ቆላሲያሴ ዓሶም 3

1

2

3

4

¹ዓካሪ ኪሪስቶሴና ዎላ'' ሃይባ''ፓ ዒንሢ ዔቄሢሮ ኪሪስቶሴ ዴዒ ዓኣ ፆኦሲኮ ሚዛቆ ዛላ''፥ ቦንቺንቴ ቤዛ፥ ሎ ጫሪንጮይዳ ዓኣ ባኮ ዶዲ ኮዑዋቴ።

²ቢያ ዎዴ ሎ ጫሪንጫ ዓኣ ባኮ ማላንዳኣፓዓቴም ሃይካ ሳዓ ዓኣ ባኮ ዛሎ'' ማሊፖቴ።

³ዓይጎሮ ጌዔቴ ሃይቂ ዱማዾያጉዲ ሃያ ዓጮ'' ፑርቶ ባካፓ ዒንሢ ዱማዼኔ፤ ዒንሢኮ ሼምፓሢያ ኪሪስቶሴና ዎላ'' ፆኦሲ ኮይላ'' ዓኣሺንቲ ዓኣኔ።

⁴ዒንሢኮ ሼምፓሢ ማዔ፥ ኪሪስቶሴ ሙኪ ጴዻ ዎዶ''ና ዒንሢያ ዒዛና ዎላ'' ጴዻንዳኔ፤ ሃሣ ዒዛና ዎላ'' ዒንሢ ቦንቺንታንዳኔ።

⁵ዬያሮ ዒንሢዳ ዓኣ ዒንሢኮ ሳዖ ፑርቶ ማዾ'' ሱኡኮ ቢያ ዓያኖና ዎዹዋቴ፤ ዬንሢያ፦ ማቾ ሃሣ ዓኒ ማዒባኣያና ላሂሢ፥ ዒኢሳ ማዾ ማዺሢ፥ ማቾ ሃሣ ዓኒ ማዒባኣያና ላሃኒ ኮዒ ሱኡካዺሢ፥ ፆኦሲፓ ሜሌ'' ካኣሺ ካኣሽኪሢጉዴያ ማዔ ፔኤም ማዓ ባኣዚ''ሮ ጎጋይቂሢንታኬ።

⁶ዬንሢ ባኮንሢ ዛሎ''ና ፆኦሲም ዓይሢንቲፆ ዒፃ ዓሶ ዑፆይዳ ፆኦሲኮ ጎሪ''ንታ ዬዓንዳኔ።

⁷ዒንሢያ ሃያኮ ቤርታ ዬንሢ ባኮ ማዺ ናንጋያኬ።

⁸ሃሢ ጋዓንቴ ጎሪ''ንቲ፥ ዻጋ፥ ዓሲ ዒፂሢ፥ ዾንኮ፤ ዬንሢ ቢያ ሃሹ''ዋቴ፤ ሃሣ ቦርሲሳ ጌኤሲያ ጌስቲፖቴ።

⁹ሚናኣ ዓሢ ዒዛኮ ማዾ''ና ዎላ'' ዒንሢ ጉሲ ሃሼ''ሢሮ ዎሊና ሉኡዙሞ ባኣዚ'' ጌስቲፖቴ።

¹⁰ሃሢ ዓኪ ዓሲ ዒንሢ ማዔኔ፤ ዬይ ዓኪ ማዔ ዑፃ ዒዛ ኮሺ'' ዒንሢ ዔራንዳጉዲ ማዤ ፆኦዛሢ' ቢያ ኬሊ'' ፔና ማላንዳጉዲ ዒ ዓካሳሢኬ።

¹¹ያዒ ማዒፆና ዓይሁዴ ማዒባኣሢና ዓይሁዴ ማዔሢናኮ፥ ዓቲንቶ ቤርቶ ቲቂንቴሢና ቲቂንቲባኣሢናኮ፥ ጊሪኬ ሙኡጮ ዔሩዋ ዓሶንታ ቦዖጉዲ ማዔ ዓሶንታኮ፥ ካራሚና ካራሚ ማዒባኣያናኮ ባኣካ'' ዱሙሞ ባኣያ ማዔኔ። ኪሪስቶሴ ጋዓንቴ ቢያሢኬ፤ ቢያሢምኬ።

¹²ዓካሪ ዒንሢ ፆኦሲም ዱማዼያና ዶኦሪንቴያ ሃሣ ናሽኪንታያ ማዔ ጎይፆና ሚጪንቲሢ፥ ዓሲም ኮሺ ማዾ፥ ሼሌዑሞ፥ ኮሹሞ፥ ጊቢ'' ዳንዳዒሢንታ ዒንሢዳ ሚርጌና ዓኣያ ማዑዋቴ።

