ቆላሲያሳ 3

1

2

3

4

¹ሲሚ ሂንቴንቱ ኪሪስቶሳና ሃዪቁዋፔ ዴንዴዳዋ ጊዶፔ፥ ፆሳፔ ኡሼቻ ባጋና ኡቴዳ ኪሪስቶሲ ዴዒያሳን ሳሉዋን ዴዒያዋ ሚኒሲ ኮዪቴ።

²ሳሉዋን ዴዒያዋ ሂንቴንቱ ቆፓናፔ ኣቲን፥ ሳዓን ዴዒያዋ ቆፖፒቴ።

³ኣዪሲ ጎፔ፥ ሂንቴንቱ ሃዪቄዲታ፤ ቃሲ ሂንቴንቱ ሼምፑ ፆሳን ኪሪስቶሳና ጌሜዳ።

⁴ሂንቴው ዴዖ ጊዴዳ ኪሪስቶሲ ቆንጪያ ዎዴ፥ ሄ ዎዴ ሂንቴካ ኣናና ቦንቹዋን ቆንጫና።

⁵ሄዋ ዲራው፥ ሂንቴንቱን ዴዒያ ሃ ሳዓ ኣሞቱዋ ዎꬊቴ፤ ሄዋንቱካ ዎሹሚያዋ፥ ቱናቴꬃ፥ ዎሹማናው ኮዪያዋ፥ ኢታ ኣሙዋ፥ ሚሻ ኣሞቲያዋ። ዮራንቻ ጊዱሳይ ኤቃው ጎዪኒያዋፔ ዱማቴና።

⁶ሃዋንቱ ጋሱዋን፥ ፆሳይ ኣዛዜቴና ኣሳቱዋ ሃንቄታናዋ።

⁷ካሴ ሂንቴንቱ ሃ ኢታ ቆፋቱዋን ዴዒያ ዎዴ ኡንቱንቱን ሞዴቴዲታ።

⁸ሺን ሃዒ ሂንቴንቱ ቃሲ ሃንቁዋ፥ ዪሉዋ፥ ኢፁዋ፥ ሂንቴንቱ ዶናፔ ኬሲያ ጫሻኔ ዬላዪያ ሃሳያ ሃዋንታ ኡባ ሂንቴፔ ꬋዪሲቴ።

⁹ኢቱ ኢቶ ዎርዶቶፒቴ፤ ኣዪሲ ጎፔ፥ ናጋራንቻ ሜꬌታ ኣ ኦሱዋና ሂንቴፔ ꬋዪሲ ዲጊዴ፥

¹⁰ፆሳይ፥ ኣ ሜꬌዳዌ፥ ባሬና ማላቲሳናዉኔ ባሬው ዴዒያ ኤራቴꬃ ኡባ ኢማናው፥ ኡባ ዎዴ ኦራꬂያ ኦራꬃ ሜꬌታ ማዬዲታ።

¹¹ሃ ኦራꬃ ሜꬌታን፥ ጊሪኬ ኣሳ ዎይ ኣዪሁዳ ኣሳ፥ ቃፃሬቴዳዋ ዎይ ቃፃሬቲቤናዋ፥ ኢማꬃቱዋኔ ኣይኔ ታማሪቤናዋ፥ ኣዪሊያ ዎይ ዎማኑዋ ጊዴ ሻኪያባይ ባዋ፤ ሁጴ ኣላሊ ኪሪስቶሳ፤ ኢ ኡባንካ ዴዔ።

¹²ሄዋ ዲራው፥ ፆሳይ ዶሬዳዋንቱዳን፥ ጌሻኔ ሲቂያዋንታ ጊዲዴ፥ ማሮቴꬃ፥ ቃሬታ፥ ኬካቴꬃ፥ ሂንቴንቱ ሁጲያ ካዉሺያዋ፥ ኣሺኬቴꬃኔ ዳንዳያ ማዪቴ።

