1Lákũ a futɛ kũ Kirisio nà, à tó ludambɛ yã doárɛ arɛ, zaakũ gwen Kirisi vutɛna Luda ↄplai.
2À tó á laasun gↄ̃ kú ludambɛ yãnↄa, àsungↄ̃ kú andunia pↄ́aro.
3Zaakũ a ga, á wɛ̃̀ndi utɛna kũ Kirisio Luda gũn.
4Lákũ Kirisi de á wɛ̃̀ndi ũ nà, tó à bò gupuraa, ákↄ̃nↄ se áni bo kãao kũ gakurio sà.
5Abire yãi à andunia yã kũ ò kú á nɛ̀sɛɛ gũnnↄ dɛ: Pãpãkɛnaa, wé'iyã, mɛ̀futɛnaa, yã vãni nidɛna kũ wãkũuo. Pↄ́ kũ gbɛ̃ dì a wãkũ kɛ gↄ̃̀nɛ a dikiri ũmɛ.
6Yã birenↄ yãin Luda ni pↄfɛ̃na kipa a yãmarisarinↄa.
7Ákↄ̃nↄ se, á kú yã pìnↄ gũn yã, ò dòárɛ arɛ.
8À ↄ gbarɛ yã dí takanↄi sà: Pↄfɛ̃naa, zukakanaa, nɛ̀sɛ pãsĩ, gbɛ̃sↄ̃sↄ̃na kũ yãpãpã'onaao.
9Àsungↄ̃ ɛ́kɛ tokↄ̃nɛro, zaakũ a á dà zĩ kũ a yãkɛnanↄ gòala,
10a a dufu sɛ̀ kũ à kɛ̀kɛ àtɛn dufu kũ de à gↄ̃ lán a Kɛ̀ri pↄ́ bà.
11Gwe Yudanↄ kũ buri pãndenↄ dokↄ̃nↄmɛ kũ tↄ̃̀zↄ̃nadenↄ kũ gyↄfↄrↄdenↄ kũ sɛ̃̀ntɛ gbɛ̃nↄ kũ wɛ́siradenↄ kũ zↄ̀nↄ kũ zĩdadenↄ. Kirisimɛ ń pínki ũ, à kú ń gũn ń pínki.
12Abire yãi, lákũ Luda á sɛ́ a gbɛ̃ yenyĩdenↄ ũ nà, dà kũ ò de à daáwanↄn dí: Wɛ̃nda, gbɛ̃kɛ, zĩdabusanaa, busɛkɛ kũ mɛnao.
13À kↄ̃ fↄ̃. Tó yãke sù à á ká kũ kↄ̃o, à sùru kɛ kũ kↄ̃o. Lákũ Dikiri sùru kɛ̀ kãáo nà, à kɛ kũ kↄ̃o lɛ se.
14A pínki musu à yenyĩ kũ àdi yã pìnↄ kakara swáswa daáwa.
15À tó aafia kũ à bò Kirisi kĩnaa kí ble á swɛ̃̀ɛ gũn, zaakũ kunna kũ kↄ̃o aafiaan Luda á sísia mɛ̀dokↄ̃nↄdenↄ ũ. Àgↄ̃ Luda sáabu kpá.
16À tó Kirisi yã vutɛki le á nɛ̀sɛn manamana. À yã dakↄ̃nɛ, à lɛ́ dakↄ̃a kũ ↄ̃ndↄ̃ sĩnda pínkio. Sáabukpanaa gũn à lɛ̀ sí Ludanɛ á swɛ̃̀ɛ gũn kũ zaburao kũ tↄ́kpanaao kũ donyĩ lɛ̀ nↄ.
17Pↄ́ kũ átɛn kɛ ke kũ átɛn o pínki, à kɛ kũ Dikiri Yesu tↄ́o, à De Luda sáabu kpá a gãi.
18Ákↄ̃nↄ nↄgbɛ̃nↄ, á baadi gↄ̃ mì natɛ a zãnɛ. Lɛn à kũ̀ à kɛ Dikiri gũn lɛ.
19Gↄ̃gbɛ̃nↄ, á baadi gↄ̃ ye a nanↄi. Àsungↄ̃ pãsĩ kũńworo.
20Nɛ́nↄ, à á de kũ á dao yã ma yã sĩnda pínki gũn, zaakũ abire mɛ́ àdi ká Dikirigu.
21Denↄ, àsun á nɛ́nↄ nɛ̀sɛ futɛ à ń pↄ yakaro.
22Zↄ̀nↄ sↄ̃ à á andunia dikirinↄ yã ma yã sĩnda pínki gũn. Àsun zĩ kɛńnɛ ń wɛ́ yãiro. À zĩ kɛńnɛ kũ nɛ̀sɛ mɛ̀n doo, zaakũ Dikiri vĩnakɛrinↄn á ũ.
23Yã kũ átɛn kɛ pínki, àgↄ̃ kɛ kũ yãpurao, lándↄ̃ Dikirin átɛn kɛnɛ bà, adi kɛ bisãsirinlo.
24Àgↄ̃ dↄ̃ kũ áni Dikiri láada le á baka ũ. Dikiri Kirisin átɛn doi.
25Yãvãnikɛri ni a vãni gbɛ̀ le. Luda dì gbɛ̃ke wɛ́ gwaro.