¹³ዒንሢ ዎሊም ማሊ፥ ፔቴ''ይ ባጋሢም ዻቤ ባኣዚ'' ዓኣቶ ኪሪስቶሴ ዒንሢኮ ጎሞ ዓቶም ጌዔሢጉዲ ዒንሢያ ዎሊም ዓቶም ጎዑዋቴ።

¹⁴ዬያ ቢያሢኮ ዑሣ ቢያሢ ፔቴ''ይዳ ማሃ፥ ናሹሞ ዓኣያ ማዑዋቴ።

¹⁵ፔቴ'' ዑፆኮ ዱማ ዱማ ቤዞ ማዒ ዒንሢ ዔኤሊ''ንቴሢ ዬያ ኮሹሞም ማዔሢሮ ኪሪስቶሴ ኮሹማ ዒንሢ ዒና'' ካኣታዾንጎ፤ ፆኦሲ ጋላታያ ማዑዋቴ።

¹⁶ኪሪስቶሴ ቃኣላ'' ዒንሢኮ ዒና'' ሚርጌና ዓኣያ ማዖንጎ፤ ዒንሢዳፓ ፔቴ''ይ ባጋሢ ዔራቶ ቢያና ዔርዞንጎ፥ ዞሮንጎ፤ ፆኦሲም ዓይናዺሢና ፆኦሲ ቦንቺሲሢና፥ ሃሣ ፆኦሲ ጋላቲ ጋላቲ ዓይናዹዋቴ።

¹⁷ፆኦሲ፥ ዓዳሢ፡ ዬሱስ ኪሪስቶሴ ሱ'ንፆና ጋላቲ ጋላቲ ዻንጋና ጌስቶ ባኣዚ''ያ ማዖም ዒንሢ ማዻ ባኮዋ ቢያ ጎዳ ዬሱሴ ሱ'ንፆና ማዹዋቴ።

¹⁸ዒንሢ ላኣሎ ናኣታ''! ዒንሢ ጎዳ ዬሱሴሮ ማዔ ጎይፆና ሃሣ ዓይሢንቲሢ ኮይሳያታሢሮ ዒንሢ ዓኒንሢም ዓይሢንቱዋቴ።

¹⁹ዒንሢ ዓቲንቃ! ዒንሢኮ ላኣሎ ናሽኩዋቴ፤ ዔያቶም ፑርታያ ማዒፖቴ።

²⁰ናይዮቴ! ቢያ ባኣዚ''ና ዒንሢ ሾዔ ዓሶም ዓይሢንቱዋቴ፤ ዓይጎሮ ጌዔቴ ዬያ ጎዳ ናሽካ ባኣዚ''ታሢሮኬ።

²¹ዒንሢ ናኣቶ'' ሾዔ ዓሳ! ናኣታ'' ዒንሢኮ ፑርቱሞም ማሉዋጉዲ ጎሪ'' ዔያቶም ካራ ባይዚፖቴ።

²²ዒንሢ ዓሶም ዓይሌ'' ማዒ ማዻ ዓሳ! ሳዖይዳ ዒንሢ ዎይሣ ዓሶም ቢያ ባኣዚ''ና ዓይሢንቱዋቴ፤ ዬያ ዒንሢ ዓይሢንታሢ' ዓሲ ዎዛሳኒና ዓሲ ቤርቲም ጴዺሢሮ ማዒባኣንቴ ጎዳ ዬሱሴ ዒጊጪሢና ጌኤሺ ዒናፓ ማዖንጎ።

²³ዒንሢ ማዻ ባኮ ቢያ ዓሲምቱዋንቴ ጎዳ ዬሱስ ኪሪስቶሴም ማዻያ ማሂ ዶዲ ዎዛና ማዹዋቴ።

²⁴ዒንሢ ማዼ ዛሎ''ሮ ጎዳ ዒንሢም ዒንጋንዳ ባኣዚ'' ዓኣሢ ዒንሢ ዔራኔ፤ ዒንሢ ማዻሢ ጎዳ ኪሪስቶሴምኬ።

²⁵ፑርታ ማዻሢ' ፑርቶ ማዾ'' ዛሎ'' ሜቶ ዔካንዳኔ፤ ዓይጎሮ ጌዔቴ ፆኦሲ ዓሲ ዱማሲ ዛጉዋኣሢሮኬ።