Colosenses 3

1

2

3

4

¹Ya ke nii lëë do pañ ksa do Crist kol tsoxko kap to cos nii no leñ kpaa laañee sob Crist kwi Dios nëzli.

²Cos nii no kpaa kol ko kik to, tsoxkody to cos nii no lo kislyu re.

³Por lëë do kuty ksa do Crist aan lëë xaa sikni xkyalmbañ do lo Dios.

⁴Yuub Crist nak xkyalmbañ do, aan tsiñee lëë xaa kiid stub wi do kiidni xaa ni wi do tso laañee kñabey xaa.

⁵Por ngo, kol ksaan tol nii no lo kislyu re. Tsonidy to stu mguiy o stu gaa kwnaa, ni kuñdy to cos mal, ni kuñdy to cos nii klyaañtyee styoo do. Ni kak ngbiñdy to, por nak kyalkpiñ sinak nii nsoxib to lo chol mdyo.

⁶Por kchë tol re lëë Dios ksaksi meñ nii xsoobty xtiits xaa.

⁷Tyub tsigo beeñtsyey do kchë tol go.

⁸Per na kol ksaan xkyalwlëë do, xkyalyox to ni xkyalmal do. Kotsyesty to ni kñeedy to tiits yox.

⁹Jkëëtidre to xcombañer do, por naktre to si kok to klo, lëë do ptsëël xmod to,

¹⁰aan lëë do pkub sinak kwnabey Dios parñee kyuumbey nizh to xaa.

¹¹Kintre nii kak to o kakty kaa to meñ Israel, ni kintre ni tsobey do o tsobeydy kaa to, ni kintre nii kak to xaa nguey, xaa nii psyuuy o xaa nii gaa kënlaa, por kchë do ngab lo Crist ni kchë leñ styoo do no xaa.

¹²Xkëstyoo Dios to aan lëë xaa kwle lëë do parñee jkab to lo xaa. Ngui kol kpañ, kol jkëstyoo, ni kol kak ndoladzy, ni kol kap paciensy.

¹³Kol kxekw lsa lo do ni kol kuñ perdón xcombañer do, sinak nii beeñ Crist to perdón.

¹⁴Tugak kol jkëstyoo por lëë kyalwkëstyoo xyuuñtusy lëë do.

¹⁵Lëë lëësy xkyalndoladzy Crist dyon kluuy pe kuuñtsyey do, por lëë Dios kwtsyetsy lëë do parñee kyak to tugak. Aan kol ktee skizh lo xaa.

¹⁶Lëë lëësy xtiits Crist dyon ko tubli styoo do. Kol kseedy ni kol kchoobladzy lsa styoo xcombañer do, ni kol kool salmos, ni kol kool cant nii xtee skizh lo Dios.

¹⁷Cualquier cos nii kuuñtsyey do ni kñee do, kol ksaladzy Jesucrist, ni kol ktee skizh lo Tat Tios por lëë xaa.

¹⁸Kwnaa, kol ksoob xtiits tsiil do, por singo xñabey Dios kuñ kwnaa nii xniladzy xtiits xaa.

¹⁹Xaapkiy, kol jkëstyoo tsiil do, klëëdy to lo me.

²⁰Xaa wiñ, kol ksoob xtiits pxosy to, por kchë ngo xyo styoo Dios.

²¹Xaapkiy, kuuñ klëëdy to xiñ do, parñee kchosody styoo xaa.

²²Singo gak lëë do nii psyuuy do, kol ksoob xtiits xaa nii kwxii lëë do. Tugak kol kyë tsiiñ, lëjty xaktyee tsiñee so xaa, sink tyub styoo do kol kuñ tsiiñ. Kol ktsyeb Dios.

²³Nguiool kol ko styoo do tsiñee kuuñtsyey do cualquier cos. Kuñdy tow sinak nyako xtsiiñ meñ, sink kol kuño sinak nii nyako xtsiiñ Dios.

²⁴Por nan do nii lëë Dios knee nii jkaa do. Por xtsiiñ Jesucrist xkyë do.

²⁵Per lëë kchë xaa nii chuñ cos mal, lëë xaa kazh por xkyalmal xaa, por lëdy wi Dios xkwe meñ.