Josue 23:5-12

⁵Dadji Boro Ãcõrẽba maʌ̃ ẽjũãne b̶ea ẽberãrãra bãrã quĩrãpitabemada jũma ãyã jʌrecuaya. Mãwã bãrãba ãdji ẽjũã sid̶a jũma edad̶ia idjia jarad̶a quĩrãca.

⁶Quĩrãcuita b̶ead̶adua. Ãcõrẽ ley Moiseba cartad̶e b̶ʌd̶ara jũma ĩjã o pananadua. Ni maãrĩ bid̶a ãĩ orãnadua.

⁷Ẽberãrã wad̶i naʌ̃ druad̶e b̶ea ume ãbaa b̶earãnadua. Ãdji ãcõrẽ b̶eara ẽpẽrãnadua. Maʌ̃rã quĩrãpita chĩrãborod̶e copanenaped̶a bia bed̶earãnadua idjab̶a iwid̶irãnadua. Wãrãneba jarad̶ibʌrʌ ãdji trʌ̃neba mãwã orãnadua.

⁸Ewariza ab̶a dadjirã Ãcõrẽdrʌ ĩjã pananadua id̶i ĩjã panʌ quĩrãca.

⁹Dadji Ãcõrẽba puru droma mẽsrã b̶eada bãrã quĩrãpitabemada ãyã jʌretacuasia. Ab̶a id̶i bid̶a ni ab̶aʌba bãrãra droad̶aẽ́ panʌa.

¹⁰Dadjirãnebema ab̶aʌba ãdjirã mil panʌra ãyã mĩrũ pirabibaria Ãcõrẽra dadjirãare djõ b̶ʌ bẽrã idjia jarad̶a quĩrãca.

¹¹Maʌ̃ bẽrã quĩrãcuita b̶ead̶adua. Dadji Ãcõrẽra bio quĩrĩãnadua.

¹²Idjira igararãnadua. Maʌ̃ awara naʌ̃ druad̶ebemarã wad̶i dadjirã tãẽna b̶ea ume ãbaa b̶earãnadua. Bãrãba ãdji caurãda edad̶ibʌrʌ wa bãrã caurãda ãdjirãa diad̶ibʌrʌ, bio cawad̶adua dadji Ãcõrẽba ãdjirãra bãrã quĩrãpitabemada waa ãyã jʌretaẽ́da. Ãtebʌrʌ jʌ̃caraba animarã jidabada quĩrãca ãdjirãba bãrãra biẽ́ b̶ʌd̶ia. Soaba bãrã ẽcarrad̶e ubʌda quĩrãca wa ʌrʌ bãrã daud̶e b̶ʌ quĩrãca ãdjirãneba bãrãra bio mĩga panania ab̶a naʌ̃ ẽjũã bio bia b̶ʌ Ãcõrẽba diad̶ad̶e bãrã jũma quinibʌdad̶aa.