apentenh.
8Aleyan arrantherr apmwangkwarr apentey-angenh. Ingwer-rnemew ahelerrey-angenh, iltey-angenh, irrentey-angenh aneyew.
9Arrantherr apmwewety ipmelhew. Arrantherr ingwerew irrtywerrey-angenh.
10Arrantherr kel rlengkeny-anem, Jesus-wenh-angkwarr. Ingkartel arrenhantherrenh intem-antey akalty-antheyel, rapeny-anem irreyew, akalty innga irreyew.
11Ingkart-wenh-angkwarran arrantherr ingkerr mwerrarl aneyel, apmer ingkerrenh-areny, Jew-rnem-then ingkerrenh, Jew-weny-rnem-then, apmwangkwarr alheyel-rnem-then, warrkenh-rnem-then atyetyart-rnem-then. Mwerrarl anem, anantherr ikwer-warl anyenterrewarl. Christ ra anewantherr-itwel aneyel.
12Ingkart arrewantherr ilkelheyel ingkerrenhew. Alakenh ra iwerr mpwarew ingkerrenhew arrwekel-antey, ingkerrenhel renh arraty-angkwarr apenteyew, rernem ingwer-rnemew amperrngerreyew atwey-angenh, rernem nakelhey-angenh ingkerrenh mwerrant-arey aneyew.
13Arrantherr iparrp anamerl ahelerrey-angenh. Ingkart-areny ingwerel arrenhantherrenh iltenty, arrantherr renh ilteyney-angenh. Kel menty renh atwey-angenh, Christ-el arrenhantherrenh menty atwey-angenh-apeny.
14Kel mwerrant-arey ingkerrenhew aneyew. Ikwer-penh arrantherr anyent-apeny anem.
15Arrantherr ingkerrenh arlka anyent-apeny aneyel, Jesus Christ-wenh. Christ-el arrenhantherrenh ayerrpelew mwerrant-arey ingkerr inkwerelheyew. Mwerrant-arey atwerrey-angenh anaynteyew Ingkart ikwer inkwerelhemel.
16Christ-wenh angkew iterreyew, arraty akaltyel ingwer-rnem akalty-anthaynteyew, mwerr ilelhemel. Arrantherr aylelhey-angker, psalm-then aylelh-aynteyew, Ingkartew inkwerelheyew.
17Arrantherr angkerreyew Ingkart-wenh-angkwarr, arrantherr intem-antey Ingkart Jesus-ew iterreyew. Ingkart Akngeyew inkwerelhemel, Jesus-wenh-angkwarr.
18Arelh-rnem, artwew awelh-aynteyew. Alakenh Ingkart-wenh-angkwarr arraty aneyel.
19Artwernem, arrantherr anew-rnem mwerr arntarnt-araynteyew. Arrantherr renh-rnem atwey-angenh.
20Ampernem aleth amewikw aynewikw awelh-aynteyew, Ingkartarl ilkelheyel-angkwarr. Ingkart-wenh-angkwarr alakenh aynteyel.
21Aynikw-rnem, arrantherr ampernem irrentey-angenh, rernem antwerr alhewerr.
22Warrkenh-rnem, arrantherr atyetyart-rnemew awelh-aynteyew intem-antey, rernem arrenhantherrenh areyel-angkwarr, rernem arrenhantherrenh arey-angenh apal aneyel-angkwarr. Ingkartel areyel. Ingkartew mwerr warrkerr-aynteyew.
23Arrantherr iylpareth iytekerr-antey atnwenterrey-angenh warrkerreyew Ingkartew, ahern-arenyew warrkerrey-angenh.
24Arrantherr kel akalty, Ingkart rarrp arrenhantherrenh ilek-ilek antheyenh apmer ikwerenh-itwew. Arrantherr Ingkart Christ ikwer warrkerrey-alpeyenh.
25Ingkart anyentewant ilkelhey-angenh, ingkerrenhew ilkelherl-aynteyew. Ingkartel ingkerrenh arraty tyatyemeleyel.