¹³ኢቱ ኢቱዋዋ ዳንዳዪቴ፤ ኦኒኔ ባሬ ላጊያ ቦላ ሃንቄቴዳዌ ዴዖፔ፥ ኢቱ ኢቶ ኣቶ ያጎ። ኪሪስቶሲ ሂንቴንቶ ኣቶ ጌዳዋዳን፥ ሂንቴካ ኣቶ ጊቴ።

¹⁴ሄዋ ኡባ ቦላ፥ ኡባባ ኢቲፔ ሺሺ ቃቺያ ሲቁዋ ማዪቴ።

¹⁵ኪሪስቶሲ ኢሚያ ሳሮቴꬃይ ሂንቴንታ ሞዶ፤ ኣዪሲ ጎፔ፥ ፆሳይ ሂንቴንታ ኢቲ ኣሳ ኡዲዴ፥ ሄ ሳሮቴꬃው ፄሴዳ ፆሳ ጋላቲቴ።

¹⁶ኪሪስቶሳ ቃላይ ሂንቴንቱ ዎዛናን ኩሚዴ ዴዖ፤ ሂንቴንቶ ዴዒያ ኣꬌዳ ኤራቴꬃ ኡባን ኢቱ ኢቱዋ ታማሪሲቴኔ ዞሪቴ፤ ሂንቴንቱ ዎዛናን ፆሳ ጋላቲዴ፥ ዎሳኔ ማዚሙሪያ፥ ፆሳ ሱንꬃ ꬎቁ ኦꬂያ ዬꬃ ዬፂቴ።

¹⁷ሂንቴ ኣይ ሃሳዪያዋ ዎይ ኣይ ኦꬂያዋ ጊዶፔካ፥ ኣዉዋ ፆሳ ዬሱሳ ባጋና ጋላቲዴ፥ ኦꬂያዋ ኡባ ጎዳ ዬሱሳ ሱንꬃን ኦꬂቴ።

¹⁸ማቼቶ፥ ኣማኒያ ኣሳው ቤሲያዋዳን፥ ሂንቴንቱ ኣሲናው ሞዴቲቴ።

¹⁹ኣቱማ ኣሳቶ፥ ሂንቴንቱ ማጫ ኣሳ ሲቂቴ፤ ኡንቱንቱና ዎፑ ጊዴ ዴዒቴ።

²⁰ናቶ፥ ሂንቴንታ ዬሌዳዋንቶ ኡባባኒ ኣዛዜቲቴ። ኣዪሲ ጎፔ፥ ሂንቴንቱ ኡንቱንቶ ኣዛዜቲያዌ ፆሳ ዳሮ ናሼቼ።

²¹ኣዋቶ፥ ሂንቴንቱ ናናይ ዎዛና ባዬና ማላ፥ ኡንቱንታ ዪሎዮፒቴ።

²²ኣዪሌቶ፥ ሳዓን ሂንቴንቶ ጎዳ ጊዲያዋንቶ ኡባባኒ ኣዛዜቲቴ፤ ጎዳው ያዪዴ፥ ሱሬ ዎዛናን ኦꬂቴፔ ኣቲን፥ ኣሳ ናሼቻናዉኔ ኣሳይ ቤዖ ጊያዋን ኣዛዜቲያዋንታ ጊዶፒቴ።

²³ሂንቴ ኦꬂያ ኦሱ ኡባ ኣሳው ጊዴናን ጎዳው ኦꬂያዋዳን፥ ዎዛናፔ ኦꬂቴ።

²⁴ጎዳ ኪሪስቶሳው ሂንቴንቱ ኦꬂያ ዲራው፥ ኢ ባሬዋንቶ ኢማናው ጊጊሲ ዎꬄዳዋ ሂንቴንቱ ላታናዋ ኣኬኪቴ።

²⁵ባላባ ኦꬄዳ ኡራይ ኦኒኔ፥ ባሬ ኦꬄዳ ባላዳን ዎይታ ኣካና፤ ኣዪሲ ጎፔ፥ ፆሳይ ፒርዲዴ፥ ኦናኔ ማዴና።